Juon Kallim̧ur n̄an juon Ajri

Lluvia Paredes Cabrera

Yucatán, Mexico

Kōmeļeļe jān Pascal Campion

Jet iiō remootļo̧k, iaar kanooj in jab m̧ōņōņō. Men eo de eo imaron̄ kar loe jidik ellowetak n̄an eaar eo m̧ōtta em̧m̧an tata im ajri ro nejin. Kōm kar etetal laļ ilo wiikāān ko, eo iaar m̧ōņōņō kake. Ilo iien ko, mekarta, kōm kar jino dikļo̧k am etetal im jakutkutļo̧k. Iaar jino būrom̧ōje eo m̧ōtta im baam̧le eo an. Tokālik iaar jeļā bwe etetal ko am rekar dikļo̧k im jakutkutļo̧k kōnke eo m̧ōtta im baam̧le eo an raar jino juon iminene raar bōjrak jāne elōn̄ iiō ko im̧aanļo̧k—etal n̄an jar.

Juon raan raar kūrļo̧k eō n̄an juon kōraelep. Lo er bar juon alen eaar kōm̧m̧an menin aō lukkun bar m̧ōņōņō. Iaar jiron̄ er ewi jon̄an aō būrom̧ōj kōn er. Leddik eo jiljino an iiō nejin kōrā eo m̧ōtta eaar kwaļo̧k bwe kōm kar ņa mejļan būrabōlōm ilo am kar etal n̄an jar ippān doon. Kōn menin kōn jab bar ļōmņak, liin eaar kajjitōk bwe in etal ippān.

O, jaab! Ekōjkan aō maron̄ kōm̧m̧an bwe baam̧le in en meļeļe bwe etal n̄an jar ej juon men jim̧we n̄an er bōtaab ekanooj in kamejkiki n̄an n̄a? Ijjan̄in de kar etal n̄an jar ium̧win elōn̄ iiō, bōtaab ekōjkan aō maron̄ ba jaab n̄an juon ajri? Iaar ba inaaj etal, bōtaab m̧ool eo eaar ejjeļo̧k n̄an jidik aō ļōmņak in kōjparok kallim̧ur eo.

Jabōt eo, iaar etal im kōm̧abun̄ ippān jema. Jeeļ boon eo aō eaar jab jem̧ļo̧k an riin̄, kakeememej eō bwe iaar kallim̧uri leddik jidikdik eo bwe inaaj kar etal im jar ippān. Iaar kowaan jeeļ boon eo aō m̧ae iien eo jema eaar kajjitōk etke iaar jab uwaake. Iaar kwaļo̧k bwe kar karuwaineneik eō n̄an etal n̄an juon kweilo̧k in jar bōtaab kar jab kōņaan etal. Eaar ettōn̄ dikdik im ba, “Lluvia, jab bar kōm̧m̧an kallim̧ur n̄an juon ajri eļan̄n̄e kwojjab kōņaan kakūrm̧oole.” Iaar kāālet bwe inaaj kar kōjparok aō kallim̧ur.

Ke iaar jikrōkļo̧k ilo m̧ōn jar eo, iaar en̄jake juon men eoktak, juon men me ijjab maron̄ kōmeļeļeiki. Ijjan̄in de maron̄ kōmeļeļeiki ekōjkan an kar waļo̧k, bōtaab ilo Jabōt eo tok juon, iaar lo eō make ij jar bar juon alen, im iien eo tok im bar eo tok juon, m̧ae iien iaar meļeļe ta eo iaar en̄jake: Jetōb Kwojarjar eo.

Ro uwaan Kabun̄ in raar jino kōm̧m̧an bwe in en̄jake aenōm̧m̧an. Kōn ejjeļo̧k pere, iaar itok limo kōn Kabun̄ in. Iaar jino ioon mijenede ro, im iaar barāinwōt jino bōk juon naan in kam̧ool. Lotok ko an mijenede ro raar jino aer wōnm̧aanļo̧k, im aō meļeļe kōn gospel eo eaar eddōkļo̧k m̧ae iien eo iaar en̄jake juon ikdeelel kijon̄jon̄ n̄an peptaij. Iaar peptaij juon iien ekadu tokālik, im kiiō ij lem̧ōņōņō kōn kōjeraam̧m̧an ko an gospel eo. Kōn menin, ij kanooj kam̧m̧oolol bwe iaar dāpij kallim̧ur eo aō n̄an juon leddik jiljino iiō dettan.