Juon Unin Tōl an RIKKOTAK ro n̄an Jutak Pen
Rijeje eo ej jokwe ilo California, USA.
Juon eoon emaron̄ kōm̧m̧ane juon oktak eļap—aaet ilo jiāe ekkotak ko.
Ke ikar juon eo ej pād ilo kūlaaj ratimjuon ilo high jikuuļ, kooj in ekkotak eo ekar kajjitōk bwe in kobaļo̧k ilo ekkotak.
“Mmm … jab kom̧m̧ool,” ikar ba. “Ejjab ikkure eo aō.”
Ak ekar dāpiji wōt. Ium̧win wiik ko.
Āliktata, ikar kajjieon̄ deļo̧n̄e. Ekar jim̧we: Ikar kōņaan ekkotak. Ikar lukkuun āinjuon jinoin; ānbwinnū ejjan̄in kar kōm̧m̧an kain dein m̧okta. Ak ikar rūttoļo̧k im iakwe en̄jake in em̧m̧an kōn kāājimourur. Ikar barāinwōt iakwe rūkkure ro m̧ōtta im iien jiāe ko. Im ekar jino em̧m̧an aō kōm̧m̧ane.
Kiiō ekkotak ej juon m̧ōttan ko reļaptata ilo mour eo aō. Ij kōmālmel aolep raan diktata ruo ak jilu awa ko, ekkotak lōn̄ļo̧k ioon aeram̧ ilik, ekkotak jān būļoor lōn̄ļo̧k ioon bōram̧, jijet im ekkotak lōn̄ļo̧k. (Im eļan̄n̄e kwojjab jeļā ta jabdewōt iaan men kein, jab inepata—barāinwōt n̄a!)
Āinwōt elōn̄ men ko jet, ekkotak ebōk iien im kijenmej, im jet iien emaron̄ in lukkuun pen. Jide, baam̧le eo aō aolep iien rej pād ijeņ rōjan̄ eō, men̄e ij ellotaan kōn jon̄an an metak ānbwinnū (eo ekkā an waļo̧k). Jema aolep iien ej wōr ippān bāāk in ice im naan in rōjan̄ ko repojak n̄e ij ro̧o̧l jān jikin kōmālmel. Im jinō aolep iien ej kaarmejete e im in maron̄ etal n̄an jikin jiāe ko.
Jejjo iiō remootļo̧k, ikar etal n̄an juon iaan jiāe ko ilo Philadelphia, Pennsylvania, USA. Ikar lukkuun em̧ōņōņō in jiāe ippān aolep rikkotak ro jān aolepān laļ in, ak ikar jidik inepata kōn aō pād ettoļo̧k jān baam̧le eo aō. N̄an kapidodoiki, jinō ekar kālet bwe en jejetok n̄an eō ilo taļboon jet eoon ko im ļōmņak ko rem̧m̧an aolep raan.
Bon̄ōn eo m̧okta jān iien jiāe eo, jet ajri rekar kōro̧o̧l er jān juon bade. Ikar ļōmņak enej kar em̧m̧an n̄an etal, kōn menin eo m̧ōtta ilo ruum̧ eo im n̄a kom̧ ar etal im lale. Ak iien eo wōt ikar jeļā bwe ejjab kain bade rot eo aō. Ekar lōn̄ jodikdik ro rej idaak dān in kadōk, kōbataat, kōnono naan ko renana, im eb eb ko renana. Ikar jeļā bwe ijjab aikuj in kar pād ijo, ak ikar inepata bwe eo m̧ōtta ilo ruum̧ eo emaron̄ ļōmņak. Ak rijiāe ro jet remaron̄ ļōmņak.
Innām juon men ekar itok n̄an kōļmenļo̧kjeņ eo aō:
“Kwōn jutak ilo jikin ko rekwojarjar.”
Ekar eoon eo em̧m̧antata ippa, im juon eo me jinō ekar jilkintok n̄an n̄a jibbon̄ in: Katak im Bujen ko 87:8: “Kōn menin, kom̧in jutak ilo jikin ko rekwōjarjar, im jab em̧m̧akūt, m̧ae raan in Irooj ej itok; bwe lo, e m̧ōkaj an itok, Irooj ej ba. Amen.”
Ijjab jeļā etke jinō ekar jilkintok n̄an eō eoon in ilo raan eo, ak ej juon eoon me em̧m̧an ippa ilo aolepān mour eo aō Ikar kakkilōklōke jān ke ikar dik, im ekar kakeememej eō alen im alen n̄an peran, pokake, im jutak kōn ta eo ij tōmak ie.
“Kom̧in jutak ilo jikin ko rekwōjarjar.”
“Inej etal,” eo ej jokwe ippa ekar ba. Ikar kōmeļeļeiki kōn eoon eo jinō ekar jilkintok n̄an n̄an jibbon̄ eo. “Ejjab juon jikin ij aikuj in jutak ie.”
Eo ej jokwe ippa ekar ba n̄an n̄a bwe ejjab kōņaan pād ijo, barāinwōt. Ekar em̧m̧an an en̄jake barāinwōt ak ekar jab kōņaan etal jān im maron̄ loe e āinwōt juon ejawiin. Ekar kam̧oolol eō im ba juon men, im etal.
Jibbon̄ōn eo tok juon, kōm̧ ar ron̄ bwe ālkin wōt am̧ro em̧m̧akūt, ajri ro rekar pād ilo bade eo rekar jibwe er im joļo̧k er jān jiāe ko kōn aer kar idaak kadōk im būki uno ko rekajoor.
Ij jan̄in kar bōk im̧we n̄an keememej eoon eo an m̧am̧a, imaron̄ jekkar n̄an pād ilo iien jiāe eo, barāinwōt. Āliktata ikar wiin i nōm̧ba juon, ikar lukkuun kam̧oolol bwe ikar maron̄ jiāe. (Ij ļōmņak ikar kam̧oolol e jinō aolep raan ekar jeje tok n̄an n̄a ilo taļboon eo.)
Wiin i juon jiāe ekkotak ej juon kōjeraam̧m̧an elukkuun alikkar kile im em̧ōkaj itok jān kōjparok kien ko. Ak Katak im Bujen ko 87:8 ejjab ba, “kom̧in jutak ilo jikin ko rekwōjarjar bwe kom̧in wiin i jiāe ekkotak ko.” Im Jon 14:15 ejjab ba, “Eļan̄n̄e kwoj kōņaan kōjeraam̧m̧an kiiō wōt, kōjparok kien ko.” Rilo̧mo̧o̧r eo kōjeraam̧m̧an kōj kōnke Ej iakwe kōj. Im jej kajjieon̄ erom̧ ro rekwojarjar im pokake kōnke jej lōke im iakwe Irooj.