Digital Wōt
Etke Ejako Aō Mijake Kiiō Kōkapilōklōk ko jān Ājmour ilo Kōļmenļo̧kjeņ
Rijeje eo ej jokwe ilo Virginia, USA.
Bōk jipan̄ eo ikar aikuji ekar jab juon kōkkaļļe in juon mōjņo̧ ak likjab.
“Kwoj aikuj in kōnono n̄an juon rikakpilōklōk in ājmour ilo kōļmenļo̧kjeņ.”
Naan in rōjan̄ in ekar itok āinwōt juon menin bwilōn̄ eļap. Ikar ba n̄an juon m̧ōtta kōn wāween an aer in kōmālij eo aō waļo̧k ilo juon būrookraam̧ in accounting eo eaorōk, kōm̧anm̧anļo̧k jem̧jerā ko, im bwebwenato ippān eo jerā āinwōt juon mijenede ej kab ro̧o̧ltok jān mijenede. Ij jan̄in kar ļōmņak meļeļein kōn juon taktō ej letok naan in kōkapilōklōk, im ikar en̄jake bwe kōnono n̄an juon rikakpilōklōk ekar wōt n̄an armej ro ekar ļap inepata ko aer ak relukkuun mōjņo̧ n̄an jelm̧ae apan̄ ko aer make. Eo jera ekar wōr wōt ippān men ko rem̧m̧an n̄an ba kōn en̄jake ko an make ilo an kōnono n̄an juon rikakpilōklōk, innām ikar jino ļōmņak kōn men eo.
Ejjab etto inepata eo aō ekar ļapļo̧k. Ālkin elōn̄ bon̄ in aō jab kiki itok wōt jān inepata, ikar pepe n̄an kōm̧m̧ane juon aō iien loļo̧k. Ikar ikumkum kōn ta eo armej ro jet remaron̄ ba ak ļōmņak eļan̄n̄e renej jeļā bwe ikar loļo̧k juon rikakpilōklōk, ak ilo iien eo inepata eo aō ekar jelet aō maron̄ makūtkūt, kōn menin ikar etal.
Anjo jān Inepata
Ilo iien loļo̧k eo aō, rikakpilōklōk eo ekar kajjitōk elōn̄ kajjitōk ko me rekar jipan̄ eō bwe in maron̄ uwaake kajjitōk ko aō make. Rikakpilōklōk eo ekar jab letok n̄an n̄a juon uwaak ekabwilōn̄lōn̄ n̄an en̄taan ko aō. Ekar barāinwōt jab kōm̧m̧an n̄an āinwōt ikar bwebwe—ekar loe elōn̄ armej ro elōn̄ en̄taan ko ippāer āinļo̧k wōt eo aō. Ilo jet wāween, ikar en̄jake āinwōt ij etal ippān juon taktō. Ewōr juon eo etijem̧ļo̧k kōn imminene in m̧admōde jorrāān eo im ekar wōr an kapāāl n̄an katakin eō wāween aō bōbrae im kōmouri inepata eo.
Ippānļo̧k naan in rōjan̄ ko jet, rikakpilōklōk eo ekar ļōm̧ake tok bwe in je en̄jake ko aō im ļōmņak ko ilo jōnōļ eo aō. Ekar juon jipan̄ eo eļap n̄an anjo̧ jān inepata eo aō. Ikar barāinwōt wōnm̧aanļo̧k wōt im kamoururi ānbwinnū, joļo̧k iien ippān ro m̧ōtta im baam̧le eo aō, m̧ōn̄ā m̧ōn̄ā ko rōūne (ak āinwōt juon em̧m̧aan eo āājmour ilo kōļaj eo ekar kōm̧at n̄an e make), ekkatak jeje ko rekwojarjar, etal im jar, im jar.
Ālkin kweilo̧k ippān rikakpilōklōk eo jejjo iien ko, ruo men ko rekar oktak ippa, Juon, Ekar wōr ippa jibadbad ko rāājmour kōn inepata ko aō, n̄a make, im armej ro jet, im kein karuo, ikar en̄jake āinwōt ewōr ippa kein jerbal ko rej jipan̄ im imaron̄ kōjerbali ilju im jekļaj ilo jekjek ko rej lōkatip inepata eo. Ikar jab lukkuun mour jān inepata eo, ak ikar en̄jake ke imaron̄ jelm̧ae n̄e ej bar waļo̧k. Jān tōre eo, ij jan̄in bar ro̧o̧lļo̧k n̄an rikakpilōklōk in, ak eļan̄n̄e inej aikuj in, iban inepata kōn aō bōk jipan̄—ikar ekkatak bwe ejjeļo̧k un n̄an en̄taan ilo ad ikōn̄ ak jook n̄an pukot jipan̄ eo etijem̧ļo̧k n̄an jorrāān in kōmālij ko.
Kabōjrak Jab Kautiej
Ilo m̧ool, elōn̄ wōt im lōn̄ jab kautiej ipeļaakin m̧admōde nan̄inmej in kōmālij, ak emaron̄ kōnke jet rejjab meļeļe bwe kweilo̧k in ippān juon eo etijem̧ļo̧k kōn nan̄inmej in kōmālij elukkuun aorōk āinwōt ad bōk jerbal in taktō ko kōn nan̄inmej ko ilo ānbwin. Elder Jeffrey R. Holland jān Doulul eo an Jon̄oulruo Rijilōk ro ekar ba: “Eļan̄n̄e kwoj nan̄inmej kōn nan̄inmej ko eļap aer metak im anilen, Anij ej kōtmāne bwe kwon bōk juon kōjeraam̧m̧an in priesthood im bōk kōjparok jān taktō eo em̧m̧antata n̄e ewōr. Kōn en̄jake in ejenolo̧k. Jemedwōj Ilan̄ ej kōtmāne ad kōjerbale aolep menin letok ko rekabwilōn̄lōn̄ Ekar kōpooje ilo epepen in eaiboojoj.”1
Nan̄inmej in kōmālij ej aikuji barāinwōt wāween ko rettiņo̧. Rejjab pidodo n̄an kōnono kaki āinwōt an bōk nan̄inmej in piba ak juon dii ebbūlo̧k. Ak er rej āinwōt nan̄inmej ko ekkā aer waļo̧k. The World Health Organization ej antoone bwe elōn̄ armej ro eļap jorrāān in kōmālij ko ippāer im rejjab bōk jerbal in taktō ko n̄ani: ikōtaan in 35 im 50 bōjāān ilo laļ ko rekajoor im 76 n̄an 85 bōjāān ilo laļ ko rej eddōkļo̧k.2
Bōk jipan̄ eo kwoj aikuji ejjab juon kōkkaļļe in juon mōjņo̧ ak likjab. Jemedwōj Ilan̄ ej kōņaan bwe jān ājmour, ilo kōļmenļo̧kjeņ im ānbwin, im ekar letok n̄an kōj elōn̄ “menin letok ko rekabwilōn̄lōn̄” n̄an jipan̄ ņamejļan apan̄ ko ilo kōmālij im en̄jake an mour in, ekoba:
Ājmour ilo Kōļmenļo̧kjeņ
Kāājimourur
Ro m̧ōttad im baam̧le
Mour kōn gospel eo
Ļap iien kiki
Ritōl an Kabun̄ in
Jerbal n̄an ro jet
Juon eo etijem̧ļo̧k kōn ājmour ilo kōļmenļo̧kjeņ
Mōn̄ā mōn̄ā ko rōūne
Eban aolep iien jemaron̄ lukkuun anjo̧ jān aolep apan̄ ko an nan̄inmej in kōmālij ilo mour in, im ejjab ekkā aer pidodo, juon men ejejjet n̄an aolep apan̄ ko. Ak ilo ad kōm̧m̧ane ijo em̧m̧antata ippād make kōjerbal kein jerbal ko Jemedwōj Ilan̄ ekar litok n̄an kōj, Rilo̧mo̧o̧r eo enaaj jipan̄ kōj ineek eddodo kein reļļap (lale Mosaia 24:15), im jenaaj jeraam̧m̧an kōn kajoor im kōjatdikdik kōn kijejeto ko ad.