Lokol Pej
Wea Nao Ol Skul Buk we Oli Lus
Wan nomol sipmen blong ol skul saplae we i wan donesen we i kam long Niu Silan i go long Marsol Aelan i kamaot olsem wan gudfala risal we man i no ting se bae i hapen.
Ova long ol las wik, ol misinari Craig mo Nancy Preston, tufala i bin wok wetem ol oganaesesen ia Furniture for Schools Charitable Trust (FFS), LDS Charities mo Ministri blong Edukesen blong Marsol Aelan blong tekem i kam sam sekenhan tebol blong skul, ol jea mo sam buk we oli kam long Niu Silan blong oli givim long sam lokol skul.
Mifala i no save olsem wanem i hapen, be “mifala i kam blong luksave se samfala smol jea mo tebol, oli bin givimaot long wan skul we i no bin stap long lis blong mifala,” Elda Preston i talem. “Mifala i disaed blong go luk from wanem, mo weaples nao ol saplae ia oli go long hem.”
Mifala i faenemaot se hed blong Dipatmen blong Saplae long Ministri blong Edukesen i go putum ol saplae ia long wan smol skul we i stap longwe—Majuro Edukesen Senta blong Olgeta we Sora i Fas mo Ae i Blaen, we oli nidim bigwan blong gat ol skul saplae.
“Oli welkamem mifala wetem ol bigfala smael, ol boe mo fulap han we i sekhan,” Elda Preston i talem. “I no gat toktok i kamaot, be sekretari nomo i toktok from se hemwan nomo i save harem mo talem toktok. Mifala i talem tangkyu tumas se wan gudfala man wetem wan hat we i kaen i bin save abaot mifala, mo i bin helpem klasrum ia blong olgeta we oli gat spesel nid.”
Ol saplae we oli bin donetem oli ol sekenhan tebol, jea mo ol laebri buk we oli kam long ol skul raon long Niu Silan.
John McLean, we i lukaot long FFS, i tokbaot sipmen ia i go long Majuro, Marsol Aelan, mo talem: “Mifala i praod long wok ia from se i mekem se bae i gat bigfala jenis long envaeronmen blong klasrum ia, mo wan rod blong lanem Inglis.”
Hem i ademap: “Inglis i putum rod i stap blong save go insaed long eni ekonomi mo i letem ol yangfala, blong wan dei, oli putumbak insaed long ekonomi blong kantri ol skil we i nid, ol smol bisnis, ol bigfala bisnis mo developem ekonomi.”
Bifo we sipmen ia i kam, tufala Preston, we tufala i stap long wan fultaem misin wetem Jos blong Jisas Kraes blong Ol Lata-dei Sent, i bin visitim sam long ol skul ia long eria blong skelem nid blong olgeta, mo mekem wan lis blong ol samting we ol prinsipol oli bin wantem.
Long 27 Novemba, oli bin deliva kontena long ples blong Marsol Aelan Hae Skul mo Junia Skul, mo i bin gat wan seremoni; long taem ia Minista blong Edukesen i bin givim wan toktok.
Ol pikinini blong Marsol Aelan oli kasem ol tebol mo jea long Furniture for Schools Charitable Trust mo long LDS Charities.
Ol skul fenija ia oli bin putum se bae i go long Marsol Aelan Hae Skul mo Junia Skul, long Raiok, Eoja mo Ajeltek Praemeri Skul.
Wan sapraes, mo tangkyu long hemia, tufala Preston i talem, sam long ol saplae ia oli go tu long Majuro Edukesen Senta blong Olgeta we Sora i Fas.
“Yumi wok wan long hemia,” Elda Preston i talem. “Yumi stap wok blong faenemaot se nid i stap wea, mo wanem nao, yumi wetem patnasip wetem ol narawan, i save mekem blong mekem wan gud jenis i hapen. Mifala i talem tangkyu se fren blong mifala long Ministri blong Edukesen i bin tekem step blong helpem mifala blong helpem moa pikinini we oli stap long nid.”