Elda Gerrit W. Gong: Lavem Lod mo Trastem Hem
Taem hem i wan niufala studen we i jes graduet long Yunivesiti blong Oksfod long Inglan, Gerrit W. Gong i bin lanem tru long eksperiens blong hemwan se taem yumi lavem Lod mo trastem Hem, bambae Hem i helpem yumi, i lidim yumi, m bae i mekem yumi kam strong moa.
Gerrit i wan Rods Skolasip studen we i stap wok blong finisim tu digri, mo wan i pepa blong kam wan dokta. Long semtaem, hem i stap givim seves insaed long bisoprik blong Oksfod Wod. Hem mo waef blong hem, Susan, tufala i tingbaot advaes we Elda David B. Haight (1906–2004) blong Kworom blong Olgeta Twelef Aposol, i bin givim taem hem i bin mekem mared blong tufala insaed long Sol Lek Tempol. “Hem i talem mitufala blong gat wan koling oltaem,” Elda Gong i talem. “Mitufala i save se sapos mitufala i trastem God, mo mekem bes blong mitufala, bambae Lod bae i helpem mitufala.”
Gerrit mo Susan, tufala i bin kasem “ol sore we oli kaen mo tabu,” hem i talem. Taem hem i stap gohed insaed long bisoprik, Gerrit i finisim evri skul blong hem blong kasem wan dokta digri, be i no finisim wan longfala pepa we hem i mas raetem. Hem i askem bisop blong Oksfod Wod, Alan Webster, blong kasem wan prishud blesing. Long blesing ia, Gerrit i kasem promes ia: “Gohed blong mekem evri samting we yu save mekem, mo Lod bambae i blesem yu.”
Tufala memba blong wod, we tufala i ol sekretari long saed blong loa we tufala i gat eksperiens, tufala i volontia blong helpem hem blong taepem longfala pepa ia blong hem; mo Gerrit i bin save finisim pepa ia long sam manis nomo. Wanem we i stap, i we, hem i bin finisim wan masta digri mo wan dokta digri long tri yia taem nomo. Taem hem i graduet, hem i bin akseptem wan wok blong stap mekem sam stadi long sam samting, hemia long yunivesiti. Eksperiens blong hem long Oksfod i mekem se tras blong hem long Lod i kam strong moa; mo tras ia i gogohed kasem tedei, mo bae i gohed blong blesem Gerrit W. Gong taem hem i stap givim seves naoia insaed long Kworom blong Olgeta Twelef Aposol.
Ol Bred mo Ol Fis
Elda Gong i talem: “Lod i kaen mo i gat gladhat long yumi, mo Hem i wantem blong stap blesem yumi.” “Sapos yumi mekem gud, bae Hem i givim paoa long yumi blong mekem moa bitim we bae yumi save mekem. Hem i olsem taem hem i mekem ol bred mo ol fis ia oli bin kam fulap. Lod i tekem wanem we i stap, mo i dabdabolem i go i bitim wanem we yumi save mekem long paoa blong yumiwan.”
Prinsipol ia, blong ol bred mo ol fis, i tru tu wetem fasin blong lanem samting, hem i talem. “Iven taem i no gat stret skul i stap, spirit blong lanem samting i wanem we i impoten, from se fasin blong lanem samting, i blong taem we i no save finis. Yumi evriwan i save lukaotem laet mo trutok, nomata wanem situesen yumi stap long hem. Taem yumi mekem, Lod bae i helpem yumi blong faenem trutok ia.”
Yumi Blong Kavenan
Taem hem i bin stap long Oksfod, Elda Gong i bin lanem wan nara gospel prinsipol, wan we hem i stap singaotem “yumi blong kavenan.”
“Taem yumi stap kam kolosap moa long Lod, yumi stap kam kolosap moa long wanwan long yumi,” hem i talem. “Long Oksfod, Susan mo mi i laekem tumas eksperiens blong mitufala insaed long wod, semmak olsem mitufala i laekem eksperiens long skul. Plante long ol gudfala fren blong mitufala, tedei, oli kamaot long Oksfod Wod.”
Sam long ol fren ia i gat, Tim mo Katherine Witts, we tufala i tingbaot se tufala i stap go long tempol wetem ol Gong. “Mi tingbaot klia se Brata Gong bae i karemaot hanwaj blong hem blong mekem se tingting blong hem i no wari long taem, taem hem i stap tingting longfala long ol samting we i blong taem we i no save finis,” Sista Witts i talem. “Smol aksen ia i bin helpem mi blong mi gat moa strong tingting blong mekem gud moa long tempol wosip blong miwan.”
Ol Gong, plante taem oli gat fren from gospel ia. “Bae ol pipol i talem: ‘Mifala i wok wetem yu taem yu stap long hae kaonsel,’ ol samting olsem,” Elda Gong i talem, mo i wok long tufala wei. Mi mi glad from wan stek presiden mo wan wod kaonsel we i bin helpem mi, taem mi wan yang bisop. Yumi evriwan i gat kaon long papa mo mama blong yumi, ol famli blong waef o hasban, ol neiba, ol misin presiden, ol sista, mo ol prishud lida we oli kaen long yumi, we oli lidim yumi, mo leftemap tingting blong yumi blong kam long Kraes.”
Famli Histri
Famli histri blong Elda Gong i gobak 34 jeneresen, i go kasem fas Dragen Gong, we i bon long 837 AKD. Ol bubu blong Elda Gong oli aot long Jaena mo muv i go long Yunaeted Stet. Mama blong hem, Jean, i joenem Jos taem hem i yang gel long Hawae, YSA, mo afta, i go long Brigham Yang Yunivesiti long Provo, Yuta, YSA; hem i stap long ples ia wetem famli blong Gerrit de Jong, fas din blong Kolej blong Naes Art. “Famli de jong i helpem mi blong andastanem wanem nao i wan gospel famli,” hem i talem.
Afta long BYY, Jean i go long Stanford Yunivesiti long Palo Alto, Kalifonia, YSA, mo long ples ia nao, hem i mitim Walter A. Gong. “Hem i wan Kristin man finis, mi kwiktaem hem i kam blong andastanem wanem nao i stap insaed long gospel ia we i kambak. Hem i joenem Jos, mo wan yia afta, tufala i mared long Sol Lek Tempol. Tufala i kam ol profesenol tija mo tufala tugeta i spenem moa long 70 yia blong tij.
Elda Gong i talem: “Papa i kam wan petriak, mo from se hem i stap givim ol petriakel blesing insaed long hom blong mifala, hom blong mifala i fulap wetem bigfala respek long lav we God i gat long wanwan long ol pikinini blong Hem.”
Long 23 Disemba 1953, long Redwud Siti, Kalifonia, fas pikinini blong Jean mo Walter i bon. Olgeta tri pikinini evriwan. Jean i eksplenem: “Nem blong hem Gerrit i blong Denmak, blong givim ona long Gerrit de Jong.” “Medel nem blong hem, Walter, i blong ona long papa blong hem. Mo famli nem blong mifala i blong Jaena, we i ona long ples we famli blong hem i kamaot long hem.”
Jean i talem se Gerrit i luklukgud long yangfala brata mo sista blong hem, Brian mo Marguerite. “Hem i laekem blong helpem olgeta, iven wetem ol smol samting, olsem blong tijim olgeta blong fasem rop blong sus.” Hem i tingbaot se hem i gobak long haos, wan dei, afta jos, mo i harem Gerrit mo Brian, tufala i stap storian mo tufala i stap talem se oli ting se wan toktok long sakramen long dei ia, i mekem man i slip. Mekem se mi givim jalenj long tufala: “Naoia, bae yutufala nao i givim wan toktok we i moa gud long hemia.” Tufala i akseptem jalenj ia mo tufala i stat blong lisingud long evri toktok,” hem i talem.
Taem hem i yangfala, Gerrit i lavem blong go wokbaot long bus wetem ol nara yang man insaed long wod blong hem. Wally Salbacka, wan fren blong longtaem, i tingbaot wan taem we oli bin go kamp. “Mi stap ia wetem Gerrit mo brata blong hem, Brian, mo wan fren we i no memba blong Jos blong yumi. Mi no save olsem wanem, mifala i stat blong singsing ol hym. Gerrit i singsing tiun, Brian i singsing tena, mo mi singsing bes. Ating mifala i singsing 10 o 20 hym olsem, from mifala i glad nomo blong singsing. !Hem i wan gudfala eksperiens! Fren blong mifala we i no memba, i sek.”
Brata Salbacka tu i tingbaot se long hae skul, Gerrit i bin askem long gel we oli singsing mo danis blong sapotem tim blong skul, blong oli mekem wan we i no gat saon blong tim we i plei jes. Hem i talem: “Hem i winim tingting blong olgeta se blong sapot long tingting, i gud blong evriwan, mo tim blong ol gel ia oli bin kam long wan maj.”
Stat long lef: Marjorie mo Gordon B. Hinckley we i talem halo long Gerrit mo Susan long lafet blong mared blong ol Gong. Olsem wan misinari long Taewan, Elda Gong i tijim wan famli, mo plante yia afta, olsem wan Jeneral Atoriti, hem i mitim apuboe blong wan long gel blong famli ia. Long Vietnam, Elda mo Sista Gong i pentem wan wol olsem wan wei blong givim glad long ol pikinini we oli stap fesem ol jalenj. Ol memba blong Gong famli oli kam tugeta wanples wetem olgeta we oli bin help blong pentem wol ia long Vietnam.
Afta long hae skul, Elda Gong i go long Brigham Yang Yunivesiti. Stat long 1973 i to kasem 1975, hem i go long misin long Taewan Taepe Misin, afta i gobak long BYY, mo long ples ia, long 1977, hem i kasem wan digri long Esia stadi mo yunivesiti stadi.
Fren mo Mared
Afta long misin blong hem, Elda Gong i volontia blong holem ol Sandei naet faeasaed long Provo Misinari Trening Senta. Ol faeasaed ia oli help blong mekem ol misinari we oli stap go long Taewan blong savegud ol pipol, ol kastom mo kalja longwe. Wan long ol misinari ia, hem i Sista Susan Lindsay, blong Teilasvil, Yuta, gel blong Richard P. mo Marian B. Lindsay. Brata Lindsay i wan memba blong Seken Kworom blong Olgeta Seventi. “Mi filim se Susan i wan we mi bin save hem longtaem finis” Elda Gong i talem.
Tu yia afta, sam manis afta we Susan i kambak long BYY afta long misin blong hem, Gerrit i bin stap long Provo wetem famli blong hem. Papa blong hem i stap tij long yunivesiti, mo Gerrit i bin mekem plan blong go visit blong tu wik. Hem i seftem visit ia i go long fo wik, mo hem mo Susan i stap deit evri dei. Afta, Gerrit i aot i go mekem praktis blong hem long Hawae bifo i gobak long Oksfod.
“Mitufala i stap long tu defren ples mo stap fren,” Elda Gong i talem. “Mi stap traem blong stadi long Inglan, mo semtaem, traem blong lanem evri samting we mi save abaot hem, krosem solwota ia blong Atlantik.”
Sista Gong i talem: “Mitufala i promes blong mared ova long telefon.” Hem i kam hom bakegen long Tangkyu Lafet, mo mitufala i mared long fas dei we tempol i open long niu yia.” Tu wik afta, tufala i flae i go long Inglan blong statem wan niu laef tugeta.
“Taem ol pipol oli mared, oli stap tokbaot tu famli we oli kam wan,” Elda Gong i talem. Mo hemia nao i hapen tru long mi. Mi filim pat blong Lindsay famli, semmak olsem we mi pat blong Gong famli.”
Wan Woklaen we I Saen
Afta we hem i spendem wan sot taem long tij long Oksfod, wok blong Gerrit i jenis i go long gavman seves long Wasington D.K., YSA. Long 1984, hem i wan long woktim blong Reagan-Bush ileksen kampen, mo hem i serem ofis wetem Mike Leavitt, we i kam gavna blong Yuta afta. Brata Leavitt i talem: “Gerrit i save luklukgud ol samting mo i gat tingting, be man i save gud hem from fasin blong hem we i kaen oltaem.”
Long 1985, Gerrit i stap olsem spesel asisten blong Anda Sekretari blong Stet Dipatmen. Long 1987, Gerrit i stap olsem spesel asisten blong ambasada blong Amerika long Beijing, Jaena. Mo stat long 1989 i go kasem 2001, hem i bin stap long plante defren posisen long Senta blong Stratejik mo Intanasonol Stadi long Wasington D.K. Afta, hem i gobak long wol blong skul mo i akseptem wan posisen olsem asisten long presiden blong mekem ol plan mo mekem ol stadi long Brigham Yang Yunivesiti. Hem i spendem naen yia long wok ia.
Carri Jenkins, we i asisten long presiden blong yunivesiti komunikesen long BYY, i bin stap long ofis long narasaed doa. Hem i tingbaot paoa blong Gerrit Gong blong stap leftemap tingting blong olgeta raon long hem. “Sapos yu no gat tras long yuwan se bae yu save mekem wan wok we i had, be hem i gat tras ia blong yu. “Hem i mekem evri samting we hem i gat paoa from blong givim kaonsel long yu, givim hop long yu, mo letem yu go fored mo pruvum yuwan.”
Federal jaj, Thomas B. Griffith, we i bin save Elda Gong long Wasington mo long BYY, i tokbaot wan taem wetem hem olsem: “Long en blong storian, yu luksave se yutufala i jes tokbaot yuwan nomo. Hem i save lisin long man. Mo hem i askem ol kwestin we i mekem yu yu tingting.”
Cecil O. Samuelson, emeritus Jeneral Atoriti Seventi mo foma presiden blong BYY, i talem se Elda Gong i “wan kwaet man, be wil blong hem i ron oltaem.”
Famli Laef
Gerrit mo Susan Gong, tufala i kam papa mo mama blong fo boe—Ebraham, Samuel, Christopher mo Matiu—we i groap long ol defren ples.
“Taem mifala i stap long Beijing, ol pikinini blong mifala i gat blesing blong kam bes fren blong wanwan long mifala,” Elda Gong i talem.
“Long wan han, oli gat janis blong luk bigfala ples ia we i wol,” Sista Gong i ademap. “Long nara han, i helpem mifala blong kam wan famli we i joen strong tugeta. Ol boe blong mitufala, oli stap storian yet long ol bes samting we mifala i bin mekem olsem papa mo mama, mo givim long olgeta olsem ol brata.”
Elda Gong i talem: “Long wan taem mifala i tekem kas mane blong evri poen blong travel we mifala i winim. “Mifala i letem wanwan i jusum ples we hem i wantem go long hem. Mifala i stat long Wasington D.K. we mifala i stap laef long hem, mo go long Inglan, mo Tsek Ripablik, Gris, Teki, India, Jaena mo Japan.
“Mifala i gat wan strong rul long trip ia,” Susan i talem. “Long weaples bae mifala i go long hem, bae mifala i kakae wanem ol lokol pipol oli kakae.” Long en, long Japan, long en blong trip, Elda Gong i talem ol boe blong hem se bae hem i karem olgeta i go long wan restrong we oli save gud from mit blong buluk blong hem. Long MakDonal, !fo boe we oli hanggri gud mo papa mo mama blong olgeta, oli kakae 17 hambega!
“Tugeta, Mama mo Papa i lukluk bigwan blong lanem samting tru long eksperiens,” Ebraham i talem. “Papa i tingting bigwan long olsem wanem nao ol eksperiens oli jenisim fasin blong ol pipol, wetem kalja blong olgeta tu.” Ebraham i talem se papa blong hem “i lukaot olsem wanem hem i toktok, from hem i mas minim fulwan mo biliv fulwan long wanem hem i stap talem.”
Sam i tingbaot se “nomata hem i bisi tumas long Stet Dipatmen, Papa i tekem taem evri naet blong tijim mo trenem mi from matematik kompetisen long klas 3 we mi bin wantem joenem, we oli singaotem ‘Jalenj 24.’ Hem i talem se sapos mi winim, bae mifala i gat wan pati wetem fulap aeskrim mo 24 kaen swit krim antap long aeskrim.” Sam i go kasem faenol, be i no win. Be Gong famli i kakae aeskrim nomo. Be i no bin isi blong faenem 24 defren kaen krim—wan oli mekem i tes blong mit blong buluk we i drae.
Christopher mo Matthew, tufala i tokbaot hamas nao tufala i laekem mo glad long tras, lav mo divosen we papa mo mama blong olgeta i serem wetem olgeta. Hem i wan lav we Elda mo Sista Gong i serem wetem wanwan long olgeta, mo tu, wetem wanwan boe mo ol nara famli.
Susan i talem: “Hem i wan papa we i gat tingting long ol pikinini, mo tu Gerrit i wan we i gat tingting long papa mo mama blong hem, mo tu long ol brata mo sista blong hem.” “Ol rol ia oli impoten long hem. Hem i helpem yumi blong andastanem se ol famli rilesensip oli impoten i bitim ol narawan.”
Jos Eksperiens
Hem i bin go long fultaem misin long Taewan Taepe Misin, i bin wan hae kaonsela, wan hae pris grup lida, wan stek Sandei Skul presiden, wan seminari tija, wan bisop, wan stek misin presiden, wan stek presiden mo wan Eria Seventi.
Long eni samting we oli singaotem hem blong mekem, mo long famli laef blong hem tu, oltaem hem i stap soemaot ol fasin ia. “Hem i luk evriwan olsem wan boe o gel blong Papa long Heven,” Sista Gong i talem. “Be antap long evri samting, hem i lavem Lod.” Long ful hat blong hem, hem i wantem blong bildimap kingdom mo blesem ol pikinini blong Papa long Heven.”
Mo hem i laekem tumas waef blong hem. “Eni samting we oli askem mi blong mekem, Susan i stap long saed blong mi,” hem i talem. Hem i save toktok wetem evriwan mo hem i save go long ol nara pipol. Oltaem hem i glad blong go long ol niu ples mo traem ol niu samting, mo mi mi glad long hemia.”
Seves wetem Olgeta Seventi
Long 3 Epril 2010, oli sastenem Elda Gerrit W. Gong olsem wan Jeneral Atoriti Seventi. Oli givim wok long hem blong stap long Esia Eria Presidensi, we hedkwota blong hem i stap long Hong Kong. Afta long hemia, hem i kam Presiden blong Esia Eria. Long 6 Oktoba 2015, oli sastenem Elda Gong i go long Presidensi blong Olgeta Seventi, mo eksperiens blong hem long intanasonol level i gohed, mo hem i gat ol eria riviu long ol defren pat blong wol olsem Afrika mo Sentrol Amerika.
“Yu stap mitim mo yu kam blong lavem olgeta Sent long ol ples ia,” hem i talem. “Yu filim se hem i wan blesing blong ol pipol oli tokbaot fet blong olgeta long yu, from eksperiens we oli bin gat we God i bin wok insaed long laef blong olgeta, mo i kam pat blong save andastanem huia God mo olsem wanem Hem i lavem wanwan long yumi.”
“Taem mifala i stap sendem Elda Gong long eni situesen, olgeta we oli wok wetem hem oli stap faenem wan niu fren,” Presiden Russel M. Nelson i talem. “Save blong hem i bigwan, be tingting blong hem i stap daon. Hem i save storian wetem ol pipol long evri level, mo oltaem hem i rere gud mo i save winim tingting blong man.”
Stat long lef: Long Taelan, Elda Gong i mitim Eminens Francis Xavier Cardinal Kriengsak Kovithavanij, Katolik Akbisop blong Bangkok. Elda Gong i laekem blong go long trip wetem wanwan long ol boe blong hem, olsem wan trip ia long Kanada wetem boe blong hem, Sam. Elda Gong i serem ol tingting blong hem long saed blong Bred blong Laef wetem ol seminari mo institiut tija long 2017. Sista Gong i toktok insaed long hom blong wan memba blong Kambodia.
Koling blong Hem Olsem Wan Aposol
Taem Presiden Nelson i givimaot koling long Elda Gong blong stap olsem wan memba blong Kworom blong Olgeta Twelef Aposol, profet, “wetem lav, i tekem han blong mi, mo wetem dia Susan long saed blong mi, i givimaot tabu koling ia long mi we i kam long Lod, we i mekem mi nomo pulum win” (“Kraes I Bin Raesap Tudei,” Liahona, Mei 2018, 97). Hemia i putum tingting blong hem i stap daon, be hem i sua long lav mo tras we hem i gat long Lod, nao Elda Gong i bin akseptem koling ia. Oli bin sastenem hem long 31 Maj 2018. Lod i bin rere gud long hem, mo naoia bae hem i givhan olsem wan “spesel witnes blong nem blong Kraes long ful wol” (luk long D&C 107:23).