Na kena Veisoliyaki Yani na Loloma ni Kalou
Ena dua na gauna lekaleka sa oti keitou toki mai vakamatavuvale ki Kentucky. Au sa rarawa sara niu sa na biuti ira tu mai na noqu itokani kei na wekaqu. E duatani sara o Kentucky mai na kena sa matau tu vei au. Ena matai ni gauna keitou gole kina ki lotu, au raica ni sega ni levu sara na tamata era tiko. Niu sa raica na kena lailai na noqu tabana, au sa nanuma sara meu sa kua ni vakasamataka vaka ca, kau sa na saga meu cakava kina e dua na ka.
Na siga ka tarava, keirau lako vakaveitinani kina sitoa. Ni se bera ni keirau biubiu, au taura mai eso na kadi e dau veisoliyaki. Ni keirau sa yaco ena sitoa, au taura mai e dua na loli kau sa gole sara meu sauma. E vakaraitaka mai vei au na yalewa cakacaka na isau ni loli, ka solia mai vei au. Au solia tale yani vua. E veilecayaki na kena irairai ka kaya mai, “O se qai sauma ga oqo, kemuni.”
Au kaya yani, “Au sa kila, kau sa solia tale tiko yani vei iko vakailoloma.” Kau sa mani biuta vata yani e dua na kadi dau veisoliyaki. E dredre mai ka vakavinavinakataki au. E raica yani na daku ni kadi dau veisoliyaki, kau sa vola tu kina ni, “Eda luve ni Kalou kece.” Au lako yani ena marau, niu kila tu kevaka madaga e sega ni lewena o koya na Lotu, au sa vakayacora e dua na ka vinaka.
Ena dua tale na gauna ena siga oya, au kila niu a biuta tu na vo ni kadi dauveisoliyaki ena vanua ni sausaumi! Na gauna tarava au qai lako yani ki na sitoa, au vakataroga kevaka e se tikoga ekea. Au qai raica e dua na ka, kau mai tu yani vakadua. E lima tale na misini ni sausaumi e tiko kina na kadi dauveisoliyaki ka tukuni tiko kina, “Eda luve ni Kalou kece.” E sa veisoliyaka yani o yalewa cakacaka! Au sa marau sara vakalevu baleta na veika kece au cakava.