5 Na Sala Ko Rawa ni Vukei Nomu Bisopi Kina me Vukei Iko

Mai vei Chakell Wardleigh

Mekasini ni Lotu

E dau cakava nona vinaka taucoko, ia eso na gauna e gadreva na veivuke.

E dau tavaki iko ena lululu dei e veigauna drau dau sota kina, e dau dabe toka e nona tikina mai cake ena soqoni ni sakaramede, ka solivaka e levu nona gauna me qaravi iko kei na Turaga.

O koya e nomu bisopi: e dua na iliuliu vakamatabete ka a kaciva na Kalou me vakatulewa ena nomu tabanalevu. Na lisi ni nona cakacaka e sega ni vakacavari, e dau vakasalataki ira na lewenilotu e nona valenivolavola ni suka mai na cakacaka siga taucoko, ka dau tu yani ki valenilotu me vakayacora kece nona itavi.

Na nomu bisopi e rairai ni tu vua na kaukauwa tawaoti, ia na liutaki ni dua na tabanalevu e rawa ni vakavu wawale! E dau cakava nona vinaka taucoko, ia eso na gauna e gadreva na veivuke. Oqo e lima na sala ko rawa ni vukei nomu bisopi kina me vukei iko:

Masu baleti koya. Na veikacivi nei bisopi e rawa ni tovolea na iyalayala ni kaukauwa ni nona vakasama, yalona, kei na yagona. E gadreva o koya na kaukauwa ka rawa ga ni solia na Kalou ia oya e rawa ni lako mai ena nomu vakabauta kei na masu (raica na Jemesa 5:16).
Vakabauta na ilesilesi O tokoni koya ni nomu bisopi, ia na nomu veivakabauti e sega sara ni tiko vua na tamata; e tiko ena nona ilesilesi se veikacivi ni bisopi ka ena Kalou ka kacivi ka tokoni koya. O na rawa ni vakaraitaka vakacava na nomu veivakabauti? Mo yalorawarawa mo vakayacora nomu veikacivi kei na itavi. Ni ko laki sotavi bisopi, lako vakarau—masu, lolo ke gadrevi, ka vakaisulu matau me vakaraitaka nomu vakarokoroko vua na Turaga. Vakananuma vinaka nona ivakasala. E matataka tiko na Turaga.
Mo kilai koya Mo saga mo rawa ni kilai koya. Tarogi koya baleta nona bula, veika mai daku ni bula, kei na ka sotavi. Laiva me kila ni ko vakavinavinakataka nona veiqaravi ka ni ko vakabauta nona rawata me vakayacora nona itavi. (raica na 1Cesalonaika 5:12-13.)
Kua ni vakawalea E via vukei iko nomu bisopi, ia ke tu nomu leqa ka rawa ni walia na nomu ivakavuvuli e vale, e dua na daunivakasala nei bisopi, se peresitedi ni ISoqosoqo ni Veivukei se kuoramu ni italatala qase, mo lako eliu vua. Na nodra veikacivi e tu ena dua na vuna! Era tu mera vukei iko ka mera vakatara na bisopi me vakanamata ki na veika e rawa ni cakava ga o koya.
Laivi koya me vaka ga na tamata. Ena rairai beka ni a buli ga mai nomu bisopi ki na nona veikacivi, e sega ni vinaka taucoko. E dau vakatitiqataki koya, ka vakayaco cala. Ia lomani iko dina ka solia kece na ka tu vua ki na nona ilesilesi. Dolava na yalomu vua. Na kena levu ni nona kilai iko kei na nomu ituvaki, na kena levu ni nona rawa ni vukei iko.