Lokol Pej
Stap Katem Wud blong Famli blong Hem
Taem hem i wan yang man, Kapoa Tiaou i bin mekem misin blong hem long Niu Kaledoni, we tetaem ia, i pat long Suva Fiji Misin.
Taem hem i finisim misin blong hem, hem i faenem wan wok olsem wan man blong wokem ruf blong haos; hem i mared mo i statem wan famli long Niu Kaledoni.
Nomata we wok blong hem i save lukluk long hem mo famli blong hem, hem i wantem tumas blong mekem wan nara samting wetem ol han blong hem—wan samting we bae i givim glad long hem mo ol nara man.
From se hem i wan man we hem i gat plante fet, hem i bin prea mo i bin livim kakae, blong hem i kasem wan presen we bae i mekem tingting blong hat blong hem mo ol drim blong hem oli hapen. Strong bilif blong hem long wan Papa long Heven we i lavem yumi mo i wantem se yumi gat sakses, i pusum hem long ol prea blong fet blong hem.
Wan dei, taem hem i stap karemaot ol tul blong ruf we oli fulap insaed long wan trak mo sakem i go long ples blong doti, ae blong hem i kasem tu pis blong gudfala wud we i stap slip long medel blong ol doti. Hem i pikimap tufala wud ia, mo sakem i go long trak blong hem, mo tekem i go long haos blong hem.
Hem i no gat eksperiens long eni kaen wok long saed blong wud, be hem i pem ol tul blong kapenta mo hem i stat blong testem ol skil blong hem. Hem i sapraes se hem i gud long samting ia—iven we hem i stap yusum ol rong tul. Hem i bin sapraes se hem i save katem kopi blong han blong hemwan, mo yusum olsem stamba blong wan smol laet.
Plante defren samting we i bin hapen afta, oli stat blong jenisim laef blong Kapoa.
Wik afta long fas traem blong hem blong katem pikja long wud, hem i mitim wan olfala fren we i stap krae long Kapoa se hem i mestem wan eksam. Taem Kapoa i askem hem se wanem kaen eksam hem i mestem, fren blong hem i talem se: “Mi no winim eksam blong mi blong katem pikja long wud.” Long eksam ia, hem i mas mekem wan kopi blong wan koen we i gat pikja blong wan pijin long hem. Hem i no winim from se ae blong pijin i rong. Man ia, i no save luk gud, mekem se hem i no save winim wan setifiket blong katem pikja long wud.
“?Yu yu lanem blong katem pikja long wud long weaples?” Kapoa i askem long fren blong hem.
Fren blong Kapoa i talem nem blong skul long hem. Hem i pasem fas eksam mo 11 manis afta, hem i graduet wetem wan setifiket long saed blong fasin blong katem pikja long wud.
Bos blong hem long bilding ples blong wok i sapraes blong luk Kapoa i risaen long wok blong hem, mo i askem: “?Yu yu save gud wanem yu stap mekem?” “!Mi mi save stret evriwan wanem mi stap mekem!” hem i eksplenem.
Hem i go mo wok blong wan man we i gat bisnis long turis.
Kapoa i stap rere blong fesem bigfala jalenj blong laef blong hem long taem ia. I no longtaem afta we hem i bonem nambatri pikinini blong tufala i kam long wol, waef blong Kapoa i ded, i lego hem wetem wan pikinini we i gat 3 yia, wan we i gat 2 yia, mo wan we i gat 1 manis.
Hem i luk se hem i stap long wan taem we i tudak wetem plante kwestin mo harem nogud.
Wan moa tame, hem i tanem hem wetem fet i go long stamba blong evri blesing blong hem. Help i kam long wan wei we hem i no ting long hem.
Tu sista misinari i noknok long doa blong hem, mo tufala i stap help wetem ol pikinini blong hem mo wetem sam advaes. Wan sista i talem long hem: “Sapos ol klaod blong tudak oli fulap long yu, i nomo gat rum blong laet blong Kraes i kam insaed.” Advaes ia i ring long sora blong Kapoa mo hem i stat blong klaem i kamaot long ples blong tudak we hem i bin stap long hem.
Taem hem i finisim misin blong hem, wan long tufala sista ia i gobak jekem Kapoa. Wan bigfala frensip i stat, mo long en, tufala i mared. Hem i givim balens long laef blong yangfala man ia blong katem pikja long wud, mo hem i givim lav long ol trifala pikinini blong hem.
Beatrice Tiaou i lanem skil blong katem pikja long wud aot long niufala hasban blong hem, mo hem tu, hem i gud tumas long art ia blong katem pikja long wud. Tugeta, tufala i bin save statem bisnis blong tufala mo tufala i bin save winim mane aot long bisnis ia.
Taem ol pikinini oli groap, olgeta tu oli bin lanem art ia blong katem pikja long wud, mo naoia, long kantri blong olgeta, oli gohed wetem naes famli skil ia blong katem pikja long wud mo mekem ol nara wok long wud.