Na Noda Veitokoni

Maivei Peresitedi James E. Faust (1920–2007)

iKarua ni Daunivakasala ena Mataveiliutaki Taumada

Mai na dua na vosa ena koniferedi raraba ni Okotova 2005.

Na veivakarautaki levu ni veidusimaki vakayalo sa na vakatau tiko ki na lomavata tiko kei ira na … parofita, daurairai, ka daunivakatakila.

iVakatakilakila

raised hands

Au gadreva meu vakamacalataka mada na nodra ilesilesi tabu na iliuliu ni matabete oqori era sa “kacivi ka digitaki” (V&V 55:1) me dusimaki kina na Lotu ena siga edaidai. …

… E sega tale ni vakabekataki ni o ira na noqu Veitacini [ena Kuoramu ni iApositolo Le Tinikarua], era sa tamata vinaka, dokai, ka nuitaki vakaidina. Au kila na yalodra. Era sa italai ni Turaga. Sa nodra gagadre ga o ya mera cakacaka ena nodra veikacivi cecere ka tara cake na matanitu ni Kalou e vuravura. O ira na Veitacini era sa veiqaravi tiko edaidai ena gauna oqo era sa vakadinadinataki, vakatovolei, ka dina sara. … Sa savasava na yalodra, era sotava na veika cecere, sa gata sara na nodra vakanananu, ka sa titobu na nodra vuku vakayalo ka dau veivakacegui ni da maliwai ira.

… [Ena gauna au sa kacivi kina, au a vakasalataki] ni ka bibi duadua meu na vakayacora o ya meu na duabau kei ira na Veitacini. … Na kena irogorogo e vaka e dua na ka au via vakayacora ena yaloqu taucoko.

… Au a vakadeitaka ni veidusimaki vakayalo e rabailevu sara ena vakatau tiko ki na duavata kei koya na Peresitedi ni Lotu, na Mataveiliutaki Taumada, kei na Kuoramu ni Le Tinikarua—o ira kece oqo era sa tokoni—me ra parofita, daurairai, ka dauvakatakila. Au sega ni kila me da na rawata beka vakacava me da lomavata vakavinaka sara kei na Yalo ni Turaga kevaka eda na sega ni da lomavata vakavinaka sara kei na Peresitedi ni Lotu kei ira na parofita, daurairai, kei ira na dauvakatakila tale eso. …

Sa noqu ivakasala vei keda na lewe ni Lotu o ya meda tokoni koya na Peresitedi ni Lotu, Mataveiliutaki Taumada, Kuoramu ni Le Tinikarua, kei ira na Vakaitutu Raraba tale eso ena lomada kei na noda bula taucoko. Kevaka eda na vakayacora, eda na vakarurugi ena toba taqomaki. …

Sa gadrevi talega meda duavata ka tokoni ira na noda iliuliu baleta ni ra sa “kacivi ka digitaki” talega. O ira taucoko na lewe ni Lotu sa rawa me ra vakasalataki mai vua e dua na bisopi se peresitedi ni tabana, e dua na peresitedi ni iteki se tabana ni kaulotu kei koya na Peresitedi ni Lotu kei ira na nona ilawalawa. E sega ni dua vei ira na veitacini oqo a kerea me kacivi. E sega ni dua e vinaka sara. Ia sai ira ga na italai ni Turaga, ena Nona veikacivi vei ira era sa vakadonui ki na veivakauqeti. Sa dodonu meda tokoni ira, o ira era sa kacivi, tokoni, ka tabaki.