Bulago ena Noda Vanua
E Rau Kune Kalougata e Dua na Veiwatini e Viti ni Rau Veiqaravi ena Kaulotu
Rau a ciqoma o Alipate kei Anaisi Tagidugu mai na koro o Davetalevu e Korovou, e dua na veisureti enai ka 14 ni Noveba, 2016 me rau laki kaulotu vakaveiwatini.
Ni sa roro tiko mai na gauna me cegu kina o Alipate ena itutu ni peresitedi ni iteki, a laki raici rau yani vakaveiwatini o peresitedi ni kaulotu ka kerea ke rau rawa ni la’ki veiqaravi “vaka-lewenilotu ka iliuliu veitokoni” (LLV) ni kaulotu ena tabanalevu o Korovou. Ena ilesilesi oqo rau sa na dauveituberi, qasenivuli ka itokani vei ira na lewenilotu kei ira na wekadrau e kea rau na veiqaravi kina.
Sa dua na ka na nodrau marautaka na ilesilesi oqo ena vanua a bisopi taumada tu kina o Alipate ena vica na yabaki sa oti. “Au dau lomana tu ga na vanua oqo,” a kaya o Elder Tagidugu. “O ira na lewenilotu eke era sa vaka tu ga mera luvequ.”
A tomana kina o Anaisi, “Sa dua na ka totoka meda qarava e dua na kaulotu ka vakaitikotiko ga ena nomu vale dina; moce ga ena nomu loga dina ni sa vinaka cake sara oqo.”
“Eso na turaga kei na marama qase lewenilotu era nanuma ni ra sa sega ni ciqomi mera kaulotu baleta ni ra sega ni ceguva rawa mera laki kaulotu,” a kaya o Sister Tagidugu, “Io, e dina sara ni gadrevi kina na solibula eso, ia keirau sa raica ni ko sasagataka nomu vinaka taucoko, ena vakarautaka na Turaga na kena sala.”
E rau “painia” ena lotu o Elder kei Sister Tagidugu. “Keirau sa ikalima ni veiwatini qase lewenivanua e Viti me kaulotu e Viti, ia eda sa gadreva tu e vuqa na veiwatini qase era na solia na nodra gauna kei na taledi ki vua na Turaga,” a kaya o Alipate.
Rau a sotava mai liu na veiwatini oqo na tauvimate eso oka kina na (sele ni utoi) Alipate ena 2004, ia rau sa vakila tu na kena sa mai maravu laivi na veitauvimate oqo ena nodrau sa qarava tiko nodrau veikacivi. Sa nodrau nanuma kina, “Kevaka mo na cakava e liu na cakacaka ni Turaga, ena qai karoni iko o Koya.”
Na nodrau ivakasala vei ira na veiwatini gone era sa vakasamataka tiko mera laki kaulotu ni ra sa qase, “Mo sa vakavakarau rawa yani oqo—nomu vakasama, yagomu kei na veika vakailavo.”
Sa roro tiko mai na gauna me sa cava kina na 18 na vula ni nodrau kaulotu na Tagidugu ka rau sa na tomana me 18 tale na vula, me sa qai tolu kina na yabaki veitarataravi ni nodrau veiqaravi vakaveiwatini qase daukaulotu.