Ruo Jon̄ak in Tōmak
Jān Elder Wilford W. Andersen
Jān Jiljilimjuonn̄oul eo
Jān juon kōnono ilo juon nokon in jota, “The Faith to Reap,” kar letok ilo Brigham Young University–Idaho ilo Maaj 17, 2015.
Tōmak ilo Jisōs Kraist im Pinmuur eo An ej tōmak n̄an jerbal. Ej tōmak ilo kajoor eo An, ejjab am̧.
The Golden Harvest, jān David Merrill, courtesy of Church History Museum
KRAIST EJ JAR ILO JIKIN KALLIB Gethsemane, jān Hermann Clementz
Liai im baam̧le eo an raar pād ilo āne jem̧aden jejjo̧ wōt raan ko ke Irooj eaar jiron̄ e bwe en kōro̧o̧l ļo̧k ļōm̧aro nejin n̄an Jerusalem n̄an būki pileij brass ko jān Leban. Ekkā ad jab lo jum̧ae ko an ļōm̧aro ruo nejin Liai, Leman im Lemuel, ak raar lukkuun kōņaan etal. Raar bōk tōmak n̄an kajjieon̄.
Leman, im tokālik Lemuel ippān ļōm̧aro jein im jatin, raar kajjitōk pileij ko ippān Leban. Jeim-jati rein raar juļo̧k mweie ko an baam̧le eo aer im enan̄in aolepen mour ko aer kōn jerbal in. Ilo menin, tōmak eo an Leman im Lemuel eaar makunļo̧k, im raar jino bōjrak. Nipai, ilo tūrājet eo juon, eaar jutak kōn ņae kauwōtata im pere.
“Āinwōt Irooj emour, im āinwōt ad mour, jejamin naaj wanlaļļo̧k n̄an jemād ilo āne jem̧aden m̧ae iien jej kōtōprak men eo Irooj eaar jiron̄ kōj.
“Kōn menin, jen tiljek ilo kōjparok kien ko an Irooj” (1 Nipaii 3:15–16).
Innām Nipai eaar kōjerbal tōmak eo an eļap, kar būki pileij ko jen Leban, im kar jepļaakļo̧k ippān ļōm̧aro jein n̄an ippān Jemāeer ilo āne jem̧aden.
Eaar wōr ruo jon̄ok in tōmak. Jon̄ok eo an tōmak jinoin ej kajjieon̄, tōmak eo n̄an m̧ad jake sickle ko ad. Jon̄ok eo kein karuo ej tōmak n̄an jerbal. Eļapļo̧k jen baj tōmak n̄an bun̄raake sickle eo am—ej tōmak n̄an jerbal.
Leman im Lemuel eaar wōr aer tōmak n̄an kajjieon̄, ak Nipai eaar wōr tōmak n̄an jerbal. Leman im Lemuel eaar bwe tōmak n̄an bun̄raake sickle ko aer, ak Nipai eaar wōr tōmak n̄an jerbal.
Oktak eo kōtaan tōmak in n̄an bun̄raake sickle ko am̧ im tōmak n̄an jerbal enaaj kōm̧m̧an aolep oktak ilo mour ko am. N̄an bar mour ippān Jemedwōj Ilan̄ im mour lem̧ōņōņō lan̄lōn̄ ilo laļ in, jej aikuj kōļapļo̧k tōmak in n̄an jerbal.
Jaar tōmak kallim̧ur ko rekabwilōn̄lōn̄ jān Irooj—kallim̧ur ko an lem̧ōņōņō im lan̄lōn̄ ilo mour in im mour eo tok juon eutiejtata. Ak apan̄ ko im būrabōlōm̧ ko ad kajjojo raan rej tin kakkure kōjatdikdik eo ad. Ad āne in kallim̧ur ejino ettoļo̧k, kōn menin, jej jino ebweer.
Jej ļōmņak, “ebwe an pen n̄an aō tōpar jibadbad ak bōk kōjeram̧m̧an en.” “Ilo m̧ool, Irooj eaar peek kōn ro jet ke Eaar kōm̧m̧ane kallim̧ur in.”
Jaab, Eaar ļōmņak kōn kwe im n̄a. Jej aikuj bōk tōmak n̄an būki kōjeram̧m̧an ko ad—juon tōmak ekajoor me emaron̄ ukōt kallim̧ur ko ad ilju im jekļaj n̄an tōre in. Jej aikuj tōmak n̄an jerbal.
Ta lukkuun tōmak in, im elmen ad maron̄ kōļapeļo̧k?
Bōk Tōmak ilo Jisōs Kraist
Juon, ejjab āinwōt tōmak eo n̄an bun̄raake sickle ko am, tōmak n̄an jerbal ejjab tōmak wōt ilo kwe make. Ejjab āinwōt lōke kōj make ak m̧wiļ ko renana. Ejjab tōmak eo ilo baam̧le ak ro m̧ōttam̧—aolep men kein rem̧m̧an. Tōmak n̄an jerbal ej tōmak ilo Jisōs Kraist im Pinmuur eo An. Ej tōmak ilo kajoor eo An, ejjab am̧.
Ke iaar kūr āinwōt juon būreejtōn an Meza Arizona Maricopa Stake, Elder W. Mack Lawrence, ilo tōrein eaar juon Ritōl Eoutiej an Jiljilimjuonn̄oul, kar karuwaineneik kōrā eo ippa im n̄a n̄an opiij eo an stake būreejtōn eo im kar letok kūr in. Iaar bōke. Innām eaar kūr kom̧ro n̄an deļo̧n̄ ļo̧k ilo ruum̧ in high council eo im n̄an lukkuun ļōmņake em̧m̧aan ro renaaj aō rikakpilōklōk. Ke ij deļo̧n̄ ļo̧k ruum̧ eo, Iaar lo pija in aolep stake būreejtōn ro raar jerbal m̧oktaļo̧k ilo stake eo jen ke eaar ejaak, im būruwōn m̧ōņōņō. Raar ritōl ro rem̧m̧an jim̧or ilo Kabun̄ im jukjukinpād.
Iaar kalimjōk kōrā eo ippa im ba, “Kathleen, Ijjab jeļā imaron̄ kōm̧m̧an menin. Ijjab āinwōt er.”
Eaar ba, “Ekwe, jab ba n̄an n̄a. Kwoj aikuj ba n̄an Elder Lawrence.”
Kōn ilbōk eo aō, ke iaar jiron̄ e ke ijjab maron̄ in kōm̧m̧ane kūr in, Elder Lawrence eaar uwaak, “Ekwe, ij ļōmņak kwoj m̧ool.”
Innām eaar ba, “Bōlen kwoban kōm̧m̧ane, Brother Andersen, ak Irooj emaron̄e. Ewōr An kajoor n̄an kōm̧m̧ane jerbal in An, im eļan̄n̄e kwonaaj wānōk im lukkuun jerbal, Enaaj kōm̧m̧ane. Kwonaaj jeļā.”
Im Eaar.
Eļapļo̧k jen baj tōmak n̄an bun̄raake sickle eo am—ej tōmak n̄an jerbal. Kōn tōmak make, ej kūnōōrtok āinwōt n̄e ej atin pen. Innām jej jino pere. Ak tōmak n̄an jerbal ej tōmak Irooj Jisōs Kraist. An wūjlepļo̧k.
Leļo̧k Ankilaam̧ n̄an Ankilaan Anij
N̄an kōjerbal tōmak in n̄an jerbal, jej aikuj in jeļā bwe ikdeleel im jerbal ko rej jokkon wōt ilo ankilaan Anij. Jeban kōjerbal tōmak n̄an jerbal eļan̄n̄e Anij ejjab errā ilo melaaj eo. N̄an bōk jipan̄ eo An, jej aikuj leļo̧k ankilaad n̄an E.
Kōnke rikanaan Nipai ilo Bok in Hilamōn eaar juon em̧m̧aan ewānōk im tiljek, Irooj eaar jiron̄ e, “Inaaj kōjeraam̧m̧an eok indeeo; im Inaaj kōm̧m̧an bwe kwōn kajoor ilo naan im kōm̧m̧an, ilo tōmak im jerbal; aaet, em̧ool aolep men naan kōm̧m̧an n̄an eok ekkar n̄an am̧ innaan.” Ej juon kallim̧ur. Innām Irooj eaar ba, “Bwe kwōj jamin naaj kajjitōk men eo āinjuon n̄an Ankilaō” (Hilamōn 10:5).
Im Moronai eaar jiron̄ kōj menin: “Im Kraist eaar ba: Eļan̄n̄e kom̧ naaj tōmak ilo N̄a kom̧ naaj wōr ami kajoor n̄an kōm̧m̧an jabdewōt men emennin aikuj ilo N̄a” (Moronai 7:33).
Kaenōm̧m̧an ikdeleel ko ad n̄an anikilaan Anij ej juon ijjino n̄an tōmak n̄an jerbal.
Ke ļaddik ro neju raar dik, raar ikkure ilo tiim in ikkure basketball eo an high school. Mokta ekkōn kijon̄ jar m̧okta jen jinoin kajjojo ikkure. Ke iaar reilo̧k jen jikin jijet eo, ekkā aō kōļmenļo̧kjeņ ta eo rekar jar kake. Eļan̄n̄e raar jar bwe ren wiin, jar ko aer eaar likjab tōmak n̄an jerbal. Eaar alikkar jen jon̄ok ikkure ko raar luuji. Irooj eaar jab kwaļo̧k ikdeleel eo aer bwe ren aikuj in wiini kajjojo ikkure.
Ilo naan ko jet, Anij enaaj jipan̄ kōj n̄an tōpar wōt kōttōbar ko me rem̧m̧an n̄an kōj. Kōn An iakwe kōj, im Ejeļā ļo̧k jen kōj ta eo enaaj em̧m̧an n̄an kōj. Jejjab ke kam̧m̧oolol kōn menin. Jej aikuj jar kajjojo raan bwe Jemedwōj Ilan̄ en kōjeram̧m̧an kōj kōn ikdeleel ko rewānōk n̄an kaenōm̧m̧an ankilaad n̄an E. Jej aikuj jeļā kilen jar āinwōt kar Irooj ilo Jikin Kallib Gethsemane bwe ankilaan Anij, ejjab ad, en dedeļo̧k (lale Luk 22:42). Bwe jen maron̄ kōjerbal tōmak n̄an jerbal.
Etal im Jerbal
Jibadbad eo kein kajilu an tōmak n̄an jerbal ej jerbale. Rijilōk Jemes eaar kalikkar bwe n̄e tōmak ejjab jerbal innām emej. Tōmak n̄an bun̄raake sickle ko ad ebōk tōmak, ak tōmak n̄an jerbal eļap jen baj tōmak. Men̄e devil ej tōmak, Jemes eaar je, im uddiid (lale Jemes 2:17, 19).
Iaar ron̄ juon bwebwenato kōn juon baba eo eaar lo an leddik eo nejin edik bukwelōlōk iturin peet eo an, jar bwe Jemedwōj Ilan̄ en kōjparok bao ko redik jān aer deļo̧n̄e bao in aujiid eo an ļaddik eo jein ekar kōm̧m̧ane im kar likūti ilo nam̧ōj. Ejja raan eo wōt, baba eo ej jino bwilōn̄. Eaar jeļā bwe aujiid eo eaar em̧m̧an. Eaar jipan̄ ļaddik eo nejin.
Eaar ba n̄an leddik eo nejin “Iaar ron̄ am̧ jar in jibbon̄ bwe Jemedwōj Ilan̄ en kōjparok bao ko reddik jān kein aujiid eo an ļaddik eo jeim̧.” “Ak jet iien men ko renana rej waļo̧k men̄e jej jar men̄e reban waļo̧k.”
Eaar uwaak, baba, “Ijeļā bwe eban jibwe jabdewōt bao.”
Baba eo eaar ba, “Ij nōbar kōn am̧ tōmak, neju.” “Ak eļan̄n̄e enaaj jibwe jabdewōt bao, ij kōtmene bwe eban kakkure tōmak eo am̧.”
Eaar ba, “Baba, eban.” “Ijeļā eban.”
Baba eo eaar kajjitōk, “Elmen bwe en baj ļap am̧ tōmak?.”
Leddik eo nejin eaar uwaak, “Kōnke ālkin aō jar,” “Iaar etal nam̧ōjļo̧k im juji kein aujiid bao eo an n̄an tipdikdikin.”
Em̧m̧an jar n̄an Jemedwōj Ilan̄ kōn kōjeram̧m̧an ko. Ak ālkin ad ba amen, jej aikuj ilo̧k im jerbale. Jeban kōtļo̧k an Irooj tōl need eļan̄n̄e jejjab kōņaan kōm̧akūt need. Ak jeban kajjitōk bwe En kōm̧m̧ane n̄an kōj ta eo jemaron̄e ak jej aikuj jerbale n̄an kōj make.
Jej aikuj jerbal jibadbad ko ko rem̧m̧an, im jej aikuj lukkuun jerbale n̄an kōjparok kien ko. Lukkuun kajoor in bujen eo em̧ool ilo kōj im lukkuun kajoor in tōmak eo n̄an jerbale ejjab waļo̧k n̄e jej bōk ilo jeļā in bwe Anij ej kōjparok kallim̧ur ko An ak n̄e jej bōk ilo jeļā in n̄an kōjparok kallim̧ur ko ad. Mool eo eļap ej ta eo rioktak ro rej kallim̧ur kake n̄an m̧oolin. Jej aikuj jerbal.
Jab ebweer kōn likjab ko ak bōd ko am̧, ak kijejeto wōt ilo kōttōbar ko am̧, im pen. Tōmak eo n̄an jerbal ejjab bōk wānōk, ak ebōk kijejeto.
Ij kūr kom̧ n̄an kōļapļo̧k tōmak n̄an jerbal. Likūt am̧ tōmak ilo ad Rilo̧mo̧o̧r, Jisōs Kraist, im ilo Pinmuur eo An. Kōm̧m̧an bwe ikdeleel ko am̧ ren jekkoņ wōt ilo Ankilaan. Innām ilo̧k im jerbal kōn aoelpen būruwōm̧, ļōmņak, im kajoor, kōn juon kōttōbar im Ejjeļļo̧k apan̄, ejjeļo̧k jorrāān, ejjeļo̧k likjab eo enaaj jamin wōrļo̧k n̄an tōmak eo kalle.