Naan eo Āliktata
Kwojkwoj eo im Erom̧ Eļapļo̧k Āinwōt Kraist
Jān Elder D. Todd Christofferson
Jān Doulul eo an Jon̄oulruo Rijilōk ro
Jān juon kar ekōnono ilo Oktoba 2017 kweilo̧k eo eļap.
Kōkkaļļein kwokwoj eo an m̧ōn̄ā in Kijoone eo an Irooj ej aiboojoj n̄an kōļmenļo̧kjeņ kake. Pilawā im dān rej bōk jikin Ānbwinnin im Bōtōktōkin eo ej Pilawā in Mour im Dān in Mour, (lale Jon 4:10), eo ej kakeememej kōj kōn wāņāān eo Ekar kōļļāik n̄an pinmuuri kōj. Ilo an pilawā eo ruje, jej keememej ānbwin eo erub an Rilo̧mo̧o̧r eo. Ilo ad idaak jān dān eo, jej ļōmņak kōn bōtōktōk eo Ekar kōto̧o̧rļo̧k ilo Gethsemane im ioon dōbwāāl eo im kajoor in ko̧kwojarjar eo an (lale Moses 6:60).
Ak ilo bar juon wāween m̧ōn̄ā Ānbwinnin im idaak Bōtōktōkin ewōr bar juon meļeļein, im bwe ej n̄an kile aorōk ko rem̧m̧an im m̧wil ko an Kraist… . Ilo ad bōk m̧ōttan pilawā im dān kajjojo wiik, enaaj em̧m̧an ad mour n̄an ļōmņak kōn wāween ad aikuj in lukkuun kobaik kadkadin im jon̄ak ko an mour eo ejjeļo̧k an jerawiwi n̄an mour ko ad im kōj. Jisōs eban kar maron̄ pinmuur kōn jerawiwi ko an ro jet m̧ae iien E Make ejjab jerawiwi. Bwe ekajet ejjeļo̧k an kajoor Ioon, Emaron̄ leļo̧k E MAKE ilo jikin ko ad n̄an kaju būruwōn ekajet innām letok tūriam̧o̧. …
Bōk m̧ōttan kanniōk in Rilo̧mo̧o̧r eo im idaak jān Bōtōktōkin meļeļein n̄an joļo̧k jān mour ko ad jabdewōt men ko rejjab jokin wōt juon ippān m̧wil ko an Kraist im kōm̧m̧ane bwe Mwilin ej m̧wilid. En̄in ej juon meļeļe eļapļo̧k kōn ukweļo̧k: jab wōt juon oktakļo̧k jān jerawiwi ko m̧okta ak barāinwōt “juon oktak in bōro im m̧ōņōņō n̄an Anij” bun̄ m̧aanļo̧k wōt (lale Bible Dictionary, “Repentance”). Anij enaaj kwaļo̧k ad mōņo̧ im likjab, akEnaaj barāinwōt jipan̄ kōj oktak jān mōjņo̧ n̄an kajoor (lale Ether 12:27). Eļan̄n̄e jej m̧ool ilo ad kajjitōk, “Ewi men eo ijjan̄in tōpar e?” (Matu 19:20) Ej jāmin kōtļo̧k ad jab lukkuun jeļā uwaak eo, ak ilo iakwe Enaaj letok uwaak n̄an jeram̧m̧an eo ad. Im E enaaj letok n̄an kōj kōjatdikdik.