Vakatavulici mai na Yalo Tabu

O ira na itabagone oqo era vakavakarau mera vakatavulici mai na Yalotabu ni bera na koniferedi raraba. Oqo na ka era vulica mai na koniferedi eliu kei na ka duidui era cakava ena vuku ni ka oya.

iVakavuvuli Vakauqeti

Au a vakauqeti mai na koniferedi raraba. Niu vakarorogo tiko ki na ivakasala mai vei ira na iliuliu me qaravi ira na tani, raviti Karisito, ka tautauri matua ki na ititoko kaukaumea, au a vakila na Yalo Tabu ni vakadinadina vei au ni dina na kosipeli oqo ka rawa meda taukena na bula tawamudu ni da maroroya na ivunau ka muria na vosa ni Kalou. Au sa tuva na iyacoyaco meu veiqaravi vakalevu cake ena noqu itikotiko ka meu vakaukauwataka noqu ivakadinadina mai na masumasu ka wili ivolanikalou e veisiga. Au kila ni oi au e dua na luvena goneyalewa na Tamada Vakalomalagi. E bula tiko O Koya ka lomani au tikoga ka tawayalani.

Madelyn B., yabaki 16, Delaware, Amerika

iSau ni Vakatataro

Ni se bera na koniferedi raraba ea rua tiko noqu taro: (1) E rawa vakacava niu yalo vinaka ka vukei ira noqu itokani ni ra vakatulewa cala? kei na (2) E rawa vakacava niu vakadinadinataka na Lotu ka mera kakua ni vakalialiai au? Ena koniferedi, ea vakadinadinataka vei au na Yalotabu ni sega ni koi au taudua. Oqo au sa qai kila niu sa vulica na ivolanikalou e lomaqu taucoko, au na ciqoma na isau ni noqutaro baleti ira noqu itokani. Au kila ni Tamaqu e vakarogoca noqu masu, kau na segata meu vinaka cake ena veisiga yadua.

Isaak R., yabaki 13, Pinchincha, Ecuador

Vakarau me Vuli

Au vakila vakaukauwa na Yalotabu ena koniferedi raraba. Me tekivu mai na noqu vakarautaka na taro eso ka vakarautaki au vakayalo ki na koniferedi, esa kauti au ki na ibalebale duatani sara ki noqu bula, kau rawa ni vuli vakalevu sara mai na vosa yadudua. Au sa vakavinavinaka vakalevu baleti ira na parofita kei na iapositolo, kau kila ni ra talai mai vei Tamada Vakalomalagi mera liutaki ka tuberi keda ena noda bula.

Ben H., yabaki 17, Kentucky, Amerika

Sureti me Tubu

Na koniferedi raraba e vakaukauwataki au ena marautaka na muria na sala vakosipeli i Jisu Karisito. E vukei au meu kila ka macala vei au ni oqo na Lotu dina, ka kauta mai vei keda na rarama kei na mamarau. Au vakila ni sureti au na Yalotabu meu tubu e veisiga ka meu wilika na iVola i Momani meu rawata na ivakadinadina kaukauwa ni kosipeli. Au vakabauta ni vinakata na Tamaqu Vakalomalagi meu vakarogoci ira na itukutuku vakauqeti oqo.

Vincente A., yabaki 16, Metropolitan Region, Chile

Vakasaqara tiko na Rarama

Na yabaki ni se bera ko koya sa oti ea veibolei vei au. Ea valuta tiko na kenisa ko tamaqu, ka ra ravuta tiko na dauvakacaca na noqu koro. Au vorata na lomabibi, ka vakananuma seu na vakila rawa vakacava na vakacegu niu taqayataka noqu taqomaki vakayalo ka vakayago. Mai na koniferei raraba au vulica kina ni rawa ni da kune vakacegu ni da bula savasava, vakatawa na lomada ena vakabauta, ka taura na rai tawamudu. Au a vakauqeti meu vuki vei Karisito ena gauna ni dredre me isosomi ni noqu vakanuinui ki na noqu kila vakai au. Au kila niu rawa ni ulabaleta na cakacaka ni butobuto niu raica tiko na serau ni rarama nei Karisito.

Olivia H., yabaki 17, Belgium