Na Kalougata e Tiko ena We ni Ligai Tinaqu
Douglas Hedger
Nevada, USA
Droini mai vei Dilleen Marsh
Dua na yakavi au a vakasamataka tiko na itukutuku cava meu tukuna ena dua na koniferedi ni tabanalevu sa roro tiko mai. Au a vulica tiko na ivolanikalou ena macawa taucoko, ka dina ga niu sa ciqoma oti tu na ivakasala cecere ka vakararamataki, se bera tikoga ni matata vei au na ivakasala ni Turaga, vaka-peresitedi ni iteki, meu wasea vei ira na lewenilotu ena tabanalevu.
Niu sa masu ena vu ni yaloqu, au a kerea na veidusimaki ni Yalo ki na noqu vakasama. Au sa qai cereka na ivolanikalou ka tekivu wiliwili tale. A vagolei sara na noqu vakasama ki na lalawa ni tabanalevu keirau a veivosakitaka oti kei bisopi. Dua vei ira na lalawa oqori o ya me vakayagataki na Vunautaka na Noqu Kosipeli ena gauna e wasei kina na kosipeli vei ira na tamata.
Sa uqeti kina na yaloqu meu sa na vulica na Vunautaka na Noqu Kosipeli ena yakavi o ya Au a taura mai e dua na kena ilavelave ka cega e dua na tabana. Ena tabana o ya, au a raica kina e rua na ivolanikalou e dua a vola tu—1 Nifai 8:8–11 kei na 1 Nifai 11:21–22. Niu raica yani vakavoleka, au a qai kila ni a volai tu na ivolanikalou e rua oqo ena we ni ligai tinaqu. Sa takali oti yani o tinaqu lomani ena vica na yabaki sa oti, ni oti e rua na vula enai ka 80 ni nona siganisucu. A vakaraitaki vinaka ni yaloqaqa ka dauveinanumi, ka raica ga na ka vinaka vei ira na tamata. Ka dau taleitaka na ivolanikalou.
Au a dolava na ivolanikalou ki na tikina o ya meu raica na ka a uqeti kina me vola. Niu sa wilika, a tadola na noqu vakasama ki na itukutuku meu na tukuna. A rawarawa toka ga na itukutuku ni o ira na lewe ni Lotu era sa tovolea oti na kamica ni vua ni kosipeli era na guilecava ena so na gauna ni vuqa era vakasaqara tiko na vuanikau vata ga. Sa gadrevi kina meda gole yani ka laki tukuna na vanua mera kunea kina.
Au nanumi tinaqu lomani niu vakadigova vakataucoko na vo ni Vunautaka na Noqu Kosipeli. A sega na yaca, sega tale ni dua na itukutuku, se dua tale na ka me vakatakila ni nona na ivola o ya. Au dabe ena qoroqoro niu vakananuma na veisemati tiko ni veivakauqeti vakayalo e veimuataki ki na gauna oqo. A vakadeitaka vei au na Yalo ni a dusimaki na noqu vakasama, me vaka ga na noqu a masulaka tiko. Sega ni kila o tinaqu, ni nona a vola na ivolanikalou o ya ena vuqa na yabaki sa oti, ni na mai vakayagataka na Turaga me isau ni masu malumalumu nei luvena.