Fet, Hop, mo Gladhat—Pat 3
Hop long Holan
Hem we i raet i stap laef long Niu Jesi, YSA.
Grace i wan gel we i gat 15 yia, we i stap laef long Holan long taem blong Wol Wo 2. Wo i finis longtaem finis. Ol pipol long Holan oli bin stap ded hanggri, mo oli bin hop se wo bae i finis i no longtaem.
Las yia blong Wol Wo 2, i bin mowas long Holan. Ol Nasi oli stap tekem evri samting. Grace i no save go long skul. I no gat jakol blong mekem haos i hot. Grace mo famli blong hem i mas kakae top blong tulip flaoa blong mekem se oli no hanggri. !Oli no tes gud nating! Antap long hemia, Papa i stap yet olsem wan prisena blong wo.
Be hop i bin stap. Ol pipol oli talem se Ol Nasi oli lusum wo. Mo long Mei blong yia 1945, Ol Nasi oli sarenda. !Holan i fri bakegen! Ol pipol oli bin selebret long ol smol rod. Naoia, Grace i save go long skul. I no gat soldia blong stap fraet long olgeta.
Wanem i bin gud, i we, wan dei, taem Grace mo ol brata blong hem oli aot long skul oli wokbaot i gobak hom, oli bin luk flag blong Holan we i stap flae long fored blong hom blong olgeta. Oli bin save se hemia i minim wan samting nomo.
“!Papa i kambak hom!” Heber i singsingaot.
Grace mo ol brata blong hem oli ron i go insaed. Grace i sakem han blong hem raon long Papa blong hem, mo haggem hem strong. Hem tu i haggem Grace. I gud tumas blong gat Papa i kambak hom.
I no longtaem afta, ol katen blong kakae, klos, mo meresin oli kasem Holan. Ol lida blong Jos long Sol Lek Siti, oli bin sendem plante samting i kam blong helpem ol pipol afta long wo. !Grace i gat wan niu dres! Hem i bin werem wan dres ia nomo blong faef yia, mekem se Hem i glad tumas blong gat wan niuwan.
Blong fas taem afta long plante yia, Grace i gat inaf kaekae blong kakae. Misin presidensi mo gavman blong Holan, oli disaed blong statem wan poteto projek blong save planem moa kaekae. Ol memba blong Jos oli bin planem plante poteto long ol garen kolosap. Long taem blong pikimap kakae, bae i gat plante taosen poteto blong kakae.
“Luk!” Grace i talem long Papa, mo semtaem i soem poteto we i stat blong gro. “!Bae yumi nomo hanggri bakegen!”
Papa i saksakem hed blong hem blong agri be i no smael. Hem i se, “Mi bin stap toktok wetem Presiden Sapi. Oli talem long mi se Ol Lata-dei Sent long Jemani, oli stap hanggri yet, semmak olsem yumi. Olgeta oli no kasem help we i kam long gavman, olsem yumi.” Papa i putum han blong hem raon long solda blong Grace. Presiden Sapi i askem sapos yumi save givim poteto blong yumi i go long olgeta Sent long Jemani.”
“!Givim poteto blong yumi!” Grace i krae. !Be Ol Nasi ia oli blong Jemani! “Maet oli Ol Lata-dei Sent, Papa, be oli Ol Man Jemani.”
Papa i talem: “Mi save se i no isi. “Be olgeta tu, oli ol pikinini blong God. Hem i lavem olgeta tu. Mi fogivim olgeta we oli holem mi olsem prisena. Lod i save helpem yumi evriwan blong fogiv.”
Grace i lukluk i go long Papa. Hem i man we i strong moa we Grace i save long hem; be hem i no save se, hem Grace, bae i gat strong paoa long tingting blong fogiv olsem we papa blong hem i bin mekem, o no. Nao, hem i tingbaot wan long ol tija blong hem long skul, long taem blong wo. Tija blong hem i bin talem se i no evri Man Jemani we oli Ol Nasi, mo i no evri Nasi soldia we oli ol nogud man. Mo naoia, ol boe mo gel long Jemani oli ded hanggri, semmak olsem Grace.
Grace i pulum gud win. Hem i talem: “Mi andastanem.” “!Ale, yumi givim ol poteto blong yumi!”
Papa i haggem Grace, mo i smael. “Yu wan strong gel. Hemia i no isi blong mekem. Be, yumi ol disaepol blong Kraes, mo i semmak wetem ol brata mo sista blong Jemani.”
Grace i smael. Ol filing blong kros oli lus long hat blong hem, mo hem i filim kwaet mo i harem gud insaed. Hem i save fogivim Ol Man Jemani. Mo Jisas i save helpem hem blong lavem olgeta tu.