Ol Rod we Oli Stap Mekem Yu Rere from Fiuja blong Yu
Nomata se yu go long yunivesiti, yu stap lukaotem wok, o stap lanem wan wok, yu stap developem wan fasin we i nid blong gat blong bildim kingdom blong God.
Mi no ting se hem i drim blong wan gel blong 14 yia blong stap long wan fam we i gat das, we i stap holem wan savel we i rosta, mo i stap klinim ples blong slip blong hos we i stap smel. Be mi bin stap long wan ples olsem nao afta long skul, evri dei, kasem taem mi bigwan inaf blong kasem wan nara wok.
Yes, i tru, i no wan gudfala ples blong wok long hem taem mi stap long sekendri skul, be mi bin andastanem long taem ia se, sapos mi wantem wan wok we mi laekem—wan we bae mi no stap klinap long ples blong ol animol—nao mi nidim blong go long yunivesiti, mo blong go long yunivesiti, mi nidim mane. Mi bin save se, long mi, edukesen i bin stret step i go fored, blong kasem wan longtaem wok we bae mi glad long hem.
Naes samting i we, rod we mi bin jusum, i wan ia nomo we i save helpem yu blong lanem wok, mo blong yu save lukluk long ol nid blong yuwan bakegen. Hemia, oli singaotem se yu dipen long yuwan long saed blong laef ia mo long saed blong spirit. Taem yu stap lukluk long ol defren rod we oli stap, traem jusum wan rod ia we bae yu filim se bae i mekem yu rere gud.
Ol stori ia oli ol stori blong ol pipol we oli bin gat sem yia blong yu, sam yia i pas. Taem yu folem eksampol blong ol yang adalt ia, yu save faenem rod blong yuwan we bae i lidim yu blong yu save dipen long yuwan.
Lukluk long Ol Nid Raon long Yu
I Kam long Oudom Piseth, Kambodia
Blong save kasem ol gol blong mi, oltaem mi stap talem long miwan se, blong wokhad, hem i impoten tumas, be wan nara wei blong mekem gud evriwan, i blong wok smat. Afta long misin blong mi i go long Inglan, mi gobak long Kambodia, mo mi lukluk long maket blong ol wok we i stap. Mi lukluk long ol samting olsem, i tekem hamas taem blong kasem trening blong wanwan wok we i stap, mo hamas mane blong spendem long trening ia.
Mi faenem se trening program blong kam wan blong salem klos, i sotwan, be i gat jalenj, mo i no gat fulap pipol oli stap mekem. Mi luk se hemia i wan gud janis mo mi disaed blong tekem. Naoia, mi finisim program ia, mo mi stap wok olsem man blong salem klos blong wan kampani we i mekem klos.
Blong faenem stret longtaem wok, i wan had samting, be mi gat Sevya blong helpem mi mo blong leftemap mi.
Yusum Edukesen blong Openem Ol Doa
I Kam long Iolanda Teixeira, Kap Verde, Afrika
Oltaem mama blong mi i leftemap tingting blong mi wetem toktok ia: “Edukesen i ki blong sakses.” Mi bin wantem wan fiuja we i gud moa, blong miwan, mo speseli blong famli blong mi, mo blong mekem hemia, mi bin nidim blong gohed long edukesen blong mi. Mi no bin gat mane blong go long yunivesiti long tetaem ia, mekem se mi aplae long wan skolasip blong go long wan vokesenol skul blong stadi long kompiuta sistem mo lukaot long kompiuta.
Truaot long ol stadi blong mi, mi bin fesem ol defren kaen jalenj, be hemia i no stopem mi blong muv fored wetem ae blong mi i lukluk nomo long ol dei ia we bae oli gud moa. Prea i bin helpem mi fulap; oltaem mi lukaotem kaonsel we i kam long Lod. Oltaem, mi putum ful tingting mo taem blong mi long stadi, mo tedei, mi putum ful tingting mo taem blong mi long wok, mo mi givim evri samting we mi save mekem olsem wan kompiuta teknisen mo wan maketing asisten.
Wok Naoia blong Kasem Fiuja we Yu Wantem
I Kam long Ann-Sophie mo Lawrence Cavin, Skotlan, UK
Ann-Sophie: Oltaem, mi bin wantem stadi long wan yunivesiti, be ol plan blong mi long wanem blong stadi oli stap jenis oltaem long taem we mi yangfala. Afta we mi finisim sekendri skul, mi volontia long wan hospital blong sikis manis. Afta long hemia, mi bin laekem tingting ia blong kam wan nes, be mi no bin ting se bae mi save mekem.
Long klas blong indipenden laef, long wod blong mi, oli bin askem blong mi jusum wan wok we mi laekem blong gat, nomata mi no gat kwalifikesen (pepa) from. Mi bin prea long wanem blong mekem, mo nes i gohed blong kam long maen blong mi. Mi disaed blong folem ol toktok blong Lod.
Blong folem rod ia, i no bin isi. Blong stat, mi faenem moa abaot program blong nes, mo wanem mi mas mekem blong mi go stadi. Mi toktok long ol pipol we oli gotru long sem rod. Fas taem, mi bin aplae long program blong kam nes, be oli putum mi long wetlis. Be mi no givap; mi bin aplae bakegen, mo afta oli tekem mi. Samtaem, yu mas save wet longtaem mo trastem Lod from se Hem i gat plan blong Hem from yu.
Lawrence: Taem mi bin yangfala, mi putum wan gol se bae mi kam faswan, nomata wanem mi stap stadi long hem, o wanem wok mi gat. Oltaem mi traem blong lanem samting mo mekem mi kam antap blong mekem se mi gat moa janis blong win.
Naoia, mi wok olsem wan maneja blong wan kampani blong klos, be mi wantem joenem polis fos. Long Skotlan, yu mas laef long kantri blong 3 yia we oli folfolem olgeta bifo yu save aplae long polis. From se mi bin stap aotsaed long kantri blong tu yia we mi go long misin, mi mas wet sam moa manis bifo mi save joen.
Nomata se hemia i wan bigfala samting we i blokem rod blong mi, mi no givap. Mi gat wan gud wok blong save lukluk long famli blong mi, mo mi bin wok had blong mekemsua se mi gat wan gud refrens blong ol fiuja wok blong mi.
Olsem ol yang adalt ia, bae yu save faenem se ol defren rod oli save mekem yu rere blong lukaotem yuwan mo fiuja famli blong yu. Wetem gol ia long maen, yu save mekem plan blong gat sakses. Elda Dieter F. Uchtdorf blong Kworom blong Olgeta Twelef Aposol i bin tijim: “Bae yumi mekem bes we yumi save mekem, mo wok blong gat wan gud nem olsem wan we i mekem gud wok long evri samting we yumi mekem. Bae yumi putum maen mo bodi blong yumi i stap fulwan long bigfala janis blong wok we evri niufala dei i tekem i kam” (“Two Principles for Any Economy,” Okt 2009 Jeneral Konfrens). Taem we, naoia, yu lukluk nomo blong stap lanem samting mo stap wok, bambae yu krietem ol fasin we bae oli helpem yu blong yu filim se yu trastem yuwan moa, mo yu trastem wanem i kam long fiuja.