Stap Pasem Lav blong God i Go
Sam taem we i pas finis, famli blong mi mo mi i bin muv i go long Kentaki. Mi no harem gud nating from se mi stap lego evri fren blong mi, mo ol nara famli blong mi tu i stap. Be Kentaki i defren long wanem we i bin stap bifo. Long fas taem we mifala i go long jos, mi luk se i no gat tumas man long ples ia. Taem mi luksave se branj blong mifala i smol, mi disaed se bae mi no tingting nogud long hemia, mo bae mi jenisim hemia.
Long nekis dei, mama blong mi mo mi i go long stoa. Bifo mitufala i aot long haos, mi karem wan hip blong ol paskad. Taem mifala i kasem stoa, mi tekem wan lolipop mo mi go pem. Woman ia i skanem lolipop, afta i givim long mi. Mi givimbak long hem. Hem i konfius mo talem: “Yu jes pem hemia misis.”
Mi talem: “Mi save, be mi givim i go long yu olsem wan presen.” Afta mi putum wan paskad ia wetem lolipop. Hem i smael mo talem tangkyu. Hem i lukluk bak blong paskad, we mi bin raetem: “Evriwan i wan pikinini blong God.” Mi wokbaot i go, mi glad we mi save se i nomata se bae hem i no joenem Jos, be yet, mi bin mekem wan gud samting.
Taem dei ia i bin pas i go, !mi bin tingbaot se mi lego haf blong hip blong paskad long saed blong kas masin long stoa! Long nekis taem we mi bin go long stoa, mi go askem sapos ol kad oli stap yet. Nao mi luk wan samting, mo mi stop blong wokbaot. Kolosap faef long ol kas masin ia oli gat ol paskad we i talem se: “Evriwan i wan pikinini blong God.” !Woman ia i bin pasem ol kad i go! Mi bin harem gud tumas long wanem we mi bin mekem.