2019
Jebta 1: Aiintok juon Kumi
Juļae 2019

Jebta 1

Aiintok juon Kumi

Taujin Armej ro Rekwojarjar rej koboobtok ippān doon ke eman̄ijn̄ij ainikien Lucy Mack Smith ilo jikin kweilo̧k eo ekilep ilo teek eo kein kajuon ilo kar Nauvoo Temple eo eitōn m̧ōj.

Ekar ilo jibbon̄ in Oktoba 8, 1845, raan eo kein kajilu im āliktata ilo kweilo̧k eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo an kar jeļā ke eban kar lōn̄ļo̧k an iien n̄an kōnono n̄an Rikwojarjar rein—eļaptata kiiō ke raar karōk n̄an ilo̧k jān Nauvoo n̄an juon jikin ekāāl ijo ettoļo̧k irālik—Lucy eaar kōnono kōn juon kajoor ekajoorļo̧k jān ānbwin emōjņo̧ jiljilimjuonn̄oul-iiō rūttoin.

“Kar jon̄oulrualitōk iiō emootļo̧k ilo Jeptōm̧ba ron̄oul ke Josep eaar bōk pileij ko jān bwidej,” eaar kam̧ool, “im kar ralitōk iiō emootļo̧k M̧ande eo ļo̧k jān ke Josep Smith, rikanaan eo an Irooj—”1

Eaar bōjrak, kakeememej Josep, ļeo nejin em̧ōj m̧ane. Rikwojarjar ro ilo ruum̧ eo raar jeļā kadede kōn an kar juon enjeļ in Irooj kar tōl ļo̧k e n̄an pileij gold ko kar kalbwin ilo juon toļ ņaetan Kumura. Raar jeļā ke Josep eaar ukōt pileij ko kōn mennin letok im kajoor an Anij im kar je ļo̧o̧k eo āinwōt Bok in Mormon eo. Bōtaab jete Rikwojarjar ilo jikin kweilo̧k eo raar lukkuun jeļā kake e?

Lucy ej keememej wōt ke Josep, ilo iien eo kar ron̄oul-juon iiō dettan, kar kōnnaniki ke Anij eaar lōke kōn jet pileij. Eaar ikum̧kum̧ aolepān jibbon̄ōn eo, mijak n̄e erool tok jān toļ eo ilo an ejjeļo̧k kobban pein, ilo an kar āndein iiō ko emān remootļo̧k. Bōtaab ke ej rooltok, eaar m̧ōkaj im joļo̧k abņōņō eo an. “Kwon jab ikum̧kum̧,” eaar ba. “Em̧m̧an aolep men.” Eaar kiiō leļo̧k n̄an e kein ukook eo Irooj eaar kōpooje n̄an ukook eo an pileij ko, kar lipopo kōn juon m̧ōttan nuknuk, āinwōt juon kam̧ool ke eaar tōprak an bōk ļo̧o̧k ko.

Kar jejjo wōt ro ritōmak iien eo, eitōn aolep uwaan Smith baam̧le. Kiiō elōn̄ļo̧k jān jon̄oul juon taujin Rikwojarjar jān North America im Europe raar jokwe ilo Nauvoo, Illinois, ijo Kabun̄ eo kar kuk ippān doon ie ium̧win iiō ko jilijno remootļo̧k. Jet iaer raar kāāl tok n̄an Kabun̄ in im kar jab wōr iien aer ioon Josep ak ļeo jein Hyrum m̧okta jān an kar juon kumi in rikōjdat m̧an ļōm̧arein ruo ilo Juun 1844.2 Unin an kar Lucy kar kōņaan kōnono kōn mej eo. Eaar kōņaan kam̧ool kōn kūr in kanaan eo an Josep im ijo koņaan baam̧le eo an ilo Jepļaaktok eo an gospel in m̧okta jān an Rikwojarjar ro em̧m̧akūt ettoļo̧k.

Eļapļo̧k jān juon allōn̄, rinana ro raar tili mōko im pejnej ko an Rikwojarjar ro iturin jikin kōppad eo. Leln̄on̄ kōn mour ko aer, elōn̄ baam̧le raar ko n̄an Nauvoo n̄an kōjpārok. Bōtaab kumi in rinana eo rekar eddōkļo̧k im kajoorļo̧k ilo an wiik im bar wiik eļļāļo̧k, im ejjab to tariņae ko rejidimkij kar kōm̧m̧an ikōtaer im Armej ro Rekwojarjar. Kapijuknen eo im kien eo eļap rekar jab kōm̧m̧an jabdewōt men n̄an kōjparok jim̧we eo an Armej ro Rekwojarjar.3

Ilo aer kar tōmak jidik wōt iien m̧okta jān an bar rinana ro jodiki Nauvoo, Ritōl ro an Kabun̄ in raar kōm̧m̧an koņ n̄an em̧m̧akūt jān bukwōn eo m̧okta ilo jibriin̄.4

Ilo an bōk tōl jān revelesōn, Brigham Young im bar jet uwaan Doulul eo an Jon̄oulruo Rijilōk ro kar karōk n̄an kōm̧m̧akūt Armej ro Rekwojarjar elōn̄ļo̧k jān juon taujin m̧aiļ irālik, itulikin Rocky Mountain ko, itulikin wōt ļain in kōkaļļe eo an Amedka. Āinwōt ritōl eo ilo doulul eo an Kabun̄ in, Jon̄oulruo ro raar kwaļo̧k ennaan in kālet in n̄an Armej ro Rekwojarjar ilo raan eo jinoin tata ilo kweilo̧k eo eļap ilo fall eo.

“Irooj ej karōk n̄an tōl kōj n̄an juon m̧eļaaj in jerbal eo edebakbak, “rijilok Parley Pratt eaar kōmejajaiki, “ijo jemaron̄ m̧ōņōņō kōn pedped in katak ko rerreo an anemkwoj im jim̧we ko rej āinwōt juon n̄an aolep.”5

Lucy eaar jeļā ke Armej ro Rekwojarjar remaron̄ kar jipan̄ e ilo iaļ in eļan̄n̄e ekar kālet in etal. Revelesōn kein rekar kean̄ bwe Armej ro Rekwojarjar ren kuk ippān doon ilo juon wōt jikin, im Jon̄oulruo ro raar kijejeto n̄an kōm̧m̧ane ankilaan Irooj. Bōtaab Lucy eaar rūtto im tōmak ke eban to an mour. N̄e emej, eaar kōņaan kallib iturin Josep, Hyrum, im bar jet iaan uwaan baam̧le ko raar mej m̧oktaļo̧k, koba ļeo pāleen, Joseph Smith Sr.

Kōn menin, eitōn aolepān baam̧le eo an remour rej pād wōt ilo Nauvoo. Ļeo nejin ej make wōt mour, William, kar juon uwaan Doulul eo an Jon̄oulruo Rijilōk, ak eaar jab bōk kūr in tōl in im abin etal irālik. Limaro nejin jilu—Sophronia, Katharine, im Lucy—rekar bar pād wōt. Bar lio nej nejin Emma, kar pāleen rikanaan eo.

Ilo an Lucy kar kōnono n̄an jar eo ilowaan jikin kweilo̧k eo, eaar jiron̄ riron̄jak ro an n̄an jab leln̄on̄ kōn iaļ eo im̧aan. “Jab ebbweer im ba ke kwojjab maron̄ ebbōk wākōn im bar jet men,” eaar ba. Mekarta jeram̧ōl im aer tōn m̧an er, baam̧le eo an make raar kakūrm̧ool kien eo an Irooj n̄an kōm̧m̧ane bwe en jeje im diwōjļo̧k n̄an armej Bok in Mormon eo. Eaar rōjan̄ er n̄an ron̄jake ritōl ro im kōm̧m̧an em̧m̧an n̄an ro jet.

“Āinwōt an Brigham ba, kom̧ij aikuj aolep m̧ool ak n̄e ejjab kom̧ ban tōpar ijōņ,” eaar ba. Eļan̄n̄e kwoj en̄jake bōd, enaaj wōr am̧ inepata.”

Lucy eaar bar kōnono eļapļo̧k kōn baam̧le eo an, ke eaar lukkuun kar kaamijak aer kar ton kakkure er ilo Missouri im Illinois, im melejon̄ ko im̧aan nej n̄an Armej ro Rekwojarjar. “Ij jar bwe Irooj en maron̄ kōjeraam̧m̧an ro jeban Kabun̄ in, Brother Brigham im aolepāer,” eaar ba. “N̄e inaaj etal n̄an bar juon laļ ij kōjatdikdik in ioon kom̧ aolep.”6

Ilo Jānwōde 1846, Brigham eaar ikutkut an kweilo̧k ippān Doulul eo an Jon̄oulruo Rijilok ro im Ko̧o̧njeļ in Lemn̄oul eo, juon ra me ej lale abņōņō ko ilo kaniōk me an aelōn̄ in kiin̄ an Anij ilo laļ in, n̄an karōk wāween eo em̧m̧antata im m̧ōkajtata n̄an em̧m̧akūt jān Nauvoo im kalōk juon jikin kuk ippan doon ekāāl n̄an Armej ro Rekwojarjar. Heber Kimball, rijilōk eo juon m̧ōttan, ekar ba bwe ren tōl juon kumi jidikdik in Armej ro Rekwojarjar irālik iien eo em̧ōkajtata.

“Bōktok ippān doon juon kumi in ro remaron̄ make lolorjake er make,” eaar rōjan̄, “n̄an pojak ilo jabdewōt iien n̄e naaj kūr er n̄an etal im kōpooj juon jikin n̄an baam̧le ko aer im ro rijerata.”

“Eļan̄n̄e ewōr juon kumi in etal im̧aan n̄an etal im katōk kein ekkat ilo jipriin̄,” rijilok Orson Pratt eaar kalikkar tok, “eaorōk bwe ren jinoe m̧okta jān jinoin Pāpode.” Eaar kōļmenļo̧kjeņ eļan̄n̄e enaaj em̧m̧an eļan̄n̄e renaaj kōppād ilo juon jikin epaakļo̧k, me enaaj kōm̧m̧an an m̧ōkaj ļo̧k aer ekkat.

Brigham eaar dike ļōm̧nak in. Irooj em̧ōj an kadede kwaļo̧k ke Armej ro Rekwojarjar rej aikuj in jukjuk im amņak iturin Great Salt Lake eo. Ļe eo eaar m̧ōttan Great Basin eo, juon jikin kileplep jekjek in wōt bo̧o̧ļ im kapool kōn tōl. Jikin in eļap wōt āne m̧ōrā im epen n̄an ekkat, ekōm̧m̧an bwe en jab juon jikin em̧m̧an ippān elōn̄ Riamedka ro rej em̧m̧akut irālikļo̧k,

“Eļan̄n̄e jej etal ikōtaan tōļ kan n̄an jikin in ļōm̧nake kake,” Brigham eaar ba, “enaaj ejjeļo̧k ebanban ko jān jikin ko jabdewōt.” Brigham eaar meļeļe ke jikin eo eaar kar wōr kobban kadede kōn riintiān ro. Mekarta eaar kōjatdikdik ke Armej ro Rekwojarjar renaaj kar pād ilubwilijier ilo aenōm̧m̧an.7

Kakeememej ko

  1. Historian’s Office, General Church Minutes, Oct. 8, 1845; “Conference Minutes,” Times and Seasons, Nov. 1, 1845, 6:1013–14. Aolepān riboot in kōnono eo an Lucy ilo kweilo̧k eo an Oktoba 1845, ippān kakobaba ko, ej waļo̧k ilo Reeder and Holbrook, At the Pulpit, 21–26. Topic: Lucy Mack Smith

  2. Lucy Mack Smith, History, 1844–45, book 5, [7]; Saints, volume 1, chapters 4 and 44; Black, “How Large Was the Population of Nauvoo?” 92–93. Unin Kōnono Mej eo an Josep im Hyrum Smith

  3. Solomon Hancock im Alanson Ripley n̄an Brigham Young, Sept. 11, 1845, Brigham Young Office Files, CHL; “Mobbing Again in Hancock!” and “Proclamation,” Nauvoo Neighbor, Sept. 10, 1845, [2]; Gates, Journal, volume 2, Sept. 13, 1845; Glines, Reminiscences and Diary, Sept. 12, 1845; “The Crisis,” and “The War,” Warsaw Signal, Sept. 17, 1845, [2]; “The Mormon War,” American Penny Magazine, Oct. 11, 1845, 570–71; Jacob B. Backenstos to Brigham Young, Sept. 18, 1845, Brigham Young Office Files, CHL; Orson Spencer to Thomas Ford, Oct. 23, 1845; Thomas Ford to George Miller, Oct. 30, 1845, Brigham Young History Documents, CHL; lale barāinwōt Leonard, Nauvoo, 525–42.

  4. To the Anti-Mormon Citizens of Hancock and Surrounding Counties (Warsaw, IL: Oct. 4, 1845), Chicago Historical Society, Collection of Manuscripts about Mormons, CHL; lale barāinwōt Leonard, Nauvoo, 536–42.

  5. Council of Fifty, “Record,” Sept. 9, 1845, ilo JSP, CFM:471–72; “Conference Minutes,” Times and Seasons, Nov. 1, 1845, 6:1008–11.

  6. Katak im Bujen ko 29:8 (Revelation, Sept. 1830–A, at josephsmithpapers.org); Katak im Bujen ko 125:2 (Revelation, circa Early Mar. 1841, at josephsmithpapers.org); Historian’s Office, General Church Minutes, Oct. 8, 1845; “Conference Minutes,” Times and Seasons, Nov. 1, 1845, 6:1013–14.

  7. Council of Fifty, “Record,” Jan. 11, 1846, ilo JSP, CFM:514, 515, 518. Unin kōnono: Ko̧o̧njeļ in Lemn̄o̧ul