Rūm̧m̧an Ded ro
Eban Meļo̧kļo̧k Jerbal Eo Am̧
Pija ko jān Getty Images
Jet allōn̄ ko remootļo̧k eaar wōr juon aō ettōņak me, jijet ilo m̧ōn jar eo ilo jea eo liktata āinwōt iien ko jet; im kōn ejjeļo̧k ļōmņak in bōk koņaō, wāween aō laleļo̧k ekar oktak. Iaar lo bwe ejepelōklōk ibwilijin jarlepju eo raar mijenede ro jet raar m̧ōkaj aer ro̧o̧l. Juon ikdeelel n̄an jipan̄ er eaar ļapļo̧k ilo būruwō ke iaar reito reitak. Iaar jeļā bwe kwaļo̧k en̄jake eo aō emaron̄ in kar juon wāween an jerbal in karejar n̄an er im jipan̄ er wōnm̧aanļo̧k wōt ilo iaļ in bujen eo mekarta menin ej āinwōt epen ilo iaļ eo.
Jān ettōņak in, Jemedwōn̄ Ilan̄ eaar ba n̄an eō bwe Ej kea. Ej kam̧oolol kōn jerbal in jipan̄ ejim̧we kōm kar kōm̧m̧ane āinwōt mijenede ro, jekdo̧o̧n ta ewi aitokan kar jerbal in jipan̄ eo am. “Bwe Anij e wānōk wōt, im E jāmin meļo̧kļo̧k ami jerbal im yokwe, ko kom̧ ar kwaļo̧k kōn Etan” (Hibru 6:10). Ilo bwebwenato eo aō (lale peij 47), ij kwaļo̧k juon bwebwenato an jeje ko rekwojarjar im en̄jake ko an mijenede ro jet eaar m̧ōkaj aer ro̧o̧l me emaron̄ jipan̄ kom̧ ilo ami dibuk en̄jake in. Ij barāinwōt iakwe wāween an Alex kōjerbal juon bwebwenato jān Bok in Mormon n̄an jipan̄ kōj lo bwe jekdo̧o̧n n̄an ro me em̧ōkaj aer ro̧o̧l n̄an kapijuknen kōn wāween ko ikkijien erreo, ej wōr wōt kōjatdikdik (lale peij 44).
Ilo bwebwenato ko ilo digital wōt, kom̧ naaj riiti ekōjkan an Emily kar ukōt en̄jake ko an inepata, mijak, im ejjeļo̧k kōjatdikdik eaar en̄jaki n̄an juon lan̄lōn̄ an make im ekwojarjar. Im Kevin, juon professional ko̧o̧njeļōr, ej letok ļōmņak ko kōn ekōjkan an ro iakwe er maron̄ rejtake ro me rej ļon̄tak kōn an m̧ōkaj aer ro̧o̧l.
Un eo kōj kajjojo ro raar ro̧o̧l ejjab aorōk in wōt ta eo jej kōm̧m̧ane n̄e jej ro̧o̧l n̄an kapijuknen. Kōn jipan̄ eo an Rilo̧mo̧o̧r, jemaron̄ in mour, eddōkļo̧k, im wōnm̧aanļo̧k wōt n̄an lo eļapļo̧k lan̄lōn̄ ilo iaļ in ad indeeo.
Ilo kautiej,
Liahona Ficquet