Wan Merikel insaed long Haos blong Lod long Kiev
Doru Vasile
Bukares, Romenia
Pikja i kam long Allen Garns
Famli blong mi mo mi i glad tumas blong travel long trak, stat long Romenia i go kasem Kiev, long Yukren, blong dedikesen blong tempol long Ogis 2010. Mifala i bin save se hemia bae i tempol blong olgeta Sent long Romenia/Moldova Misin, mifala i travel blong samples 14 aoa, blong kasem longwe nomo. Taem mifala i kasem longwe, mifala i mitim wan nara grup we i bin travel tu long Romenia i kam. Mifala evriwan i hapi blong stap long Kiev from tabu taem ia.
Long dei blong dedikesen, grup blong mifala blong Romenia, oli putum mifala blong mifala i wajem dedikesen tru long wan brodkas insaed long wan rum we i stap long graonfloa blong tempol. Sam oli stat blong talem se oli no harem gud long hemia. Oli bin hop se bae oli tekpat long dedikesen wetem profet long selestial rum. Sam oli talem tu se, sapos olsem, bae oli stap nomo long hom blong olgeta mo wajem brodkas long japel blong olgeta long Romenia.
Mi stat blong prea insaed long hat blong mi, “Papa long Heven, ?olsem wanem mi save helpem ol memba ia blong Romenia blong gat wan eksperiens we bae oli no save fogetem insaed long haos blong Yu Papa?”
Mi stil no kasem wan ansa taem dedikesen sesen i stat. I no longtaem afta, mifala i lanem se profet, Presiden Thomas S. Monson (1927–2018), bae i kamdaon mo i putum konaston long ples blong hem. !Maet hemia nao i ansa blong mifala! Mi bin prea blong wan wei blong profet i kam mo i sekhan wetem Ol Sent blong Romenia.
Mi prea: “Mi no askem hemia blong miwan, be blong ol brata mo sista blong mi.”
Afta long seremoni blong konaston, Presiden Monson i wokbaot i kam pasem rum blong mifala taem hem i wokbaot i gobak long selestial rum. Wantaem nomo, mi filim long hat blong mi se bae mi stanap mo invaetem hem blong kam long rum blong mifala.
Mi stanap, mo talem: “!Profet blong mifala! Kam luk mifala. Mifala blong Romenia.”
Be i luk se hem i no harem mi. Afta, smol taem afta, hem i kambak. “!Romenia!” hem i talem taem hem i kam insaed long rum.
Hem i sekhan long mifala evriwan mo i talem se hem i lavem mifala tumas. Hat blong mi i fulap taem mi stap luk glad long fes blong ol dia memba blong mifala. Mi prea: “Tangkyu Papa, from merikel ia insaed long haos blong Yu Papa.”
Taem profet i aot long rum, i nomo gat wan we i harem nogud moa. Mi filim se mifala i stap long rum we i gat moa blesing insaed long tempol. Hem i wan eksperiens we bae mi neva fogetem.