Rūm̧m̧an Ded ro
Katakin Eō bwe in Kelo̧k: Bōk En̄jake in Un̄n̄are Peid Make ilo Wāween eo an Irooj
Rijeje eo ej jokwe ilo California, USA.
Valerie Durrant ej jān California, USA, im ekar m̧areiki ļeo pāleen, Ryan, ium̧win emān iiō ko. Ej kab erom̧ juon m̧am̧a n̄an juon ļaddik nin̄nin̄. Ej iakwe yoga, jin̄a, riit, im tallōn̄ toļ.
Jej aikuj in pedped wōt ioon Jemedwōj Ilan̄ im Jisōs Kraist im likūt ad make kijejeto āinwōt jej kōttōbar n̄an erom̧ un̄n̄are peid make.
Kōmeļeļe jān Getty Images
N̄e jej ļōmņak kōn juon bao jidikdik eo ej ekkatak ekāke, emakijkij ad pijaik kajjieon̄ eo āliktata im ebun̄bun̄: diwōjtok jān el eo, erļo̧ke pā ko pein, im kālōn̄ļo̧k n̄an mejatoto. Mokta jān tōprak eo āliktata, enej lōn̄ ro rej āinwōt elōn̄ ro relikjab im jem̧ļo̧kļo̧k ippān bao ko rekar jab kālōn̄ļo̧k n̄an mejatoto ak ijjelo̧kin rekar wōtlo̧kļo̧k n̄an laļ.
Āinwōt juon bao eo ej ekkatak n̄an kālo̧k, kōj barāinwōt maron̄ wōtlo̧k im bar wōtlo̧k ilo ad kajjieon̄ n̄an bōk un̄n̄are peid eo ad make. Bōtaab eļan̄n̄e jej oktaļo̧k n̄an Irooj kōn jipan̄ im likūt kijejeto in, jemaron̄ ekkatak ewi wāween an kije n̄e mour ejjab jejjet āinwōt kar karōke im n̄an pedped wōt ilo E im n̄e mālijjon̄ ko rej jino kajoor n̄an kōj n̄an maron̄ kotak kōj make.
Ekkatak n̄an Kelo̧k
Eļan̄n̄e ekkatak n̄an kelo̧k ej juon jerbal ekōmetak, etke juon bao emaron̄ em̧m̧akūt jān el eo? Kōnke ej jinen. Mōttan eo kein kajuon ilo mour ko an bao jiddik ko, jinen enaaj bōktok m̧ōn̄ā kaju n̄an er ilo el eo. Ak ilo iien, ej jino jino likūt m̧ōn̄ā ko inamōj in el eo bwe ko rekāāl ren aikuj diwōj namōjļo̧k jān jikin ko rejokņak n̄an bōk mour.
Ejja jerbal in wōt jej kijenmej ilo ad ekkatak n̄an erom̧ un̄n̄are peid make—ak jejjab kōtmāne n̄an maron̄ kelo̧k make iaad kiiō.
Āinļo̧kwōt juon jinen juon bao ej kōtļo̧k an bao jiddik ko nejin kelo̧k jān el eo, Jemedwōj Ilan̄ ej kōtļo̧k ad etal jān mālijjon̄ ko im en̄jake ko me remaron̄ kōmetak, kallulu, kabbeerer. Karōk in lo̧mo̧o̧r eo An ej juon jon̄ak n̄an jipan̄ kōj erom̧ āinwōt E, bwe aolep apan̄ ko jej jelm̧ai remaron̄ erom̧ juon iien em̧m̧an n̄an ekkatak im eddōkļo̧k. Āinwōt jinen juon bao, Jemedwōj Ilan̄ ej letok n̄an kōj aenōm̧m̧an im tōl kōnke jipan̄ eo wōt An jemaron̄ bōke im kōkōm̧anm̧anļo̧k ājmour eo ad ilo en̄jake im kōļmenļo̧kjeņ.
Kōjopelpel Pā Ko Peid Make
Men̄e Jemedwōj Ilan̄ ej m̧ōttad, jej jab aikuj kōtmāne bwe En kōm̧m̧ane men otemjej n̄an kōj. Ekōņaan bwe jen kōjerbal anemkwoj in kālet eo ad im jipan̄ ko Ekar litok n̄an kōj ilo iaļ eo ad n̄an un̄n̄are peid make.
N̄an waanjon̄ak, n̄e jej ioon metak bar, illu, ak luuj, Ekōņaan bwe jen ko̧o̧njeļ Ippān, ak jejjab aikuj in bōjrak ijeņ—jej aikuj in kōm̧m̧ane ijo em̧m̧antata n̄an m̧akūtkūt kōn im̧we ko Ej litok n̄an kōj; n̄an kōjparok kien ko; n̄an etal n̄an tampeļ eo n̄an pukot aenōm̧m̧an, kaenōm̧m̧an, im uwaak ko; n̄an likūt wōt ilo ļōmņak kapilōk in kanaan eo; im n̄an lōke ilo karōk eo An n̄an kōj.
Jemedwōj Ilan̄ ekar letok n̄an kōj elōn̄ kein jerbal ko n̄an un̄n̄are peid make, ak eļan̄n̄e jekar bōk aolepān im jej wōt loe ad bōjrak ak en̄taan kōn jorrāān in kōmālij, jipan̄ ko jet remaron̄ menin aikuj. Ewōr iien ko n̄e komaron̄ aikuj in oktakļo̧k n̄an juon eo etijem̧ļo̧k kōn jorrāān in kōmālij ak bōk ko̧o̧njeļ jān bisop eo am̧ kōn eļapļo̧k tōl n̄an am̧ em̧m̧akūt m̧aanļo̧k wōt.
Likūt wōt ilo ļōmņak, bwe eļan̄n̄e jej kajjitōk naan in kapilōk jān ro jet aolep iien jej dibōjļo̧k juon kein kabbōjrak ioon iaļ eo, jemaron̄ luuji iien ko raorōk n̄an ekkatak im eddōkļo̧k eo ad make. Bar juon alen, jej aikuj likūt juon jon̄an eo ebwe an kijejeto eo ad make n̄an em̧m̧akūt m̧aanļo̧k.
Ļoore Jon̄ak eo an Irooj
Ilo Katak im Bujen ko jākjen 9, Oliver Cowdery kar kōnanaik kōn an kajjieon̄ in ukōte piliej ko Bok in Mormon eo ilo jab bōk jabdewōt “Ijello̧kun wōt n̄an kajjitōk e [Anij]” (eoon 7). Innām kar rōjan̄ e n̄an “ekkatak kake ilo ļōmņak eo [an],” itok n̄an jem̧ļo̧k eo an make, innām “kajjitōk ippān [Anij] eļan̄n̄e e jim̧we” (eoon 8).
N̄e jej ļoor jon̄ak in, Jemedwōj Ilan̄ ejjab kajojoļāār e kōj n̄an lukkuun pedped wōt ioon maron̄ ko ad im ļōmņak ko ilo ad kōjparok kōj jān jorrāān in kōmāļij eo ad make. E ej kōtļo̧k ad bōk iien ko rem̧m̧an n̄an ekkatak wāween ad kōjerbal anemkwoj eo ad make. Pukot uwaak ko n̄an kajjitōk ko ad im pukot wāween ņamejļan jorrāān ko ad kōn jipan̄ eo An ej ta eo enaaj jipan̄ kōj eļaptata n̄an erom̧ āinwōt E. Kōn menin ilo ļōmņak, jemaron̄ kajjitōk Ippān bwe en kwaļo̧k n̄an kōj ewi wāween ad erom̧ jokun wōt juon ilo en̄jake ijjelo̧kin baj kajjitōk Ippān n̄an kōkōm̧anm̧anļo̧k kōj.
Ilo ad kōjerbale im bar kōjerbale anemkwoj in kālet eo ad ilo wāween in jabdewōt iien en̄jake ko naaj mālijjon̄i, jej jidik kōn jidik erom̧ em̧m̧anļo̧k im ļapļo̧k lōke ippād. Iien in jejjab aikuj in lukkuun m̧ōkade ekkāke kiiō, jemaron̄ rie bwe E ej pād ippād aolep ilo iaļ in im Ej lan̄lōn̄ ilo m̧ool bwe E ej jipan̄ kōj erom̧ em̧m̧anļo̧k jidik kōn jidik. Kajjojo raan ej bar wōr juon iien em̧m̧an n̄an tōparļo̧k juon jikin eutiejļo̧k—m̧aanjabpopoik kōj n̄an raan eo n̄e jenaaj maron̄ kelo̧k kōj make.