“Kwoj Aikuj Em̧m̧akūt jān Jikin In”
Rijeje eo ej jokwe ilo Antofagasta, Chile.
Kōjekdo̧o̧n mijak ko aō kōn em̧m̧akūt n̄an ituiōōn̄ in Chile ippān baam̧le eo aō, ānen jem̧aden eo eaar oktak n̄an ānen kallim̧ur eo am.
Pija in Concepción, Chile, jān Getty Images
N̄e ij riiti Bok in Mormon kōn ekōjkan an Nipai kar iien otemjej rejtake em̧m̧aan in elolo visōn eo an jemen, iaar ļōmņak bwe elōn̄ wōt jodikdik ro ilo Kabun̄ in raar bōlen āinwōt Nipai. Bōtaab ke baam̧le eo aō eaar kāālet bwe kōm kar aikuj in em̧m̧akūtļo̧k n̄an āne jem̧aden eo, eaar ļapļo̧k aō kar en̄jake āinwōt Leman im Lemuel. Iaar jab kōņaan ilo̧k jān m̧weo im̧ō.
Āinwōt Nipai im ļōm̧aro jein iaar “ļotak jān jema im jino ro rem̧m̧an” (1 Nipai 1:1). Erro jim̧or kar kobatok ilo Kabun̄ in ke raar jdokdik wōt, im jinō ekar kōttar jema ilo an kar jerbale juon mijen. Raar nikinik, raar ro uwaan Kabun̄ in rōkūtarre jerbal.
Ke iaar pād ilo high school, mennin jeraam̧m̧an (economy) eaar jino nanaļo̧k ilo eria eo am an Concepción, Chile. Eaar ejjeļo̧kļo̧k jerbal, im jema eaar pen an elolo jerbal. Āliktata, eaar jino pukōt juon jerbal ilo bar juon bukwōn.
An kappok jerbal eaar bōkļo̧ke n̄an ituiiōn̄ n̄an jikin kweilo̧k Calama, ilo eria in mining eo ilo Chile. E ej juon construction engineer, im eaar lo juon jerbal em̧m̧an ijo. Bōtaab eaar make iaan im ettoļo̧k. Kōm kar loe wōt ke emaron̄ kar kōm̧m̧ane 32 awa ilo baj n̄an kapijuknen.
Ālkin jet iiō in lo wōt jema ruo alen ak jilu alen juon iiō, jinō eaar en̄jake bwe eaar iien n̄an am kōm̧m̧an oktak. Ro jinō im jema raar kāālet bwe aolepān baam̧le am raikuj em̧m̧akūtļo̧k n̄an ituiōōn̄.
Kōmij Aikuj in Pād ippān Jemām
Ļeo jatū eaar ejjeļo̧k an inepata in em̧m̧akūt. Im lio jeiū erūtto, eo eaar pād ilo kaļōj, ej kōm̧m̧an juon waanjon̄ak em̧m̧an n̄an n̄a.
“Inaaj kaarmejet ekkatak ko aō,” liin eaar ba. “Kōmij aikuj in pād ippān jemām.”
Aolep raar rejtake jokāālet eo n̄an em̧m̧akūt ijello̧kin wōt n̄a. Iaar kōņaan pād ippān jema barāinwōt, bōtaab iaar jum̧ae kōm̧m̧ane oktak ko im kaarmejet eo an juon make. Eaar wōr ro m̧ōtta, iaar jeļā ijōko ipeļakū, iaar m̧ōņōņō kōn wāween aō mour, im iaar kōņaan etal n̄an kaļōj ilo Concepción. Iaar kōm̧m̧ane aolep men iaar maron̄ kōm̧m̧ane n̄an kareel eo jinō bwe kōmij jab aikuj etal.
Āliktata, liin eaar ba, “Nejū, jemam̧ ej make wōt iaan. Ej kōņaan bwe jen pād ippān. Ikōņaan bwe kwon kar meļeļe, bōtaab eļap am̧ ļōm̧nak kōn eok make.” Innām liin eaar kallim̧ur eō, “Enaaj wōr ad iien ko rem̧m̧an ijōņ.”
Iaar meļeļe ilo en̄jake bwe jinō eaar jim̧we bōtaab ilo m̧ool iaar jab reel. Eaar ejjeļo̧k juon aō naan in kam̧ool ilo iien eo, bōtaab iaar jokāālet n̄an jar kōn eļan̄n̄e ij aikuj in etal ippān baam̧le eo aō. Juon uwaak ealikkar eaar itok n̄an n̄a: “Kwoj aikuj em̧m̧akūt jān jikin in.” Iaar būrom̧ōj, bōtaab iaar jiron̄ ro jinōm im jema inaaj ilo̧k.
Erri Wōjke Kein?
Concepción ej juon jikin emaroro kōn elōn̄ wōjke ko. Ej bōk 50 inij (127 cm) in wōt juon iiō. Antofagasta, juon jikin kweilo̧k epaake Calama kōm kar em̧m̧akūtļo̧k n̄ane, ej bōk wōt 0.1 inij (0.25 cm) in juon iiō.
Men eo ekabwilōn̄lōn̄ tata n̄an n̄a kōn em̧m̧akūt eo eaar kōn tūreep eo. Ke kōm kar jino iaļ eo am̧ ituiōōn̄ļo̧k kōn baj, alooje oktak eo jān maroro n̄an m̧ōņakņak eaar kalulu. Iaar ļōmņak, “Erri wōjke kein? Erri kau kein ilo ijekein rettoļo̧k jān tauun (countryside)?” Men eo deo iaar loe eaar bwidej, dekā, im bat ko.
Ealikkar, ituiōōn̄ in Chile ej juon āne jem̧aden, kōn menin ikar jab aikuj kōtmene n̄an lo jabdewōt men ko ikōn loi ilo Concepción. Iaar keememej kōn ekōjkan an Leman im Lamuel kar en̄jake ke baam̧le eo an Liai raar ilo̧k jān āne in jolet eo aer im jibadōkļo̧k āne jem̧aden.
Ekar lōn̄ aō dān in kōmejaaļaļ ko ke kōm kar tōkākļo̧k ilo Antofagasta. Ta eo enaaj kar waļo̧k eļan̄n̄e iaar en kar ejjeļo̧k m̧ōtta? Ta eo enaaj kar waļo̧k eļan̄n̄e ijjab maron̄ jineete eria eo? Ta eo enaaj waļo̧k eļan̄n̄e kōjatdikdik ko aō n̄an ilju jekļaj rejjab kūr m̧ool?
Ilo jem̧ļo̧kin, iaar jab aikuj in kar inepata. Jinō eaar jim̧we kōn iien ko rem̧m̧an raar kōttar kōm—eļaptata iien ko rem̧m̧an ilo jetōb.
M̧okta jān em̧m̧akūt eo am, gospel eo eaar jab juon menin kōttōpar n̄an n̄a. Irooj eaar jab pedped an mour eo aō. Bōtaab ilo Antofagasta, armej ro raar itok n̄an mour eo aō me raar jipan̄ eō lo aiboojoj eo an gospel eo. Iaar bōk jipan̄ jān ritōl ro an priesthood raorōk. Eaar wōr ro m̧ōtta me rej lukkuun in aorōk wōt n̄an n̄a. Mour in jetōb eo aō eaar kanooj oktak.
Sergio ej loļo̧k ro m̧ōttan ilo institute.
Ij kam̧m̧oolol bwe iaar ron̄jake jinō. Ij kam̧m̧oolo̧l Irooj bwe eaar uwaake jar eo aō. Ij kam̧m̧oolol bwe eaar wōr ippa peran n̄an em̧m̧akūt ituiōōn̄ļo̧k ippān baam̧le eo aō.
Ijin ilo āne jem̧aden ej ijo iaar kōm̧m̧ane oktak ko me kar jipan̄ eō erom wōn n̄a rainin. Ijin ej ijo iaar kallim̧ur n̄an bōk gospel eo, jerbale juon mijen, m̧are ilo tampeļ, im ajeļo̧k mour eo aō n̄an Irooj. Ijin ej ijo iaar jōk ilo ļōmņak bwe ejako aō kōņaan erom āinwōt Leman im Lemuel.
N̄an baam̧le eo aō im n̄a, āne jem̧aden eaar erom ānen kallim̧ur eo am.