Ej Kabun̄ eo An

Jān Elder Taniela B. Wakolo

Jān Jiljilimjuonn̄oul eo

“Kom̧ij aikuj bōk ioomi etan Kraist, eo ej Eta” (3 Nipai 27:5).

Iaar ļotak ilo Fiji. Ro jinō im jema raar jab membōr in Kabun̄ in, bōtaab raar etal n̄an bar juon kabun̄.

Ke iaar rūttoļo̧k, iaar m̧areik lio pāleō, Anita. Liin eaar juon membōr in Kabun̄ eo an Jisōs Kraist im Armej ro Rekwōjarjar ilo Raan-ko Āliktata. Eaar jab bōjrak an kūrtok mijenede ro n̄an ioon n̄a.

Juon raan iaar jiron̄ er remaron̄ itok n̄an kōjota ilo bon̄ōn ko jilu rej itok. Iaar ba rej aikuj in kōjerbal wōt Baibōļ n̄an uwaake kajjitōk ko aō. Uwaak ko aer raar weppān. Ilo bon̄ōn eo kein kajilu, raar kajjitōk ippa juon kajjitōk.

“Eļan̄n̄e eaar wōr juon am̧ mōn wia m̧ōn̄ā, kwonaaj kar likūt etan ta?”

“Inaaj kar ņa etan Wakolo Baam̧le Mōn Wia M̧ōn̄ā kōnke ej aō m̧ōn wia,” iaar uwaak.

“Wōn eo kabun̄ eo ej aikuj etōņake?” raar kajjitōk.

Eaar juon kajjitōk eļap an em̧m̧an. Im iaar jeļā uwaak eo kōn aolepān būruwō im aō. Kabun̄ eo em̧ool ej aikuj in etōņake āt eo etan Jisōs kōnke ej An Kabun̄ eo. Im Kabun̄ eo an Jisōs Kraist im Armej ro Rekwōjarjar ilo Raan ko Āliktata ekar etōņake āt eo Etan!

Eaar wōr wōt juon aō kajjitōk: “N̄aat eo imaron̄ in peptaij?” Juon wiik tokālik, iaar peptaij.

Ke iaar peptaij, iaar bōk ioō make etan Jisōs Kraist. Ej meļeļe in iaar erom juon uwaan Kabun̄ eo An im kar kallim̧ur n̄an ļoor E. Ij kajjieon̄ ijo em̧m̧an tata ippa aolep raan n̄an mour āinwōt An kar mour. Ijeļā bwe en̄in ej Kabun̄ eo em̧ool an Jisōs Kraist.