Bulago ena Noda Vanua
Na Yalololoma sa Lawa Vinaka Duadua e Veigauna
Dua na gauna lekaleka sa oti a vakatawa waiwai tiko ki na nona lori ena dua na igunugunu ni benisini o Api Tuitubou ka gunu wainimoli tiko, ka sa gole mai vua e dua na qase kei na tolu na taga e tubera tiko mai e vaka era tiko kina na kakana draunikau kei na kakana tale eso.
A tukuna sara na qase oqo ni sa waraka tu mai ena ono na auwa na basi, ka sa kerea sara, “E rawa beka ni ko vakavodoki au yani; ni sa na vukei au sara vakalevu.”
“A luluvu sara ga na yaloqu vua na qase sa vakalairoro oqo, e dara toka e dua na sote vulavula ciqimaki vinaka ka vakaivava e boro toka ka sa mai kerea oqo na noqu veivuke. Au sa kila tu niu na vukei koya,” a kaya o Api.
Ni rau sa biubiu mai, sa qai kila o Api ni turaga oqo sa yabaki 79 ka gole mai na yasana o Naitasiri.
Ni tarogi na vanua cava me na sobu kina, a galu tu mada a qai vosa cake mai na turaga oqo, “Sa rua na yabaki oqo na noqu sega tu ni raici luvequ yalewa; e dau raici au niu tamata dredre sara. Baleta ga na neirau duidui ni vakasama, sa mani gole tani kina maivei au.”
“Au sa qase tiko mai, kau sa gadreva meu raici koya kei iratou na makubuqu. Au nuitaka ni keirau na walia na neirau duidui ka guilecava ni bera niu mate.”
Sa qai draiva yani o Api kei nona pasidia ena ilakolako ki na vale nei luvena yalewa na turaga oqo. Ni rau sa kele yani, sa vaka me lomalomarua o itokani vou nei Api ka sa tekivu “yalolailai” ka sa sega ni douvaka me vakavinakataka na veimaliwai sa mai kavoro tiko.
A vakauqeti koya o Api, ka yalataka vua ni na waraki koya ke mani sega ni yaco e dua na ka vinaka, a qai laveta yani na qase oqo na nona usana bibi ka sobu yani.
“A tara mai e lima, na noti $5.00 ka kaya vei au ni sai koya ga o ya na ilavo sa tu vua ka nuitaka me isau ni ilakolako o ya,” a nanuma lesu o Api. “Kua ni leqa mata—au marautaka noqu vukei kemuni,” a sauma o Api.
Ni rau sa tucake tu na lewerua oqo, a cici mai nona vale na luvena yalewa na turaga oqo ka mokoti tamana. Sa waicala na rarawa ni yalo, cudru kei na duidui ni sa yaco na veitagicaki vei keitou taucoko.
“Sa lekaleka sara na bula me vakatarai kina na cudru, mavoa kei na yalorarawa me mai voroka na noda matavuvale,” a kaya o Api. “Kakua ni laiva na siga me dromu ni tiko na duidui eso.”