Yaloka, iTataqomaki, kei na Vakabauta

Alvaro Alcaino

Antofagasto, Chile

E dua na neitou iyacoyaco vakavuvale me keitou maroroya na ilavo e rauta na imatai ni sausaumi ni neitou vale vakai keitou. Ni sega na iyacoyaco oya, au rawa ni vakaotiya wale noqu mua ni macawa ena sara iyaloyalo, me waraka na madigi vakailavo me lako mai vei au.

Niu draiva ni kabani ni kelikeli ena vualiku kei Chile, au dau cakacaka tani mai vale me va na siga ka dau tolu na siga ni cegu—Vakarauwai ki na siga Monite. Me kuria na neitou ilavo kei na mamaroroi ki na dua na vale, keitou lewa me tekivu volitaki yaloka. Sa neitou ituvatuva me keitou tauri ota mai vei ira na itokani, tuvoleka, kei na lewe ni Lotu; volia a rauta ni 1,000 na yaloka e veimacawa mai vei dua na dauvolivolitaki levu, ka kauta ka veisoliyaka na yaloka ena Vakarauwai kei na Monite.

Keirau lewa kei na watiqu, o Laura, ni keirau na kauti luvei keirau lalai e rua ena veisoliyaki ka marautaka na gauna vata. Ni keitou lako tiko ena imatai ni voli yaloka, ea yaco na leqa. E dua vei rau na luvei keirau, e qitotaka tiko e dua na icivi ni penikau kaukamea, kolotaka yani na icivi ka lutuka donu na ivakawaqa ni tavako lala tu. E cacakubukubu na caudre, ka boko vakadua na livaliva ni motoka, ka mai kele tu yani e lomadonu ni sala levu. E sa kacabote na itataqomaki.

Ni keitou dabe vakaoso gaunisala tu ekea ka vakanananutaka na ka me caka, keitou lomacuruoso ka via tagi. Ia ena gauna sara ga oya, au nanuma ni yalataka na Turaga me laveti keda ka vukei keda kevaka eda vakararavi Vua. Ea qai lutuki au e dua na yalomaravu. Au kila ni sega ni dodonu meu dabe tiko ekea ka vosakudrukudru. Sa tu e dua neitou leqa, ia e na veivuke ni Kalou, keitou na walia.

Keirau veiraici kei Laura ka kaya, “Daru vakaraitaka na Vakabauta.” Keirau cavuta e dua na masu ka qusi wai ni mata. Ni oti, e uli o Laura, kau biliga na motoka. Eso na tamata era sobu mai nodra motoka ka mai vukei au.

Keimami bili me rauta ni 200 na mita ni bera ni kune e dua na vanua galala mai na gaunisala me kele kina na motoka. Ni qiqi yani me laki kele na motoka, au raica ni kei tou laki kele e mata ni dua na sitoa ni sitirio ni motoka.

Au kunea na itataqomaki kama, curu yani ki na sitoa, ka taroga, “E tu beka vei kemudou e dua e vaka oqo?”

E tukuna mai na dauvolivolitaki, “E tiko dina.”

Au volia e dua na itataqomaki ka vakacobara, ea tekivu sara na motoka, ka keitou gole yani. Na dauvolivolitaki levu ni yaloka e se voleka sara tiko ga ni sogo ni keitou yaco yani. Keitou volia na yaloka ka vakayacora na veiwaseyaki.

Ni dau tu na bolebole, e gadrevi meda nanuma meda kerea na veivuke mai vua na Tamada Vakalomalagi. Au kila ni na sauma mai ni da toso ki liu ka vakaraitaka noda vakabauti Koya.