Eg, Fius, mo Fet

Alvaro Alcaino

Antofagasta, Jile

Wan long ol gol blong mifala olsem wan famli, i blong sevem inaf mane blong putum wan diposit blong pem wan haos. Sapos i no gat gol ia, bae mi westem taem long evri wiken blong wajem televisen, wet blong wan mane i kam long mi.

Mi wan draeva blong wan maen kampani long Not Jile, mo mi wok fo dei longwe long hom long ol maen, mo afta, mi gat tri dei we mi no wok—Satedei i go kasem Mandei. Blong blokem hol long salari, mo sevem vatu blong pem wan haos, mifala i disaed blong stat blong salem eg. Plan blong mifala blong tekem oda blong ol fren, ol neiba, mo ol memba blong Jos; pem samples 1,000 eg evri wik long wan man we i salem eg, mo afta pikimap mo deliva ol eg ia long Satedei mo long Mandei.

Waef blong mi, Lora, mo mi, i disaed se bae mitufala i tekem tufala pikinini i go wetem mitufala taem mitufala i stap deliva, mo gat wan gud taem tugeta. Taem mifala i stap long rod blong go pem ol fas eg blong mifala, be, trabol i kilim mifala. Wan long ol pikinini, we i stap pleiplei wetem wan smol aean pensel sapena, i sakem sapena, mo i foldaon insaed long emti laeta blong sigaret. Spak i flae, mo trak i lusum lektrik paoa, mo i go stop stret long medel blong bigfala rod. Wan fius blong trak i bon.

Mifala i sidaon, mifala i blokem rod mo trafik mo stap tingting se bae mifala i mekem wanem; mifala i harem nogud tumas nao kolosap mifala i krae. Be long taem ia, mi tingbaot se Lod i bin promesem blong leftemap yumi mo helpem yumi sapos yumi trastem Hem. Wan kwaet i kam insaed long mi. Mi luksave se bae mi no save sidaon mo komplen. Mifala i gat wan problem, mo wetem help blong God, bae mifala i stretem.

Lora mo mi i lukluk mitufala mo talem: “Yumitu mas soem fet.” Mitufala i prea mo wapem wota blong ae. Nao, Lora i holem stia, mo mi kamaot blong pusum trak. Sam pipol oli jiamaot long trak blong olgeta mo oli kam helpem mi.

Mifala i pusum trak kolosap 200 mita bifo mifala i faenem wan sef ples aot long bigfala rod blong save putum gud trak. Taem trak i rol i go, i stop, mi luk se mifala i putum trak stret long fored blong wan stoa we i salem stereo blong trak.

Mi faenem fius, wokbaot i go insaed long stoa, mo askem: “?Yufala i gat wan olsem ia?”

Stoakipa i talem: “Yes.”

Mi pem wan fius mo putum i gobak long ples blong hem, trak i stat wantaem, mo mifala i go. Man we i salem eg, i stap rere blong sarem stoa taem mifala i kasem ples blong hem. Mitufala i pem eg, mo go deliva.

Taem yumi gat ol jalenj, yumi nid blong tingbaot blong askem Papa long Heven blong kasem help. Mi save se bae Hem i ansa long yumi taem yumi stap muv fored mo soem fet blong yumi long Hem.