KWAĻOK ko an Tōmak
Phan Phon
Phnom Penh, Cambodia
Phan Phon im lio pāleen rej kōm̧m̧an bwe rej katakin gospel eo n̄an ajri ro jibwier. Gospel eo an Jisōs Kraist eaar jipan̄ baam̧le eo aer wōnm̧aanļo̧k ālkin jorrāān eo eļap an jako m̧weo im̧weer ilo juon kijeek.
Ke m̧weo im̧ōn Phan eaar bwil, eaar maron̄ lo̧mo̧o̧ren wōt ajri ro jilu jibūn. Aolep men otemjeļo̧k raar bwil n̄an n̄e ejjeļo̧k. Phan eaar illu ippān eo iturin eo eaar kōm̧m̧ane bwe en wōr kijeek. Ke illu eo an eaar waļo̧k n̄an baam̧le eo an im ro ruturin, Phan raar jeļā eaar aikuj in jeorļo̧k bōd.
Leslie Nilsson, Ripija
Ilo iien eo jino in tata iaar ron̄ eddōbokļo̧k eo, iaar kajjitōk ippān lio pāleō, “Ta ainikien eo?”
Liin eaar ba, “Bōlen eo ituriid ej kattili juon men.”
Innām iaar ron̄ eddōbokļo̧k eo kein karuo. Juon armej iturin m̧weo eaar jiron̄ eō, “Ewōr juon em̧ ebwil itulikin m̧weo im̧ōm̧!”
Kōm̧ kar etal im itōktok jet dān, bōtaab kōm kar jab maron̄ kuņe kijeek eo. Kijeek eo eaar ajeeded tok n̄an m̧weo im̧ō. Iaad ettōrļo̧k n̄an lowaan m̧weo n̄an bōk ajri ro jilu jibū. Baat eaar deļo̧n̄tok ilo wintō ko, bōtaab iaar jab ļōmņak kōn jabdewōt ijello̧kin ajri ro jibū. Rej men eo eļap tata an aorōk n̄an n̄a. Iaar door aolep men ko ilowaan m̧weo.
Kōm kar diwōj im men eo deeo kōm kar kōm̧m̧ane eaar alooje an m̧weo bwil. Rūkkun kijeek ro raar jab m̧ōkaj aer itaktok kōnke iaļ eo n̄an m̧weo im̧ōm eaar kanooj in dik. M̧weo im̧ō eaar m̧or, im eaar m̧ōkaj an bwil. Iaar jutak ippān lio pāleō im ajri ro jibūm̧ im lale an bwil.
Ālkin an m̧weo kar bwil n̄an ejjeļo̧k, iaar en̄jake ejjeļo̧k kōjatdikdik. Iaar jab jeļā ta eo enej waļo̧k tokālik. Iaar jab jeļā ta eo n̄an kōm̧m̧ane n̄an pukōt juon jikin jokwe ekāāl. Raan eo ālkin kijeek eo, kōm kar bukwelōlō im jar im kajjitōk ippān Irooj n̄an kwaļo̧k n̄an kōm iaļ eo im kōjeram̧m̧an kōm n̄an maron̄ lo juon em̧ ekāāl. Iaar jan̄ ke iaar jar n̄an Irooj, bōtaab iaar lōke bwe E enaaj kar jipan̄ eō.
Ilo jinoin, iaar illu ippān eo rituru eo eaar kōm̧m̧an bwe en wōr kijeek. Iaar kōņaan bwe en kōļļāik wōņāān ta eo eaar waļo̧k. Baam̧ļe eo aō im ro rūturūm̧ raar ļaanotot jān kijeek eo raar barāinwōt illu im kōņaan jilkinļo̧k juon leta n̄an kien n̄an kōm̧m̧an bwe armej ro eaar kōm̧m̧an kijeek en eddo n̄an ta eo eaar waļo̧k. Raar kajjitōk ippa n̄an jaini leta eo, bōtaab iaar jab kōņaan.
Iaar kile bwe eo rūturu eaar jeram̧ōl āinwōt n̄a. Eaar jab ļōmņak in jino kijeek eo. Eļan̄n̄e iaar kōm̧m̧an bwe en kōļļāiki, enaaj kar pād ilo jerata, im inaaj kar en̄jake matōtōr wōt. Iaar kememej naan ko an Irooj bwe jej aikuj iakwe eo ituriid. Iaar en̄jake bwe ij aikuj jeorļo̧k an bōd.
Ke iaar kālet n̄an jeorļo̧k an bōd, iaar en̄jake aenōm̧m̧an.
Iaar jiron̄ aolep ro raar ļaanotot jān kijeek eo bwe iaar kōņaan jeorļo̧k an bōd. Ijello̧kin wōt juon baam̧ļe, aolep raar kālet n̄an kōm̧m̧an ejja menin wōt. Raar jab kōm̧m̧an bwe en eddo kōn ta eo eaar waļo̧k.
Eo iturū eaar m̧ōņōņō iaar jeorļo̧k an bōd. Baam̧le eo aō eļapļo̧k an m̧ōņōņō barāinwōt. Ke iaar lo menin, ij barāinwōt m̧ōņōņō.
Membōr ro im ro rūturūm raar jipan̄ļo̧k ta eo raar maron̄ n̄an jipan̄ baam̧le eo aō. Iaar bōk elōn̄ rice im kar ajeejej n̄an ro jet. Raar kajjitōk ippa etke iaar ajeejej ke iaar pād ilo juon jekjek enana. Ij jiron̄ er n̄e ij jerbal n̄an ro jet, ij jerbal n̄an Irooj. Ikōņaan leļo̧k n̄an E kōnke Eaar kōm̧m̧an elōn̄ kabwilōn̄lōn̄ ko rej waļo̧k ilo mour eo aō. Ewōr juon im̧ōm eaiboojoj, em̧m̧anļo̧k jān eo eaar bwil n̄an ejjeļo̧k bōrrān.
Illu eo an Phan ņae eo iturin eo eaar kōm̧m̧an bwe wōr kijeek kar bōk jikin kōn aenōm̧m̧an ke eaar kememej naan eo an Irooj. Phan ej kam̧m̧oolol kōn tōl eo eaar bōk jān jeje ko rekwojarjar.
Ke m̧weo im̧ōn eaar bwil n̄an ejjeļo̧k, Phan eaar maron̄ in ļōmņak kōn ajri ro jibūn. Phan ej iakwe baam̧le eo an. “Rej men eo aorōk tata n̄an n̄a.” ej ba.