Tabu SpiritI Tij
Ol yut oli bin rere bifo long jeneral konfrens blong Spirit i tijim olgeta. Hemia wanem oli bin lanem long wan konfrens we i pas mo wanem oli stap mekem i defren from hemia.
Instraksen we I Kam tru long Insperesen
Ol pikja foto oli kam long Getty Images
Mi kasem insperesen tru long jeneral konfrens. Taem mi bin lisin long instraksen we i kam long ol lida blong yumi, blong givim seves long ol narawan, blong trastem Kraes, mo blong holem strong rel blong aean, mi bin filim Tabu Spirit i testifae long mi se gospel ia, i tru, mo yumi save kasem laef we i no save finis taem yumi obei ol komanmen, mo taem yumi stap folem toktok blong God. Mi bin putum ol gol blong givim moa seves long komuniti blong mi, mo blong mekem testemoni blong mi i kam moa strong tru long fasin blong prea mo mekem skripja stadi evri dei. Mi save se mi mi wan gel blong Papa long Heven. Hem i stap laef mo Hem i lavem mi blong oltaem mo oltaem.
Madelyn B., 16 yia, Delaware, YSA
Ol Ansa long Ol Kwestin
Bifo long jeneral konfrens, mi bin gat tu kwestin: (1) ?Olsem wanem mi save kipim wan gudfala fasin mo helpem ol fren blong mi taem oli mekem wan rong desisen? Mo (2) ?Olsem wanem bae mi save testifae abaot Jos long olgeta, mo bae oli no laf long mi? Long taem blong konfrens, Spirit i testifae long mi se mi no stap miwan. Naoia, mi save se taem mi stap stadi long ol skripja wetem evri hat blong mi, bambae mi kasem ol ansa blong ol kwestin blong mi abaot ol fren blong mi. Mi save se Papa blong mi i stap lisin long ol prea blong mi, mo bae mi traehad moa blong kam gud moa evri dei.
Isaak R., 13 yia, Pijinja, Ekuado
Rere blong Lan
Mi bin filim Spirit i strong tumas long jeneral konfrens. Stat long taem we mi stat blong rere long ol kwestin mo mekem miwan mi rere long saed blong spirit from konfrens, i gat wan niu mining long laef blong mi, mo mi bin save lanem plante moa tru long wanwan toktok. Mi mi glad tumas from profet mo ol aposol, mo mi save se Papa long Heven i bin sendem olgeta blong lidim yumi mo daerektem yumi long laef blong yumi.
Ben H., 17 yia, Kantaki, YSA
I Kasem Invitesen blong Gro
Jeneral konfrens i bin mekem mi kam strong moa blong wantem folem gospel rod blong Jisas Kraes. Hem i helpem mi blong save, mo andastanem se hemia i tru Jos, we i tekem laet mo hapines i kam long yumi. Mi bin filim Spirit i invaetem mi blong gro evri dei, mo blong mi ridim Buk blong Momon blong kasem wan strong testemoni abaot gospel. Mi biliv se Papa blong mi long Heven i bin wantem mi blong lisin long ol mesej ia blong insperesen .
Vicente A., 16 yia, Metropolitan Rijin, Jile
Stap Lukaotem Laet
Yia bifo long hemia, i bin wan jalenj long mi. Papa blong mi i faet agensem kansa, mo i gat ol teroris atak long taon blong mi. Mi traehad wetem wari, mi stap askem miwan se hao bae mi filim pis taem mi fraet se bae mi sef long saed blong spirit mo long saed blong laef ia, o nogat. Aot long jeneral konfrens, mi bin lanem se yumi save faenem pis, mo semtaem, laef long wan klin laef, fulumap hat blong yumi wetem fet, mo gohed blong lukluk i go long taem we i no save finis. Mi kasem insperesen blong tanem mi long Kraes long ol taem we i had, be i no blong dipen long save blong miwan nomo. Mi save se mi save winim ol papa blong tudak taem mi stap lukaotem laet blong Kraes ia we i saen bigwan.
Olivia H., 17 yia, Beljiom