Juon Jon̄an in Jerba in Jipan̄ Ekwojarjarļo̧k
Jān Elder Patrick Kearon
Jān Būreejtōnji eo an Jimjuonn̄oul
Jān juon nokon in jotan an aolepān laļ in n̄an rūm̧m̧an ded eo, “A Hallmark of the Lord’s True and Living Church,” kar kwaļo̧ke ilo Brigham Young University–Idaho ilo Māe 6, 2018.
Kōm̧m̧an bwe en ļapļo̧k ad m̧ōņōņō in ļoor Kraist eo emour, en ļapļo̧k an wejepedik, ilo ad kajjion̄ erom rikaļoor ro An rem̧ool kōn jerbal in karejar āinwōt An kar.
Kōmeļeļe ko jān Kelley McMorris
Ke iaar 15 ak 16, iaar lukkuun in kalimjōk eō make im, āinwōt elōn̄ iaadwōj ilo ad jodikdik wōt, jab jeļā wōn kar e im ta eo eaar kōņaan, jab jeļā, im m̧ōjņo. Iaar en̄jake jōbwābwe, jab jeļā kōn kwe make, im kilidāp. Ekar jab jipan̄ bwe jinō im jema raar jokwe ettoļo̧k ilo Saudi Arabia ke iaar pād ilo boarding school eo ilo juon m̧ōttan ejjeļo̧k kobban in parijet in England. Ilo kōnono kōn jikuuļ, eaar jab en̄jake an ruwainene n̄an jikuuļ.
Nana in katu kar jeļā kake ilo parijet jab eo, bōtaab juon iien m̧ōļo eļap tata juon ļan̄ eļap ekar letlet ilo Maļo in Irish kōn kōto ko kajoor in kitwōn hurricane. Iturinļo̧k 5000 m̧ōko raar ibwijleplep, ekar maatļo̧k m̧ōn̄ā, im armej ro eaar ejjeļo̧k aer jarom ak jabdewōt kain kein kōmāāņāņ im meram ilo m̧ōko m̧weer.
Ke ibwijleplep eaar jino apdikļo̧k, kar jilkinļo̧k kōm jān jikuuļ eo n̄an jipan̄ karreo. Iaar bwilōn̄ n̄an en̄jake kain jorrāān eo epaak. Dān im pedkat raar aolep jikin. Turin mejān ro me m̧ōko im̧weer raar ibwijleplep raar wo im aidik. Raar jan̄in de kiki elōn̄ raaan ko. Rijikuuļ ļaddik ro m̧ōtta im n̄a kar etal in jerbal, kōm̧akūt aļaļ ko robrak kōn dān an po eo ilōn̄, im kanōk karpet ko rejorrāān.
Bōtaab ta eo eaar eļap an kabwilōlōn̄ n̄an n̄a eaar kōn en̄jake in ippān doon eo me eaar ejaak. Eaar aiboojoj, em̧m̧an piktok in en̄jake ibwilijin armej ro raar koba ilo juon jerbal eaorōk ium̧we jekjek ko reppen. Tokālik iaar kejekļo̧kjeņ bwe aolep en̄jake in pere ko me ekkā aer kobrak ļōmņan in jokdikdik eo aō raar jako ke iaar bōk kuņaō ilo kijejeto in eļap n̄an jipan̄ ro rūturōm.
Men in kar ioone me ejipan̄ ro jet enaaj kar uwaak eo n̄an ejjeļo̧k kōjatdikdik eo aō, jekjek in jab bōjrak ļōmņak eo aō men aikuj in kar ukōt mour eo aō ekajoor. Bōtaab ekar jab, kōnke men eo kar ioone eaar jab ļap meļeļe in, im iaar likjab n̄an kōļapļo̧k aō kejekļo̧kjeņ kōn ta eo eaar bōk jikin. Meļeļe jab in eaar itok tokālik.
Kūr eo n̄an Jerbal in Karejar
Pija in m̧am̧a eo im leddik eo nejin jān Linda Jean Prunell
Iaar ļōmņake menin ilo Eprōl 2018 kweilo̧k eo eļap ke iaar ron̄ im bar ron̄ kūr eo n̄an jerbal in karejar āinwōt an kar Rilo̧mo̧o̧r eo jerbal in karejar—im n̄an kōm̧m̧an āindein kōn iakwe, ilo kile bwe jej aolep ajri ro nejin Jemedwōj Ilan̄.
Jenaaj jerbal ejjab kōnke jerbal in jipan̄ eo ad em̧ōj būne im jon̄e ak kōnke jej iakwe Jemedwōj ilo Lan̄ im rej kōllowetak jān juon kappukōt eutiejļo̧k im eaorōkļo̧k—jipan̄ ro m̧ōttad lo im pād wōt ilo iaļ eo n̄an kapijuknen Ippān. Jej iakwe im jerbal n̄an ro rūturid āinwōt an Jisōs naaj kar eļan̄n̄e Eaar pād ijo jej pād ie, em̧ool kajjion̄ n̄an kōkōm̧anm̧anļo̧k mour ko an armej ro im kōmeraik eddo ko aer. En̄in ej ijo lan̄lōn̄ eo im kakūrm̧ool eo aitok kitien ej itok jāne, kōn jim̧or eo ej leļo̧k im eo ej bōke, ilo ad kwaļo̧k leen ko an jeļā im en̄jake an aorōk eo ad indeeo im iakwe eo indeeo an Anij n̄an kōj kajjojo.
“Juon kadkad ej kwaļo̧k kadkad eo em̧ool an Irooj im Kabun̄ eo an emour enaaj aolep iien ejaak, tōl kijejeto n̄an karejar n̄an kajjojo ajri ro nejin Anij im baam̧le ko aer.” Būreejtōn Russell M. Nelson eaar ba. “Kōnke Kabun̄ eo An in, jej āinwōt rikarejar ro An renaaj karejar n̄an juon, āinwōt Ekar kōm̧m̧ane. Jenaaj karejar ilo Etan, kōn kajoor im maron̄ eo An, im kōn An iakwe im jouj.”1
Ijeļā bwe eļan̄n̄e jej bōk kūr in n̄an jerbal in karejar, jemaron̄ kalimjōk jet men ijello̧kin kōj make; eddōkļo̧k ilo tōmak, lōke, im m̧ōņōņō; im anjo̧ ioon kalimjōk kōj make im ļōmņak eo kōn ejjeļo̧k tokjān im būrom̧ōj eo me ej itok ippāntok.
Jerbal in Karejar ej Ukōt Kōj
Aiboojoj eo an kain jerbal in karejar in ej bwe ej jipan̄ ro jet, bōtaab ej barāinwōt ukōt kōj kōn bōkļo̧k kōj jān inepata ko, mijak ko, būrom̧ōj ko, im pere ko. Ilo jinoin, jerbal n̄an ro jet emaron̄ in pidodo an kōm̧ad kōj jān inepata ko ad, bōtaab menin em̧ōkaj an bōkļo̧k kōj n̄an juon men eo eļapļo̧k an utiejļo̧k im ļapļo̧k an aiboojoj. Jej jino en̄jake meram eo im aenōm̧m̧an eo, nan̄in jab kile wōt jidik. Jej ineem̧m̧an, okmāāņāņ, im kaenōm̧m̧an. Im jej kile lan̄lōn̄ eo me ej itok ilo ejjeļo̧k bar wāween.
Āinwōt an Būreejtōn Spencer W. Kimball (1895–1985) kar kōmeļeļeik: “Mour eo ejeraam̧m̧an kar je ilo jeje ko rekwojarjar ej jon̄an eo ilo jetōb me ej itok kōn elōn̄ jerbal in jipan̄ ko ad n̄an ro jet im jān joļo̧k tōļan ko ad ilo jerbal in jipan̄ eo an Anij n̄an armej.” Ekar kakobaba, “Eļapļo̧k ad aorōk ilo ad jerbal n̄an ro jet—ilo m̧ool, epidodoļo̧k n̄an ‘lo’ kōj make kōnke ekanooj ļapļo̧k ad lo kōj!”2
Juon Kūr jān M̧aajta eo
Kraist im Rieon̄ad ro, jān J. Kirk Richards
Ke Rilo̧mo̧o̧r eo eaar kūr Piter, Andrew, Jemes, im Jon n̄an ļoor E, oktak in kōttōpar im kijejeto eo aer eaar m̧ōkaj an oktak: “E m̧ōkaj aer ilo̧k jān ok ko aer, im ļoor E” (Matu 4:20).
Bōtaab ālkin an Rilo̧mo̧o̧r eo kar bōk jān er ilo wāween eo ekōmettak tata, raar jepļaakļo̧k n̄an er eron̄ad, n̄an ta eo raar en̄jake raar jeļā. Ilo juon iien, jerkakpeje Rilo̧mo̧o̧r eo eaar itok n̄an er ke ekar jerata aer eon̄ad.
“Im E ba n̄an er, Kom̧win door ok i anmooņōn, im kom̧ naaj lo. Kōn menin rej door ļo̧k, im kiiō re ban tōbwe, bwe elōn̄ ek” (Jon 21:6).
Menin eaar jab wōt juon kein kam̧ool bwe Eaar jab jako kajoor eo An bōtaab barāinwōt juon pija eļap bwe raar reilo̧k ilo juon jikin ebōd im kalimjōk wōt men eo ebōd. Ke raar m̧ōn̄ā ek ippān doon ioon tarkijet, Rilo̧mo̧o̧r eo eaar kajjitōk ippān Piter jilu alen eļan̄n̄e eaar iakwe E. Kajjojo iien kōn ļapļo̧k in inepata, Piter eaar uwaak bwe ekar. Ālkin kajjojo uwaak ko an Piter, Jisōs ear kajjitōk ippān Piter n̄an naajdik jiip ko An. (Lale Jon 21:15–17.)
Etke Jisōs eaar kajjitōk ippān Piter jilu alen eļan̄n̄e eaar iakwe E? Piter ej kab m̧ōj kar kūri n̄an ļoor Jisōs m̧oktaļo̧k, im eaar m̧ōkaj an kar uwaak, likūt ek ko koņan itulik. Bōtaab ke kar bōk Jisōs jān er, Piter eaar būrom̧ōj, eaar jōbwābwe. Eaar bar ro̧o̧lļo̧k n̄an men eo wōt eaar en̄jake ekar jeļā—eon̄ad. Kiiō Jisōs eaar kōņaan bwe Piter en lukkuun ron̄jake E im n̄an keidi aorōk eo an kūr eo ilo iien in. Eaar aikuji an Piter meļeļe ta meļeļe in n̄an erom juon rikaļoor an jerkakpeje Kraist kiiō bwe ilo iien in Ejjamin naaj ban bar pād iturier ilo nememein armej.
Ta eo Irooj eaar kōņaan jān Piter? Eaar kōņaan bwe Piter en naajdik An jiip, ļaam̧ ko An. En̄in eaar jerbal eo me kar aikuj in kōm̧m̧ane. Piter eaar kile kūr in ejouj, kajju jān M̧aajta eo an, im jeban Rijilōk eo eaar uwaak, ilo peran im jab mijak ajeļo̧k aolepān mour eo an n̄an jerbal in karejar eo kar kūr e n̄ane.
Jino kōn Jar
Ebar wōr juon ad jeban Rijilōk ioon laļ in rainin. Būreejtōn Nelson ej letok kūr eo n̄an kwe im n̄an n̄an naajdik jiip ko an Jisōs. Kōn aolep kōm̧ad ko ipeļaakid im ekanooj lōn̄ men ko reddikļo̧k raikuji ad jipan̄, idajon̄jon̄ eo ej n̄an uwaak n̄an kūr in im jerbale—lukkuun kōm̧m̧ane juon men, lukkuun kōm̧m̧ane oktak eo, im kooktak ad mour.
Kajjitōk eo am̧ kiiō emaron̄ in, “Ia eo ij ijjino ie?”
Jino kōn jar. Būreejtōn Nelson eaar idajon̄jon̄e kōj n̄an “kōkankanļo̧k maron̄ in jetōb eo [ad] kiiō n̄an bōk revelesōn ko ami make.”3 Kajjitōk ippān Jemam̧ ilo Lan̄ ta eo komaron̄ kōm̧m̧ane im n̄an wōn. Uwaak n̄an jabdewōt im̧we kwoj bōke, mekarta emaron̄ bōlen jab bwe. Kōm̧m̧an ekkar n̄an e. Jabdewōt jerbal in jouj edik ej kōm̧m̧an bwe jen kalimjōk itulikin im ej bōktok kōjeraam̧m̧an ko an make. Emaron̄ in juon jejeļo̧k (text) ejouj, jab kōtmene n̄an juon armej. Bōlen ej juon wūt, jet kukiij, ak juon naan ejouj. Bōlen ej karreoik juon jikin kallib ak meļaaj, kwo̧ļkoļ nuknuk, karreo wa, jep ujooj ko, karreoikļo̧k jiņo ko, ak ron̄jake.
Āinwōt an Sister Jean B. Bingham, Būreejtōn eo Eutiej an Doulul eo an Kōrā ro, kar ba, “Jet iien jej ļōmņak jej aikuj kōm̧m̧ani men ko reļļap im kabwilōn̄lōn̄ n̄an “watōke” āinwōt jipan̄ ro rūtūrir. Jipan̄ ko reddik remaron̄ kōm̧m̧an eļap oktak ilo mour an ro jet—barāinwōt kōj make.”4
Komaron̄ jab kōņaan bōk bun̄tōn eo kein kajuon, reel bwe ejjeļo̧k am̧ iien ak bwe kwojjab maron̄ lukkuun kōm̧m̧ane juon oktak, bōtaab kwonaaj bwilōn̄ kōn ta eo em̧ool jet men jiddik maron̄ kōm̧m̧ane. Būreejtōn Nelson eaar kōm̧m̧an juon jon̄an in jerbal in jipan̄ eutiejļo̧k im kwojarjarļo̧k n̄an kwe im n̄a. N̄e jej uwaak, jenaaj lo ekōjkan kakūrm̧oole, kemouri, im kaenōm̧m̧ane ej n̄an kōj im ekōjkan ad maron̄ juon kein kōketak n̄an oktak eo im kaenōm̧m̧an eo ilo mour ko an ro jet.
Ilo iien ko, ko āinwōt ālkin kadedeļo̧k juon mijen, maron̄ kapo kōj n̄an ba, “Ekwe, iaar kōm̧m̧ane. Kōtļo̧k bwe juon en baj jerbal. Ikōņaan kakkije.” Bōtaab jerbal in karejar eo em̧ool ejjab bōjrak. Ej juon wāween mour. Jemaron̄ bōk kakkije jān m̧akūtkūt ko im iien kakkije ko n̄an kakkije im n̄an bar kōkāāl, bōtaab ad bujen eddo eo n̄an iakwe doon āinwōt An kar iakwe kōj im n̄an naajdik An jiip ejjab bōk kakkije.
Jerbal in Karejar an Kabun̄ in Aolepān Laļ in
Pija in taktōk eo im rinan̄imej eo rej atbakoj doon jān Wendy Gibbs Keeler
Ij lukkuun uteij n̄an uwaan juon Kabun̄ me ej kōm̧m̧ane jerbal in karejar eo. Ilo 2017 eo wōt, membōr ro ad raar kōm̧m̧ane elōn̄ļo̧k jān 7 milien awa in baļintier ekkat, m̧adm̧ōd, im leto letak m̧ōn̄ā ko n̄an rijeram̧ōl ro im riaikuj ro. Kabun̄ in eaar leļo̧k dān ko rōreeo n̄an jimettan milien armej ro im wiļjea ko n̄an 49,000 armej ro ilo 41 laļ ko. Ribaļintier ro raar leļo̧k māj kūlaaj ko im jerbal in kakōlkōl māj ko, im rar kamineneik 97,000 rikōjparok ro n̄an ro ewōr aer jorrāān in erre ilo 40 laļ ko. Jiln̄ūūļ-jilu taujin rikōjparok ro raar kaminene ilo jikin kōjparok kirae im nin̄nin̄ ko rej kab ļotak ilo 38 laļ ko. Ejjab ba wōt Helping Hands, jāne buki taujin armej ro ad raar kōm̧m̧an milien awa ko ilo iiō ko im̧aan. Ro uwaan Kabun̄ eo an Jisōs Kraist im Armej ro Rekwōjarjar ilo Raan ko Āliktata eaar m̧ōkaj aer jipan̄ ro raar ļaanotot jān jorrāān ko renana kilep im dik, barāinwōt kōkōm̧anm̧anļo̧k peļaak ko im jukjukinpād ko aer.
JustService eo an Kabun̄ in ejkab jutak, eo ej laajrak in iien jerbal in jipan̄ ko, em̧ōj de an lōn̄ļo̧k jān 350,000 raar rejijtōr baļintier, ro raar leļo̧k milien awa ko jipan̄ ilo ijo rej jokwe ie.5
En̄in ej juon Kabun̄ in jerbal. En̄in ej ta eo jej kōm̧m̧ane. En̄in ej ta eo kwoj kōm̧m̧ane. Kōm̧m̧an bwe menin en m̧wil eo ej kōmeļeļeik kōn wōn kwe.
Jilu Kain Jerbal in Jipan̄ ko
Ikōņaan kalikkar jilu kain jerbal in jipan̄ ko reļļap ewōr ippād kajjojo iien eo em̧m̧an n̄an bōk kuņaad ie.
1. Jerbal in jipan̄ eo me kar jitōn̄ kōj n̄an ak kar kūr n̄an kōm̧m̧ane āinwōt juon eddo ilo m̧ōn jar eo. Jenaaj kajjion̄ kōn kain jerbal in karejar eo bwe ej menin aorōk, ejjab jon̄e, ijo jej ļōmņak kōn, jar kōn, im jipan̄ ro kar litok bwe jen eddok kake er n̄an kōjarok er.
2. Jerbal in Jipan̄ eo jej kāālet n̄an kōm̧m̧ane kōn kāālet eo ad make. Menin ej juon dam̧oļo̧k an kain jerbal in jipan̄ eo, eo enaaj jiōbtok n̄an jerbal ko ad raan otemjej im ikitōltōl ko ilo ad kōn un kappukōt n̄an meļo̧kļo̧k kōj make im otkakļo̧k n̄an ro jet. Ejjeļo̧k ijjitōn̄ eformal, bōtaab jej ellowetak jān juon ikdeelel n̄an ļoor Kraist, jino kōn ļapļo̧k ad jouj im ļōmņak kōn ro ipeļaakid.
3. Jerbal in Jipan̄ n̄an Aolep Armej (Public) Ijo ejetjet, bōk kūņaam̧ ilo politic kōn juon jibadbdd ioon jerbal in jipan̄ im kōn kōkōm̧anm̧anļo̧k kajjojo armej im jukjukinpād ko. Joļo̧k political tribalism me ej iuun armej n̄an tōmak ilo jum̧ae ļōmņak ko, kipel, im kakkure jukjukinpād ko, āne ko, im laļ ko. Koba ippān rikien ro jet me rej lo ejja jerbal ko wōt n̄an bōktok kemour n̄an mour ko rejorrāān ilo jikin ko aer rej eddoik im ļapļo̧k. Komaron̄ in erom juon ainikien jokkun wōt juon im un, kōketak jab kalijōkļo̧k ilo aolep jikin ilo jukjukinpād. Ewōr juon aikuj eļapļo̧k n̄an kwe n̄an leļo̧k am̧ kajoor n̄an kain jerbal an jikin eaorōk.
Jemaron̄ Ukōt Laļ eo Ad Make
N̄e jej riiti nuuj ko, jemaron̄ en̄jake bwe laļ in ej oktak ilo juon wāween eo eoktak jān am̧ ļōmņak. Eļan̄n̄e kajjojo ļōmņak ej m̧akūtkūt ilo wāween ko reļļap im iddik kajjojo raan, jemaron̄ ukōt laļ eo ad make im bwe an ro ipeļaakid. Ilo am̧ jerbal n̄an jikin eo am̧ im jerbal ippān jikin eo am̧ ilo jukjukinpād eo am̧, kwonaaj kōm̧m̧an m̧ōttam̧ me rej kwaļo̧k kōņaan in jipan̄ eo am̧. Men kein renaaj erom jemjerā ko rekajoor, kalōk būriij ko ilo aolep m̧anit ko im tōmak.
Eļan̄n̄e kwonaaj uwaake kūr eo n̄an jerbal in karejar eo āinwōt an Jisōs kar, kwonaaj oktak, ļapļo̧k am̧ jab ļōmņak kōn kwe make. Kwonaaj lo lan̄lōn̄ eo me ej itok jān jerbal in karejar eo ilo wāween eo an Rilo̧mo̧o̧r eo, likūt itulikūm̧ inepata ko im pere ko im jab m̧ōņōņō eo me ej itok jān likjab ko ippam̧.
Bōlen juon āt ak juon un eaar itok n̄an ļōmņak eo am̧. Menin emaron̄ āinwōt juon kūr jān Jetōb eo, im bōlen kwar bōke m̧oktaļo̧k. Pukōtļo̧k, pukōte, im kotake. Kāālet n̄an uwaake kūr in, im jar rainin n̄an jeļā ta eo komaron̄ kōm̧m̧ane. N̄e kwoj loe im en̄jake kōjeraam̧m̧an ko menin ej bōktok n̄an kwe im ro kwoj jerbal in karejar n̄an er, kwonaaj kōņaan kōm̧m̧ane menin āinwōt juon jon̄an aolep raan.
Jibadbad eo ad eutiej tata im em̧m̧an tata ej n̄an kwaļo̧k meram eo, kōjatdikdik eo, lan̄lōn̄ eo, im jibadbad eo an gospel eo an Jisōs Kraist ippān aolep ajri ro nejin Anij im jipan̄ er lo iaļ eo n̄an kapijuknen eo. Jipan̄, jerbal, im jerbal in karejar n̄an er rej kakōļļe ko an gospel eo ilo an jerbal. Ilo ad kōm̧m̧ane menin juon wāween mour, jenaaj lo bwe ejej uwaan an kūrm̧ool, im ekōjkan ad maron̄ lo aenōm̧m̧an eo im lan̄lōn̄ eo me jekar jab maron̄ lo m̧oktaļo̧k.
En̄in ej ekōjkan an Rilo̧mo̧o̧r eo mour, im en̄in ej etke Eaar mour—n̄an letok tōļan eo eweppān im kemour eo eļap tata kōn menin letok an pinmuur eo An eļap, indeeo n̄an kwe im n̄an n̄a. Kōm̧m̧an bwe en ļapļo̧k ad m̧ōņōņō in ļoor Krasit eo emour, en ļapļo̧k an wejepedik, ilo ad kajjion̄ erom rikaļoor ro An rem̧ool kōn jerbal in karejar āinwōt An kar.