Wan Smael blong Agri

Franklin Romero

Manabí, Ekuado

Wan naet, wod blong mifala i holem wan aktiviti we mifala i spendem plante aoa blong rere from. Afta long aktiviti, wan yangfala investigeta i talem tata long mi, be i kambak sam minit afta, mo i askem: “Bisop, ?Bae mi mas kambak wetaem?” Mi talem long hem se long Sandei, mo kwiktaem, boe i talem: “No. ?I gat wan nara aktiviti?” Hem i bin gat wan gudfala taem wetem ol yut blong wod, mekem se hem i wantem kambak.

Mi bin storian tu wetem wan kapol we i kam pas, we oli stap long aktiviti, mo mi askem tingting blong olgeta. Hasban i talem: “Stat long taem we mitufala i kam ia, mitufala i filim pis mo kwaet,” mo waef blong hem i saksakem hed blong hem blong talem yes. Mi bin sapraes from se, taem tufala i kam, i gat fulap pipol i toktok mo mekem fulap noes. Be hem i gohed mo i lukluk mi, mo askem: “?Hemia nao Tabu Spirit, ah?” Mi sapraes, mi talem yes nomo.

I bin gat plante samting blong mekem blong rere long aktiviti ia, mekem se long naet ia, taem evri samting i bin finis, mi wantem wan samting nomo, hem i blong gobak hom mo go long bed. From se mi bin taed tumas, mi no bin save tingting i gobak long ol storian blong mi wetem ol investigeta. Taem mi kasem hom, mi talem prea blong mi, mo mi go long bed, be mi no save slip; insaed long maen blong mi, mi gat pikja ia blong Lod we i stap smael. Hem i wan smael blong agri. Long taem ia, mi stat blong tingbaot ol gudfala samting we i bin hapen long aktiviti.

Mi bin andastanem se strong wok mo tingting, mo lav blong ol memba blong wod i bin mekem se i posibol blong tajem hat blong ol trifala investigeta ia. Mi bin andastanem se smael ia blong agri, i from wanem we mifala i bin stap mekem. Mi no save holembak mi, be mi krae nomo, mo mi filim glad tumas from presen ia we Lod i bin givim long yumi. Hem i bin givim mifala wan smael blong talem se Hem i agri. Mi testifae se ol toktok blong Lod oli tru; se taem yumi tekem wan sol i kam long Hem, glad blong yumi insaed long kingdom blong Papa, bambae i bigwan tumas (luk long D&C 18:15).