iTabagone Qase Cake
Na iMatai ni Kalawa ki na Veivutuni
E vakaitikotiko mai Ouest, Haiti o koya e vola.
Au vakila e dua na butobuto ni sa mai toka ena noqu bula. Kau vakila ni dodonu me keirau veitalanoa kei noqu bisopi.
iTaba mai vei Joshua Dennis
Au nanuma na noqu sa mai digitaka kei rau na kaulotu e dua na tikinisiga meu sa papitaiso kina. Eratou tarogi au kevaka au sa vakarau tu meu cakava na veiyalayalati oqo kei na Tamada Vakalomalagi. Au sega mada niu vakasamataka ka vakasinaiti na lomaqu ena reki, au sa vaka “Io!” Au vinaka meu ciqoma na isolisoli mareqeti e solia vei au e dua na Tama dauloloma, kau kila tu niu na sega ni marau kevaka e sega ena noqu bula na iVakabula. Ia, au sega ni kila se cava ena namaki vei au ena veisiga ni mataka.
Sa qai yaco mai na siga levu namaki. E guilecavi dredre, kau sa marau sara.
Veisiga Buto
Ni oti na papitaiso kei na veivakadeitaki, sa tekivu me butobuto mai na siga eso. Au sotava tu na dredre vakavuvale, kau sa sasaga dredre tiko meu muria na lawa ni Kalou. Au sega ni kila na veika meu cakava, kau sa vinakata meu sa soro. E vaka sa sega ni dua e rawa ni kila na veika au sotava tiko.
Au dau taleitaka na wilika na iVola i Momani, ia, ena gauna oya au sa biuta vakatikitiki. Ena dua na siga, niu tiko taudua e vale, au vakila na kamica ni veivakauqeti ni Yalo meu wilika na iVola i Momani. Au masu tiko, niu vinakata meu kunea e dua na isau ni rarawa au sotava tiko ena gauna oya. Au dolava sara yani ki na Alama wase 5. E tukuni ena tikina e 27: “Ko ni sa lako li, ka qarauni kemuni mo ni kakua ni beitaki rawa ena dua na ka ena mata ni Kalou? Kevaka ko ni sa kacivi mo ni mate ena tiki ni gauna oqo, e rawa beka mo ni na kaya, mai lomamuni, ni ko ni sa yalomalumalumu sara? Ni sa savai oti na nomuni isulu ka vakavulavulataki ena dra i Karisito, ko koya ena lako mai me sereki ira na nona tamata mai na nodra ivalavala ca?”
E tarai au sara na veivosa oqori. Au vakila niu gadreva meu veivutuni, kau saga sara me sa dua na gauna meu veitalanoa kina kei bisopi. Sa dua na ka na levu ni noqu rere, ia, au sa vakaukauwataki au meu lako yani vua.
Kilai vinaka ni Yalayala ni Kalou
Niu yaco yani kina valenivolavola nei bisopi, sa dua na ka na levu ni cala au vakila tu au sa vinakata ga meu suka tale. Ia, au a masulaka me rawa niu yaloqaqa meu tukuna na veika kece au gadreva meu tukuna. E kidavaki au o bisopi kina nona valenivolavola, ka qai cabora e dua na masu me ciqoma na veivuke ni Kalou. E vosa vei au me vaka ga au luvena ka vakaraitaka vei au na loloma ena nona vosa. E solia vei au na veivakasalataki ka kerei au me cakava eso na ka me rawa niu ciqoma na veivosoti ni Kalou ka meu qai lesu tale yani me keirau veitalanoa tale.
Au marautaka dina na madigi oqo. Au vakamuria na nona vakasala kau mai vakila vinaka sara na nona yalayala na Turaga vei Alama, “ia kevaka sa vakatusa na nona ivalavala ca vei iko vata kei au, ka veivutunitaka vakaidina sara e lomana, mo qai vosoti koya, ka’u na vosoti koya talega.” (Mosaia 26:29). Niu veivutuni oti ena yalodina, au kila ni sa vosoti au na Kalou. Au sa vakila na loloma ni Tamada Vakalomalagi e lomaqu, ka sa laveti na butobuto. Au sa marautaka na noqu sasaga.
E Tiko na Bisopi me Veivuke
E mata ni Turaga na bisopi ena tabana levu. Mo kila ni sa tiko e kea o koya me vukei iko mo kunea na marau dina ka tuva tu na Kalou me nomu. Vakabauti koya. Kevaka o sotava na leqa se gadreva mo veivutuni, lako vua ka vosa vua. Ena vukei iko o Koya.
Au kila ni sega ni dau rawarawa mo lako yani ka raici koya ena so na gauna. Ia, me vaka e vakamacalataka o Peresitedi Lorenzo Snow (1814–1901) baleta na ituvatuva ni Tamada Vakalomalagi: “Meu tukuna mada ena vuravura ni yalo [taumada], ena gauna e vakaturi kina vei keda meda … lako curuma na veika eda sotava tiko ena gauna oqo, e sega beka ni rairai totoka se rawarawa. … Ia e sega ni vakabekataki nida raica vakamatata ka kila vinaka ena gauna oya, me rawa nida rawata na noda vakacerecerei kei na vakalagilagi, e gadrevi meda na sotava na veika oqo.” E qai kaya o koya, “Eda duavata meda vakamuria na nona lewa na Kalou, sa kena isau na noda sa mai tiko eke” (Na iVakavuvuli ni Peresitedi ni Lotu: Lorenzo Snow [2012], 110).
E tiki ni veivutuni na noda vakamuria na lewa ni Kalou. Mo kakua ni rerevaka na bisopi, cakava me rawa ni yaco me nomu itokani o koya. E digitaki koya na Kalou, e rawa ni vukei iko mo veivutuni ka vakabulai na yaloqu ena nomu lako yani vei Jisu Karisito. E vinakata me vukei keda na Turaga, ia e gadrevi meda taura yani na imatai ni kalawa ki na veivutuni. Ena sala oqori e rawa nida raica kina na vakavotukana ni iyalayala oqo ena Aisea 1:18: “Ke sa vaka na ka kulakula na nomudou ivalavala ca, sa na vulavula me vaka na uca vulavula.” Ena inaki oqori, sa tiko na bisopi me veivuke kina.
Au kila ni bula tiko na Kalou ka sa noda iVakabula o Jisu Karisito. Erau lomani keda vakalevu sara!