Stap Lanem Samting Folem Wei blong Sevya
I Kam long Elda David A. Bednar
Blong Kworom blong Olgeta Twelef Aposol
I Kam long wan toktok we i kamaot long semina blong ol niu misin presiden long 25 Jun 2014.
Blong stap invaetem Tabu Spirit blong Hem i tija, hemia i stamba tingting biaen long evri rod blong Lod, blong stap lanem samting.
Taem we Lod i stap muvum wok blong Hem i go hariap, i minim se yumi mas gohed blong lanem samting, gohed blong jenis, mo gohed blong muv i go fored wetem fet long Sevya.
Wan Paten o Rod blong Folem long Saed blong Evri Samting
Long wan revelesen we Lod i givim tru long Profet Josef Smit long Jun 1831, Lod i talem: “Mi givim yufala wan rod blong folem long saed blong evri samting, blong mekem se Setan i no trikim yufala; from Setan i stap olbaot long graon, mo hem i stap go, i stap trikim ol nesen” (Luk long D&C 52:14).
I gud tumas blong luk se, Lod i givim “wan” rod, be i no “wan rod ia nomo” long saed blong evri samting. Mi no biliv se Lod, long lanwis we Hem i yusum, “wan rod blong folem long saed blong evri samting,” Hem i stap minim se Hem i gat wan rod ia nomo blong yumi yusum long evri situesen. Be, wei blong Lod i gat plante defren rod we yumi save yusum blong kasem ol defren samting long saed blong spirit.
Bigfala gol blong yumi, long eni eksperiens blong yumi blong lanem samting mo blong tij, hem i blong yumi faenemaot mo yusum rod ia, o, ol rod ia, we i stret wetem ol nid blong yumi, mo bae i lidim yumi blong kasem risal ia we yumi wantem, blong lanem samting.
Tabu Spirit I Tija
Tabu Spirit i nambatri memba blong Godhed, mo Hem i wan Reveleta, wan Tija, mo wan Spirit blong Givhan, wan we I Mekem yumi Kam Tabu, mo Hem i mekem se yumi save tingbaot evri samting (luk long Jon 14:16–17, 26; 3 Nifae 27:20). Elda James E. Talmage (1862–1933) blong Kworom blong Olgeta Twelef Aposol, i eksplenem: “Ofis blong Tabu Spirit long ol givhan wok blong Hem long medel blong ol man, oli raetemdaon long skripja. Hem i wan tija we Papa i sendem hem i kam; mo long olgeta we oli gat raet long tijing blong Hem, Hem i talemaot evri samting we i nid blong sol i kam antap.”1 Blong stap invaetem Tabu Spirit blong Hem i tija ia, i stap long stamba blong stamba tingting blong evri rod blong folem we i kam long Lod, blong stap lan mo stap tij.
Wan we i lan, we i yusum stret fasin blong mekem joes, mo i tekem aksen folem ol stret prinsipol, i stap openem hat blong hem long Tabu Spirit—mo long wei ia, i stap invaetem tijing blong Hem, paoa blong Hem blong testifae, mo witnes blong Hem we i konfemem ol samting. Blong stap lanem samting wetem fet mo tru long fet, i nidim blong yu praktis fulap long saed blong spirit, tingting mo bodi, be i no blong stap harem nomo mo stap nating wetem. Tru long fasin blong yumi blong stap tru mo stap mekem samting oltaem wetem aksen blong fet, nao yumi stap talemaot long Papa blong yumi long Heven, mo long Pikinini blong Hem, Jisas Kraes, se yumi wantem blong lanem samting, mo yumi wantem kasem instraksen we i kam long Tabu Spirit.
Tingting long olsem wanem nao ol misinari oli stap helpem ol investigeta blong lanem samting tru long fet. Blong mekem mo kipim ol komitmen long saed blong spirit, olsem blong stap stadi, mo stap prea abaot Buk blong Momon, blong stap obei long ol komanmen, mo blong stap kam long ol miting blong Jos, i nidim blong investigeta ia i praktisim fet mo i tekem aksen. Prinsipol ia, hem i blong evri memba, wetem evri papa mo mama, ol tija mo lida tu.
Blong stap tij, askem strong, mo eksplenem—oli impoten blong mekem—be bae i neva pasem long investigeta, pikinini, studen, o wan memba, wan witnes ia se gospel we i kambak i tru. Taem bae fet blong olgeta nomo bae i pusum olgeta long aksen, mo i openem wan rod i go long hat, long taem ia nomo bae Tabu Spirit i save givimaot wan witnes we i konfemem ol samting. Ol misinari, ol papa mo mama, ol tija, mo ol lida, i klia, se oli mas lan blong tij wetem paoa blong Spirit. Samting we i impoten semmak, i responsabiliti we oli gat blong helpem ol narawan blong lanem samting olgetawan, tru long fet.
Fasin blong lan ia we mi stap tokbaot, i go go i bitim simpol andastaning long tingting mo fasin blong holemtaet mo rimemba ol infomesen. Kaen fasin blong lanem samting ia, we mi stap tokbaot, i mekem yumi wekap, yumi kam long God (luk long Alma 5:7), i mekem yumi sakemaot man ia we i folem fasin blong wol (luk long Mosaea 3:19), i mekem yumi jenisim hat blong yumi (luk long Mosaea 5:2), mo i mekem se yumi jenisim laef i go long Lod blong yumi neva foldaon bakegen (luk long Alma 23:6). Blong lanem samting tru long fet, i nidim tugeta samting ia, wan hat mo wan maen we i wantem (luk long D&C 64:34) mo hemia i risal blong Tabu Spirit i tekem paoa blong toktok blong God i go long hat mo insaed long hat. Blong lanem samting tru long fet, i no save aot long wan tija i pas i go long wan studen, o i aot long wan misinari i go long wan investigeta tru long wan tok blong tij, o wan samting we oli soem, o wan eksperiens; be, wan studen i mas praktisim fet, mo i mas tekem aksen blong save kasem save ia blong hemwan.
Wan Paten blong Yumi Stap Folem blong Stap Lan mo Tij
1. Rere blong lan. Sapos yu go long Sandei Skul klas, mo stap lisin long tija blong yu i presentem wan topik, hemia i gud. Be sapos yu bin wok, mo yu bin rere, sapos yu stap tingting long ol samting we tija blong yu i invaetem yu blong ridim, tingting hevi long hem, mo prea from bifo yu go long klas, i save gat wan strong paoa we Spirit i kapsaetem, mo Tabu Spirit i kam tija blong yu. Blong stap rere, i invaetem revelesen.
2. Toktok blong save leftemap man. Mi wantem pulum tingting blong yufala long ves ia. “Jusum, long medel blong yufala, wan tija, mo yufala evriwan i no mas kam man blong toktok long semtaem; be wan nomo i mas toktok, mo evri narawan i mas lisin long ol toktok blong hem, blong mekem se taem evriwan i toktok finis, nao evriwan i kam antap tru long evriwan, mo blong evri man i gat wan semmak janis blong toktok.” (Luk long D&C 88:122).
Hemia i wan rod blong Lod we i gat paoa long hem blong stap lan mo stap tij. Bae mi save talem se yumi lukluk long ves ia long wan nara wei: “Jusum, long medel blong yufala, wan tija.” ?Huia i tija? Tabu Spirit. Sapos yu wantem se Tabu Spirit i tija, nao “yufala evriwan i no mas kam man blong toktok long semtaem; be wan nomo i mas toktok, mo evri narawan i mas lisin long ol toktok blong hem, blong mekem se taem evriwan i toktok finis, nao evriwan i kam antap tru long evriwan, mo blong evri man i gat wan semmak janis blong toktok.” Wan ia nomo we i save mekem yumi kam antap, Hem i Tabu Spirit.
Blong stap toktok blong leftemap man, i invaetem revelesen. Tedei long Jos, yumi stap lanem mo stap folem sam rod blong stap lan mo tij we oli moa long saed blong spirit, oli moa had, mo i askem moa taem mo tingting. ?Bae yumi gohed oltaem blong mekem wanem we yumi bin stap mekem, mo kasem semfala risal we oltaem yumi stap kasem? O, ?Bae yumi sakem sin, mo lan, mo jenis, mo tij moa long wei we Lod i stap mekem?
3. Invaetem man blong tekem aksen. Wan simpol kwestin nomo i save help blong kasem gol ia. ?Bae yu mekem wanem wetem wanem yu bin lanem tedei? Blong tekem aksen folem revelesen we yu kasem, i stap invaetem moa revelesen.
Mi prea se bae yumi wokbaot long sem spid we Lod i gat taem Hem i stap wokbaot hariap, mo bae yumi no jes mekem nomo wanem we yumi bin stap mekem oltaem, long sem wei ia we yumi bin stap mekem bifo.
Mi talemaot witnes blong mi se Lod Jisas Kraes i ril mo i stap laef. Mi witnes se Hem i stap laef. Hem i laef bakegen long ded. Hem i stanap long hed blong Jos ia, mo Hem i stap lidim ol wok blong Jos. Hem i stap askem yumi evriwan blong wokbaot long sem spid olsem Hem blong mekem wok i go hariap, mo blong folem ol rod ia we Hem i putum i stap blong yumi save gro mo save lanem samting.