Ekkatak n̄an Kōm̧m̧ani Juon Jerbal eo Ejjab Kam̧ōņōņō

Pija

woman with skunk following

Jabdewōt iien ij ļōmņak kōn un̄n̄are peid make, juon ennaan jān mijen būreejtōn eo aō ej itok n̄an kōļmenļo̧kjeņ: “Kōm̧m̧ane jerbal ko am̧ make rejjab kam̧ōņōņō.” Aaet, ej juon naan in etto, ak ewōr juon m̧ool ilo ļōmņak in ewōr men ko reppen ilo mour ko ad ko me jemaron̄ kajjitōk ippān ro jet bwe ren jelm̧ai n̄an kōj.

Kōn menin ewi wāween ad “kōm̧m̧ani jerbal ko rejjab kam̧ōņōņō ko ad make” ilo jekjek in n̄an en̄jake ūn̄n̄are peid make? Ewi wāween ad jelm̧ae ebbeer ko im ekkatak n̄an jerbale aolep en̄jake ko ad?

Kam̧m̧oolol, jejjab pād wōt ilo marok eo—jipan̄ ko reļļap rej waļo̧k. Jemaron̄ loe jejjo iaan men kein ilo “14 Wāween ko n̄an Bar Bōk Ājmour ilo En̄jake.” Eo eļaptata, jemaron̄ mour ilo ad kōjparok kien ko (lale peij 44).

Ekkatak n̄an uwaake men otemjej mour in ej kadtok kōj kaki ej juon wāween jerbal. Ad maron̄ ūn̄n̄are peid make ilo en̄jake ejjab meļeļein aolep iien jenaaj en̄jake wāween eo jekōņaan. Meļeļein bwe, jān tūriam̧o̧ eo an Jisōs Kraist im kijejeto ko ad make, jenaaj maron̄ kōtōbaļbaļ i en̄jake ko ilo ājmour im wāween ko rejeraam̧m̧an. Būreejtōn M. Russell Ballard ej letok n̄an kōj jet naan in rōjan̄ ko n̄an bōk jokin wōt juon (lale peij 48).

Ilo ad kajjieon̄ ūn̄n̄are peid make ilo en̄jake, jemaron̄ en̄jake āinwōt juon bao jidikdik em̧ōjņo̧ (lale peij 46), ak ilo ad likūti kijejeto in im jerbal ippān Jemedwōj Ilan̄, jemaron̄ lōke bwe juon raan jenaaj “kelōn̄ļo̧k kōn pā ko āinwōt ikōļ” (Aiseia 40:31), eo ej juon wāween eo ekabwilōn̄lōn̄ ilo ba bwe enaaj wōr ad kajoor n̄an kōm̧m̧ani jerbal ko ad make rejjab kam̧ōņōņōik kōj make.

Jeraam̧m̧an,

Heather J. Johnson

Rōjan̄ eo Em̧m̧antata …

Rūm̧m̧an Ded ro rej kwaļo̧k naan in rōjan̄ eo em̧m̧antata rekar bōke kōn kōjparok en̄jake im kōļmenļo̧kjeņ eo aer:

“Kōm̧m̧an iien n̄an am̧ make kaminene, joļo̧k men otemjej jān kōļmenļo̧kjeņ, im joļo̧k jabdewōt ļōmņak ko rebaijin im en̄jake ko ippem̧.

—Brianna Forrester, Washington, USA

“Jab mijak in loļo̧k juon taktō in jipan̄. Kōn koba in ekkar ilo kōmour an jetōb im ānbwin, ikar maron̄ in mour mour e aō im maron̄ kōttare juon mijen call bwe in maron̄ jerbal n̄an Irooj.”

—Nate Seal, Utah, USA

“En wōr am̧ kajoor in peek ilo aolep men ko rem̧m̧an im ilo ejja iien in wōt likūt mour eo am̧ ioļapļap ipeļaakin Kraist.”

—Nan Crews, Louisiana, USA

“Keememej bwe kwōn kabwe awa in am̧ kiki. Emaron̄ kōjak, ak elukkuun in aorōk!”

—Sydney Smith, California, USA

Ta naan in rōjan̄ eo em̧m̧antata komaron̄ kar bōke kōn jab lukkuun kapen n̄an eok make? Jilkinļo̧k uwaak eo am̧ n̄an liahona.lds.org jān Jānwōde 31, 2019.