iTukutuku ni Veiliutaki ni iWasewase

Vinaka, Vinaka Cake, Vinaka Duadua

Maivei Elder Meliula Fata

E rau sa vakacerecerei raraba tu o Wilbur kei Orville Wright ena nodrau a imatai ni tamata me bulia na imatai ni waqavuka me vakatabana e vuravura ena kena a vuka rawa ena kena iuli, idini kei na kaukauwa me 12 na sekodi enai ka 17 ni Tiseba 1903. A vukaca rawa na waqavuka oqo e 120 na fute (37 na mita), e tautauvata ni veimama na balavu ni 747 Jumbo Jet. Ia ki na ivakatagede nikua, sa lekaleka sara ga na vuka o ya, ia ena gauna o ya sa dua na rawa-ka qaqa e lewe vica ga era a vakabauta ni na rawa ni yaco.

Rau a vakavulica na itubutubu nei Wilbur kei Orville na bibi ni rawati na vuli, lotu, cakacaka kaukauwa kei na iyavubula ni matavuvale. Rau a sotava talega na veitacini oqo na mate ca bibi. Rau a curuma talega na veileqa eso, vakakina na lomaocaoca, ka rau dau vakasamataka tu na nodrau rawa ni bulia se sega na imatai ni waqavuka. Rau a dau vakatovolea me rau dautaba ivola, ripea basikeli, buli basikeli, ka yaco sara me rau isevu ni buli waqavuka.

Ena gauna rau dau digitaka kina e dua na cakacaka me rau cakava, rau a dina kina ka cakacaka vakalomavata; ka rau tekivuna mai vale. Rau a yalomalua ka vuku sara ena nodrau ciqoma ka vulica na nodra cakacaka na daubuli-ka era sa mate yani. Ka rau dau walia na leqa ena vosa ena vosa, vunau ena vunau.

Rau a qai kila rawa na veitacini ni tolu tiko na veika bibi e vinakati me vuka rawa kina e dua na misini:

1. Sa na gadrevi vei pailate me lewa tiko na kena vuka na waqavuka.

2. Na tabana me na vakavurea na vuka.

3. E dodonu me vakaigutaki ena dua na idini me rawa ni tiko ga kina e maliwa lala.

Rau sa mani taura o Wilbur kei Orville na ivakavuvuli oqo me nodrau idusidusi me rau lewai ka vakaivakarautaki kina ena veika kece rau na cakava me rawati kina na nodrau lalawa.

Sa tautauvata vakakina na ivakavuvuli kei na veika e gadrevi ki na noda ilakolako ena bula oqo ki na kena icavacava o ya na bula tawamudu. Ena gadrevi me vulici, cakacakataki ka bulataki na ivakavuvuli vakalou ni ko vakavakarau mo tubu ka vakavurea e dua na ‘veilaveti’ ki na nomu bula vakai iko. Me yacova sara ni ko sa kila vinaka vakayalo o iko o cei sa na qai rawa mo tekivu lewai iko kina vakavinaka. Ni ko sa vulica mo lewai iko vakavinaka, sa na qai rawa mo lewa na nomu bula vakai iko. Ke o vinakata mo tosoi vuravura, ena gadrevi mada e liu mo tosoi iko vakai iko.

Rau a yalonuidei na veitacini na Wright ni na rawati e dua na waqavuka e vinaka cake mai na kena rau a isevu ni bulia, ka rau vakadinata ni na vuka tiko vakabalavu cake e maliwa lala mai na 12 na sekodi!

Na veisau mai na isevu ni waqavuka maivei rau na Wright ki na veiwaqavuka totolo sara nikua sa veivakauqeti dina. Na waqavuka levu na Airbus A380 a sevutaki na kena vuka ena Epereli ni 2005—e rauta ni ra dabe rawa kina e 800 na pasidia ka rawa me vuka vakabalavu ka sega ni cegu ena 18 na auwa.

E vuqa na gauna, ni da sa lomavinaka ka yalo vakacegu tu, eda sa tu ga kina vakadua ka sega ni saga meda vinaka cake ena noda vakatorocaketaka ka vakavinakataka [laveta cake] na noda bula. A vakaroti Pita o Jisu ena Nona kaya; “Ia ni ko sa saumaki tale mo vakataudeitaki ira na wekamu” (Luke 22:31–32).

Ni da sa cakacakataka tiko meda vinaka sara, sa na gadrevi meda veisautaka na noda itovo. Ke da sega ni veisautaka rawa na noda itovo, era sa na yaco mera ituvaki ka tiki ni noda bula. Sa raica oti rawa tu na iVakabula na gugumatua qaqa sa tu vei Pita—ia vakavo ga ke na veisautaki koya o Pita, ena sega ni rawa vua me vukea eso mera saumaki mai.

Na cava eda sa vulica rawa ena yabaki oqo ena noda ilakolako ni bula vakai keda yadua? Na veisau cava eda diva tu meda cakava me vakaraitaka ni da sa tubu tiko vakayago ka vakayalo—mai na vinaka ki na vinaka cake ki na vinaka duadua? Na cava eso na vakabauta makawa kei na itovo vakavanua eda sega ni lako tani rawa mai kina se na sega ni veisautaka?

Dua na siga, au a draiva tiko mai Samoa kau a kele sara me vodo e dua na turaga a colata tiko e dua na iyaya bibi. A vodo sara mai muri ni lori kei na nona iyaya kau draiva sara yani. Ni oti vakalailai au a rai yani ena iloilo ni rai ki muri kau a kurabui ni tucake tu na turaga oqo, ka se colata tu ga na nona iyaya bibi. Au a nanuma ni na biuta e ra ena lori na nona iyaya, me qai dabe sobu ka vakaceguya na tabana me yacova niu sa na laki vakasoburi koya ena nona koro.

Eso na gauna na noda “biuta laivi” na itovo vakavanua kei na ivakarau makawa e veisaqasaqa ki na ivakavuvuli ni kosipeli sa dua dina na ibolebole levu kivei ira era lewena mai na Lotu.

E tiko eso na itovo vakavanua kei na ivakarau makawa ena rawa me tarova na noda toro cake ka tubu cake mai na vinaka ki na vinaka cake, se vinaka cake ki na vinaka duadua. Na kosipeli i Jisu Karisito e vakavulica vei keda na ivakavuvuli vinaka duadua me vukea noda veisautaka na noda bula.

Na nona vodo ena mua imuri ni noqu lori, a sega ni vakasamataka na tagane o ya ni nona biuta sobu e ra na nona iyaya ka dabe sobu sa ka vinaka duadua me na cakava.

Vakasamataka mada eso na ivakavuvuli ni kosipeli oqo e rawa ni vakavurea e dua na veilaveti vakayalo ki na noda bula: vakabauta, yalomalumalumu, veiqaravi, veivutuni, loloma, masu, veivosoti—oqori e vica ga. E rawa ni vukei keda meda cakava na veisau e tudei mai na vinaka ki na vinaka cake ki na vinaka duadua.

Sai ira oqo na ivakavuvuli ni veivakabulai, era sa lawa ni silesitieli. Kevaka eda na sega ni rawa ni muria na lawa oqo, ena sega ni rawa meda la’ki tiko ena lagilagi kei silesitieli. (V&V 88:22)

A sevutaki na nodrau ilakolako ni vuka na veitacini na Wright ena dua na ivakarau ni yalomalua. Dina ni rau a sotava e vuqa na ibolebole, na nodrau bula e rau vakadinata tu—ni sega ni ka bibi na vanua rau a tekivu kina—ia ki na vanua me rau laki tini kina.

Ni da raicamatua na veika lalai ka rawarawa ni bula oqo ena kauti iko yani ki na veika cecere. E vuqa na tagane kei na yalewa cecere era a tadu mai na itekitekivu ni ivakarau yalomalua; ka ra sega ni yaco ga mera tamata vinaka, ia era a saga vagumatua sara mera vinaka duadua.

A tekivuna na Nona bula na noda Turaga o Jisu Karisito ena ivakarau yalomalua. A sorovaka na noda ivalavala ca ka a dolava na katuba vei keda meda na bula vakacerecerei kevaka eda na maroroya na Nona ivakaro.

Na Veisorovaki i Jisu Karisito ena sega vakadua ni sosomitaka na noda ilesilesi o ya meda maroroya na ivakaro, me rawa kina meda bula vakacerecerei. Sa vakaraitaka kina vei keda na iVakabula na sala vinaka duadua meda lesu rawa ka laki bula vata kei Koya kei na Tamada mai Lomalagi. Meda sa qai dui tekivu cakacakataka mai vale ka dinata meda yaco meda luvena tagane se luvena yalewa na Kalou eda yacova rawa.