Elda Ulisses Soares: Wan Man wetem Ones Fasin
Long ol fas dei blong seves blong Hem, taem we Jisas i bin stap jusum ol Aposol blong Hem, Hem i bin luk Nataniel i kam long hem. Kwiktaem, Hem i luksave se Nataniel i gat gud fasin, nao i talem “!Man ya i wan prapa laen blong Isrel ya! !Hem i no save giaman!”1
Jisas i bin save se Nataniel i wan man we hat blong hem i klin gud, i ones long ol tingting blong hem, mo i no gat tu fes long hem, o i no save giaman. Lod i laekem tumas kwaliti ia blong stap tru, mo stap stret mo gud, mo Hem i singaotem Nataniel i kam wan Aposol.2
Ulisses Soares i olsem Nataniel blong bifo, mo Sevya i bin singaotem hem tu.
“Laet blong Papa mo Mama blong Mi”
Ulisses Soares, hem i lasbon blong fo brata, i bon long Sao Polo, Brasil, long 2 Oktoba 1958. Hem i kamaot long wan hom we i no gat tumas samting, be papa mo mama blong hem, Apparecido mo Mercedes Carecho Soares, tufala i ol pipol we oli gudwan, tufala i wokhad, mo tufala i ones blong lisin long ol misinari. Tufala i joenem Jos long 1965 taem Ulisses i gat sikis yia.
“Mi neva luk Brata Apparecido i mestem wan miting,” Osiris Cabral i talem, we i bin stap olsem stek presiden taem we Ulisses i bin wan yang man. “Mercedes tu i bin fetful tumas. Ulisses i karem fasin blong papa mo mama blong hem, blong save wok wetem ful tingting.”
Ulisses Soares “i groap insaed long Jos, we i folem laet” blong papa mo mama blong hem, Apparecido mo Mercedes Soares (lef). Taem we Ulisses i trastem Lod i nomata long wanem we i kam agens, hem i bin lanem, taem hem i wan smol boe, blong hang strong long Sevya mo gospel blong Hem.
Gudfala hat blong Ulisses i kam bigwan taem we hem i bin stap lanem ol wei blong Lod. “Mi groap insaed long Jos, we mi folem laet blong papa mo mama blong mi,” Elda Soares i talem. Taem hem i stap folem laet ia, testemoni blong hem i gro strong moa nomata wanem we i bin stap kam agensem hem.
“Mi mi wan memba ia nomo blong Jos long skul blong mi, mo ol nara boe oli traem oltaem blong daonem mi, blong pusum mi blong mekem olgeta samting we oli rong,” hem i talem. “Mi bin lanem blong mi difendem miwan long ol jalenj ia, be oltaem, mi bin trastem Lod wetem evri hat blong mi blong helpem mi blong win long laef. Mi bin lanem, taem mi yang man, se taem yu mekem pat blong yu, bambae Lod tu i mekem pat blong Hem. Be yu mas holemtaet han blong Hem mo gospel blong hem.”
Taem Ulisses i gat 15 yia, bisop blong hem i bin askem hem blong tijim wan Sandei Skul yut klas. Wan lesen we hem i bin tijim i lukluk blong kasem wan testemoni abaot gospel. Ulisses i bin stadi long Buk blong Momon, mo i bin filim oltaem se Jos i tru, mo i bin biliv long Sevya Jisas Kraes.
Taem hem i stap rere long lesen blong hem, hem i bin wantem testifae strong long klas blong hem se gospel i tru. “Mi bin stadi mo prea strong,” Elda Soares i tingbaot. “Afta we mi bin nildaon, wan swit filing i kam long hat blong mi, wan smol voes we i konfemem long mi se mi stap long stret rod. Hem i strong tumas, mekem se mi neva bin save talem se mi no bin save.”
Taem Ulisses i gro i kam mo tingting i kam raep, hem i bin lanem se, sapos hem i mekem moa bitim wanem we oli wet se bae hem i mekem, o sapos hem i mekem moa bitim wanem oli askem hem, bambae Lod i blesem hem we i bigwan olgeta. Hem i lanem wan kaen lesen olsem taem hem i stap rere from wan misin. Taem hem i gat intaviu wetem Ulisses, bisop blong hem i tokbaot bigwan se i impoten blong stap obei long ol komanmen, mo blong stap laef long wan laef we i klin inaf. Hem i tokbaot bigwan tu, hamas i impoten blong stap rere long saed blong faenens.
Tedei, evri misinari blong Brasil oli pem sam mane i go long misin mane basket blong olgeta, mo i gat plante famli oli stap help blong pem mane blong sendem misinari long misin. Taem we Ulisses i kam kolosap long yia blong go long misin, hem i gat strong tingting se hemwan bae i winim evri mane we i nid blong hem i go long misin. Wetem gudfala strong fasin blong hem blong save wok we hem i bin lanem taem hem i bin wok long smol bisnis blong papa blong hem, mo wetem skil ia blong save taep hariap, Ulisses i faenem wan dei wok, mo stap helpem wan kampani blong mekem salari blong ol wokman.
Afta we hem i pasem wan strong eksam, hem i stat blong stadi akaonting long wan teknikel hae skul long naet taem. Evri manis, afta we hem i pem taeting, bae hem i sevem mane blong misin blong hem. Afta long wan yia, oli seftem hem i go long akaonting dipatmen blong kampani ia.
“Long wei ia nao mi sevem mane blong mi blong save go long misin,” Elda Soares i talem. “Mo evri manis, long ol trifala yia bifo mi aot, bae mi pem wan samting we mi nidim—wan sot, wan traoses, wan stoking, wan nektae, wan sutkes.” Hem i bin nidim, mo hem i bin kasem strong lav mo sapot long papa mo mama blong hem mo ol lokol lida.
Ulisses, oli bin singaotem hem long Brasil Rio de Janero Misin. Fas pat blong misin blong hem, hem i wok anda long Presiden Helio da Rocha Camargo, we afta, bae i kam fas Jeneral Atoriti we hem i blong Brasil, we oli bin singaotem. Ulisses i statem misin blong hem, eli long yia 1978. Fas tempol long Latin Amerika, Presiden Spencer W. Kimball (1895–1985)i bin dediketem kolosap long en blong yia ia long Sao Polo.
Long Jenuware 1980, Ulisses mo kompanion blong hem, we i no bin kasem endaomen blong hem yet, i jiam long wan bas long Rio de Janero, mo ron blong eit aoa i go long Sao Polo Brasil Tempol. Ol papa mo mama blong Ulisses, wetem ol brata blong hem, oli bin mitim hem longwe, mo Soares famli i sil blong taem naoia mo blong taem we i no save finis. Ulisses i neva fogetem ol faef aoa ia tugeta long Sao Polo Tempol. Samtaem afta long dei ia, hem mo kompanion blong hem i gobak long misin fil.
Stap Putum God Faswan
Ulisses i laekem tumas sakses long misin blong hem, we i bin mekem testemoni blong hem i kam strong moa. Taem hem i gobak hom, hem i faenem wan wok mo i stat blong stadi long akaonting mo ekonomik long wan lokol yunivesiti.
Hem i bin hom blong seven manis taem hem i fas long “Sista Morgado” long wan maltistek danis. Ulisses i bin stap oli eria lida blong hem blong wan smol taem, mo tufala i bin spendem naet ia blong tokbaot mo serem ol stori blong misin. Tri wik afta, tufala i stat blong deit.
Rosana Fernandes Morgado i bin gat eit yia taem bigfala sista blong hem, Margareth, i stat blong tekem hem i go long Jos. Long en, tufala fetful yang investigeta i kasem raet long papa blong tufala blong kasem baptaes, be wanwan i mas wet kasem taem oli kasem 17 yia. Rosana i kam long Jos blong naen yia bifo hem i kasem raet blong kasem baptaes.
Ulisses i bin laef long Not Sao Polo, mo Rosana i laef wetem papa mo mama blong hem long Saot saed blong taon. Blong travel krosem bigfala taon ia, i tekem tu o tri aoa long bas mo lektrik tren. I gud tumas we Margareth mo hasban blong hem, Claudio, i laef kolosap long hom blong papa mo mama blong Margaret.
“Taem Ulisses i kam long ol wiken blong deit wetem Rosana, i bin had blong hem i gobak longwe olsem long naet taem,” Elda Claudio R. M. Costa i talem. Hem i wan Jeneral Atoriti Seventi, mo i fiuja tawi blong hem. Mekem se, hem mo Margareth i invaetem Ulisses blong spendem naet long hom blong tufala afta we hem i go long deit. “Mifala i adoptem hem blong smol taem,” Elda Costa i ademap.
“Bae hem i slip long amjea long salong,” Elda Costa i talem. “Mifala i jes mared, mekem se mifala i no gat wan moa blangket. Be bae hem i kavremap hem wetem wan olfala keten we mifala i gat. Hem i bin hapi from se bae hem i save luk Rosana bakegen long nekis dei. Hem i bin gud long sista blong mi, mo papa mo mama blong mi i bin laekem hem tumas.”
Ulisses mo Rosana, tufala i bin mared long Sao Polo Brasil Tempol long namba 30 Oktoba 1982.
Sapos yu spendem sam minit wetem Elda mo Sista Soares, lav, gud tingting mo respek we tufala i gat long wanwan long tufala, bae i kam klia kwiktaem. Long Elda Soares, Rosana “i bin wan eksampol blong gud fasin, lav mo gat ful tingting long Lod, hemia long mi, mo famli blong mi.”3 Long Sista Soares, Ulisses i “wan presen we i kam long heven.”
Sista Soares i ademap: “Oltaem nomo hem i bin responsibol bigwan, mo hem i stret mo gud; oltaem hem i lukaotgud long famli blong mifala, mo oltaem nomo, hem i bin tritim gud mi tumas. Long evri koling blong hem insaed long Jos, hem i bin mekem bes blong hem. Hem i stap go, mo hem i mekem. Oltaem, hem i putum ol samting blong God i kam faswan long laef blong hem. Mi mi kam blong lavem hem, bakegen mo bakegen, from se mi save se sapos hem i putum ol samting blong God i kam faswan, bambae hem i putum mi tu, mi kam faswan.”
Abaot waef blong hem, Elda Soares i talem: “Hem i tru hiro mo insperesen long famli blong mifala. Hem i gat lav, hem i kaen, mo i gat longfala tingting wetem evriwan. Hem i stap joenem famli blong mifala, mo hem i luk gud samting long evriwan. Hem i givhan fulap long wanem i bin hapen long laef blong mi. Long saed blong koling blong mi long Kworom blong Olgeta Twelef Aposol, mi tokfani long hem mo talem: ‘Yu ia nao i mekem hemia from se yu mekem paoa blong gospel insaed long laef blong mi i kam bigwan tumas.’”
Wan Bigfala Hat
Gustavo, fas pikinini blong Soares famli, i tingbaot naet ia, taem we, taem hem i bin smol boe, hem i no bin obei long papa mo mama blong hem, mo i ronwe i go luk wan yia selebresen long Sao Polo, we oli save long hem olsem Festa Junina.
“Mi bin stap long medel blong wan bigfala grup blong ol man, mo mi stap gat wan gudfala taem, be mi harem anaonsa i singaotem nem blong mi se bae mi go long fored,” hem i talem. “Tetaem ia nao mi luk papa blong mi.”
Papa mo mama blong hem, tufala i bin wari tumas, be tufala i no rao long Gustavo, tufala i haggem hem strong.
“Mifala i toktok fulap long fasin ia we mi go lus, be papa mo mama blong mi i tritim mi wetem respek,” Gustavo i tingbaot. “Mi bin filim se tufala i protektem mi, mo mi bin save se tufala i rili lavem mi.”
Ulisses, hem i givim hemwan long famli blong hem. Nomata we wok blong hem i bisi, mo i travel fulap ova long ol yia, hem i mekem taem blong bildimap ol rilesensip blong hem wetem ol pikinini blong hem.
Taem oli sastenem Elda Soares i go long Kworom blong Olgeta Twelef Aposol long 31 Maj 2018, maet i no gat wan i sapraes moa bitim Gustavo mo tufala sista blong hem, Lethicia Caravello mo Nathalia Soares Avila. Be sapos fasin blong gat lav, stap wok had, save andastanem man, mo gat tingting i stap daon i mekem wan i kwalifae from wok blong wan aposol, nao tufala gel ia i talem se tufala i save andastanem from wanem Lod i bin singaotem papa blong tufala.
“Taem Jisas i bin singaotem Ol Aposol blong Hem, Hem i no jusum Ol Farasi we oli gat bigfala save, be Hem i jusum ol man blong pulum fis,” Lethicia i talem. Papa mo mama blong mi oli olsem nao. Tufala i trastem Lod fulwan, mo Hem i stap yusum tufala blong mekem wok blong Hem i kamtru from se Hem i save se tufala i no selfis, tufala i save wok had, mo tingting blong tufala i stap daon inaf blong save akseptem blong oli stretem tufala.”
“Bigfala hat” blong papa blong olgeta, bae i helpem papa blong olgeta taem hem i stap go fored olsem wan spesel witnes blogn Sevya, Natalia i ademap. “Hem i gat hat blong mekem hemia,” hem i talem. “Hem i stap filim paoa blong heven we i wok long hem, mo hem i lavem evriwan mo hem i wantem blong mekem wanem we i raet.”
“Evri Samting Bae I Go Stret”
Taem Elda Soares i bin stap olsem presiden blong Potugal Porto Misin stat long yia 2000 i go kasem yia 2003, oli kam blong save gud hem se hem i stap yusum wan toktok long lanwis Potugal we i talem “Tudo vai dar certo”—evri samting bae i go stret.
“Hem i tijim hemia long mifala” Ty Bennett, wan long ol misinari blong hem i tingbaot. “Hem i stap laef wetem fet mo hop se sapos yumi mekem wanem we Lod i wantem yumi blong mekem, bae evri samting bae i wokaot.”
Hem i tijim tu long ol misinari blong hem se bae oli no yusum toktok ia, i had o i no posibol, Richard Shields i talem, we i wan nara misinari blong hem. “Mifala i stap tokbaot ol samting olsem ‘ol jalenj.’ Advaes ia i bin helpem mi blong lidim laef blong mi taem mi bin stap lukluk long ol samting we oli olsem ‘ol jalenj’ blong winim, be i no olsem ol ‘had’ samting, o ol samting we ‘i no posibol’ blong mekem.
Kaen fet mo hop ia, oli no kamkamaot long wan isi laef. Elda mo Sista Soares oli savegud fasin blong no gat samting, blong stap taed afta plante longfala dei blong wok mo stadi, ol jalenj blong stap sik longtaem, mo hat i soa blong lusum bebi we i no bon yet, lusum bebi taem i bon, mo lusum brata mo sista mo papa mo mama.
Be tru long wokbaot blong laef, tufala i bin putum fet blong tufala long ol toktok blong fevret skripja blong Elda Soares: “Putum tingting blong yu i stap daon; mo Lod, God blong yu, bae i tekem han blong yu mo lidim yu, mo givim ansa long ol prea blong yu.”4
“Ol jalenj oli pat blong progres blong yumi,” Elda Soares i talem. “Be taem yumi save wet longtaem taem yumi stap harem nogud, taem we yumi stap lan blong laef tru long ol jalenj blong laef, taem we yumi gohed blong stap fetful, Lod i lukluk hae long yumi mo i blesem yumi wetem ol blesing we Hem i bin promesem.”
Taem yumi holem strong rel blong aean ia, hem i ademap, Lod bae i no lego yumi stap yumiwan.
“Taem yumi stap strong oltaem blong holem strong ol komanmen, holem strong gospel, ol skripja, mo hang strong long Lod Jisas Kraes, i stap helpem yumi blong winim ol jalenj blong laef,” Elda Soares i testifae. “Taem yumi nildaon blong prea, bambae Hem i stap wetem yumi mo bambae Hem i lidim yumi. Bambae Hem i givim insperesen long yumi long weaples blong go long hem, mo wanem blong mekem. Taem yumi stap obei mo putum tingting blong yumi i stap daon, Lod i stap ansarem ol prea blong yumi.”
Wan Disaepol we I Givim Ful Tingting
Ulisses Soares i wan man we i save mekem samting mo i stap rere. Skul blong hem, wetem wan Masta Digri long Bisnis Administresen, i mekem hem i rere blong wok olsem wan akaonten mo odita blong ol bigbigfala kampani long Brasil. Eksperiens ia i bin mekem hem i rere blong wok insaed long faenens dipatmen blong Jos, mo hemia i bin mekem hem i rere, taem hem i gat 31 yia blong kam wan long ol moa yang daerekta blong afea blong laef insaed long Jos. Ol defren priperesen ia oli bin givhan long hem tu olsem wan misin presiden, mo tu, long koling blong hem olsem wan Jeneral Atoriti Seventi long 2 Epril 2005.
Bifo oli singaotem hem long Presidensi blong Olgeta Seventi long namba 6 Jenuware 2013, Elda Soares i bin stap olsem wan kaonsela, mo afta olsem Presiden blong Brasil Eria Presidensi, mo olsem kaonsela blong Afrika Saot Is Eria. Longwe, hem i bin stap olsem kaonsela blong Elda Dale G. Renlund, mo afta, olsem wan Jeneral Atoriti Seventi. Elda Renlund, we naoia i wan memba blong Kworom blong Olgeta Twelef Aposol, i tokbaot taem blong tufala tugeta.
“Elda Soares i wan disaepol blong Jisas Kraes we hem i stap glad oltaem, i givim taem, i givim tingting blong hem,” Elda Renlund i talem. “Mi no save eniwan we i filim tru se hem i stap mekem wok blong Lod, i bitim hem. Sapos oli askem hem blong mekem wan samting, bambae hem i mekem wetem evri paoa blong hem.”
Nomata long medel blong olgeta Sent blong Peru (lef saed), Gana (andanit), o ol nara nesen we hem i bin givim seves mo givhan, Elda Soares i gat wan isi fasin blong lavem ol pipol, Elda Claudio R. M. Costa i talem.
Hem i talem se, kwiktaem, Elda Soares i lavem olgeta Sent long Afrika. Wan long ol fas wok blong hem long eria ia, i blong prisaed ova long wan stek konfrens long Kananga, Demokratik Ripablik blong Kongo. “Taem hem i kambak, hem i no save stop blong tokbaot gud fasin mo ful hat blong ol pipol we hem i bin mitim,” Elda Renlund i talem.
Elda L. Whitney Clayton, we i bin stap givim seves wetem Elda Soares blong faef mo haf yia long Presidensi blong Olgeta Seventi, i singaotem Elda Soares se hem i wan agrimen man, olsem se hem i stap help blong mekem evriwan i save agri long wan samting. “Hem i stap lisin mo i skelem gud ol tingting blong hem. Hem i kea gud long fasin we hem i stap mekem ol samting insaed long ol miting, blong mekem se voes blong yumi i save kam wan kores, be i no ol solo voes we oli stap kompit.
Elda Soares i no flas abaot skil blong hem blong save toktok long lanwis blong Potugal, Inglis, Spanis mo Franis. Be presen ia, we i nidim blong lukaotgud oltaem, i wan blesing long Jos, Elda Clayton i talem. Elda Soares i save toktok long bigfala namba blong ol memba blong Jos long lanwis blong olgeta.
“Ulisses i bin wan lida stat long taem ia we hem i bin wan smol boe,” Elda Claudio Costa i talem abaot tawi blong hem. “Hem i gat waes tingting mo i save mekem samting, mo hem i filim se hem i gat responsabiliti blong givim bes blong hemwan oltaem. Hem i gat wan isi fasin blong lavem olgeta we oli stap raon. Hem i gat hat blong wan tru disaepol blong Sevya, mo hem i gat wan tru witnes se Jisas Hem i Kraes. Mi lavem hem mo mi glad blong sastenem hem olsem wan Aposol blong Lod.”
Mo Elda David A. Bednar we i stap toktok long bihaf blong Kworom blong Olgeta Twelef Aposol i ademap: “Elda Soares i wan disaepol blong Sevya mo hem i gat fasin we i klin gud, i gat ones fasin, mo i wan klin tingting. Tru long laet long fes blong hem, smael blong hem, mo gudfala fasin blong hem, plante man, woman mo famli oli bin mo bambae oli kasem insperesen blong gat bigfala hat moa blong wantem folem Sevya mo laef folem ol tijing blong gospel blong Hem.”
Foto wetem waef, Rosana, long fored blong Sol Lek Tempol, we i kam long Kristin Murphy, Deseret News
Long dispensesen blong yumi, Lod i talem abaot Edwod Patrij se: “Hat blong hem i klin evriwan long fored blong mi, from hem i olsem Nataniel blong bifo, we i no gat fasin blong no stap ones.”5 Abaot Haeram Smit, Lod i talem: “Mi lavem hem from hat blong hem i stap tru, mo from we hem i laekem tumas wanem we i stret long ae blong mi.”6
Abaot Ulisses Soares, Lod bae i talem sem samting.