Kōmij Rikam̧ool ro: Rijilōk ro Jon̄oulruo Rainin
Rijilōk ro raan kein rej kwaļo̧k ļōmņak ko aer kōn kūr eo aer ekwojarjar.
Pija jān Busath Photography
Ilowaan 189 iiō jān kar ejaak eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata, 102 em̧m̧aan ro kar kūr er n̄an jerbal āinwōt ro uwaan Doulul eo an Rijilōk ro Jon̄oulruo. Men̄e Irooj eaar tōl elōn̄ oktak ko ilo Kabun̄ in jān tōre eo, jerbal ko raorōk tata an juon Rijilōk rej ejja āinwōt juon.
Jān opiij eo an iturin Temple Square eo, Būreejtōn M. Russell Ballard, Acting Būreejtōn eo an Doulul eo an Jon̄oulruo Rijilōk ro, eaar kōnono kōn eddo ko ilo jetōb kar liļo̧k n̄an Rijilōk ro n̄an kam̧ool kōn Rilo̧mo̧o̧r eo ipeļaakin laļ in, kōn ekkeijel eo ejeno̧lok rej kwaļo̧k ippān mijenede ro, im kōn jet meļeļe ko jeļā kaki kōn āinwōt “juon rijilōk, rilolo, im ribōk revelesōn.” Ke kar kajjitōk eļan̄n̄e eaar wōr ro jet uwaan Doulul eo an Jon̄oulruo Rijilōk ro ro renaaj kar kwaļo̧k n̄an kōnono kōn kūr ekwojarjar eo aer āinwōt m̧ōttanļo̧k bwebwenato in, Būreejtōn Ballard eaar m̧ōkaj an uwaak, “Aaet. Aolepeer.”
Ron̄jake im Meļeļe
Idajon̄jon̄ ko Reļļap rejeļm̧ae Rijilōk ro rainin. Rej jerbal in karejar n̄an jarelepju ko ipeļakin laļ in me rej ioon tarpok in kien, jepeepeļo̧k an baam̧le, apan̄ ko rejjab bōjrak an social media, im menin jeraam̧m̧an (economic) jab po lel kaki. Eaorōk bwe Rijilōk ro ren meļeļe apan̄ ko im jekjek ko me membōr ro rej iooni.
Āinwōt ritōl ro an Kabun̄ in, Rijilōk ro rej aikuj jeļā kōn armej ro im jekjek ko aer bwe en maron̄ em̧m̧anļo̧k aer jerbal n̄an er.
“Kōmij aikuj in ekkatak men ko rejelet mour ko an armej ro,” Elder Ulisses Soares eaar ba. “Rijilōk raikuj in pād wōt ilo jekjek eo ejjab oktak an ekkatak, kajjitok, im ebbōk im̧we im revelesōn.”
An aorōk in wōt n̄an meļeļe ta eo membōr ro rej ioone, em̧ool eļapļo̧k an aorōk n̄an Rijilōk ro n̄an kanooj ron̄jake ainikien tōl eo an Anij im n̄an meļeļe ankilan Irooj, Būreejtōn Ballard eaar ba. “En̄in ej Kabun̄ eo an Irooj, im idajon̄jon̄ am eļap tata ej n̄an jeļā bwe kōmij meļeļe ekōjkan An kōņaan bwe kōmin jerbal ilo aelōn̄ in kiin̄ eo An ioon laļ in,” Būreejtōn Ballard eaar ba.
Rikam̧ool ro Rejenolo̧k
Ilo an kajjojo Rijillōk ro kōnono kōn kūr eo an, em̧ōkaj an alikkar bwe jerbal ko an opiij ejjab aorōk tata ippāer. Eddo eo aer aorōk tata ej ejja men eo wōt āinwōt ekkā kōm̧m̧ane aolep iien—Rej aikuj in “rikam̧ool ro rejenolo̧k kōn etan Kraist ilo aolepān laļ” (Katak im Bujen ko 107:23).
Tōl eo āliktata an Rilo̧mo̧o̧r n̄an Rijilōk ro An (lale Matu 28:19–20) eaar n̄an ilo̧k “n̄an katakin, n̄an kam̧ool, n̄an peptaij im n̄an kalōk im kōkajoorļo̧k Kabun̄ eo An,” Būreejtōn Ballard eaar ba.
Rainin eddo eo an Rijilōk ro ejjan̄in oktak. “Men eo aorōk tata, aolep iien, kōmij rikam̧ool ro kōn m̧ool eo em̧our kōn Irooj Jisōs Kraist,” Elder David A. Bednar eaar ba. “Kōmij jab ritōl ilo opiij (administrator), kōmij rikwaļo̧k gospel eo an Jisōs Kraist.”
Rijilōk ro rej ekkapit “n̄an rikam̧ool ro rej ito itak” ro rej ilo̧k n̄an “aolepān laļ in,” Elder Jeffrey R. Holland eaar ba. “Kōm kōņaan barāinwōt iunit eo an Kabun̄ in ettoļo̧k tata, n̄e kōnono kōn jikin, n̄an en̄jake bwe ewōr juon ekkeijel elukkuun in epaak ikōtaer im rikanaan eo an Irooj” eaar ba. “Ekōn emakijkij ba, ‘Kabun̄ in ej kōm̧m̧an bwe laļ in en āinwōt edik.’ Ilo jekjek eo kōn tōpar Rijilōk ro, jej kōjatdikdik bwe menin ej āindein aolep iien.”
Kom̧win Ilo̧k, im Kōm̧m̧an Ri Aelōn̄ ko Otemjej, jān Harry Anderson
Tōpar Aolep Stake
Elder Quentin L. Cook eaar kōmeļeļeik bwe iumin aolep emen iiō, aolep kajjojo stake im ward, district im branch, ilo Kabun̄ in ewōr juon uwaan Jon̄oulruo ro rej etal im kweilo̧k ippān ritōl ro an—im kamineneik er kōn kōttōpar ko an rikanaan eo.
“Kweilo̧k ko an ritōl raar kōtļo̧k bwe kōmin kakūrm̧ool eddo eo am ilo katak eo n̄an ‘[kalōkļo̧k] kabun̄ in im [kajebābweik] aolep jerbal ko an ejja in wōt ilo aolep laļ ko’ [Katak im Bujen ko 107:34] ium̧win tōl eo an Būreejtōnji eo Kein Kajuon,” eaar ba.
Ippān doon, tijem̧ļo̧k in katakin ko rellōn̄, kajoor jān ro uwaan Doulul eo an Jon̄oulruo Rijilōk ro rejipan̄ tōl ritōl ro ijoko rej pād ie ilo aer kōm̧m̧ani jokāālet ko raorōk n̄an kōketak im rejtake membōr ro ilo apan̄ ko aer, Elder Bednar eaar ba.
“Ilo am ilo̧k n̄an jikin ko rokoktaktak, kōmij en̄jake em̧m̧an eo an membōr ro,” Elder Gerrit W. Gong eaar ba. “Kōmij ron̄jake en̄jake ko im kōmij ekkatak men ko me rejipan̄ kōm n̄an meļeļe ilo am ko̧o̧njeļ ippān doon āinwōt juon doulul kōn ta eo ej waļo̧k ilo m̧ōttan ko rokoktaktak an laļ in im ilo kurup ko rokoktakta ilowaan Kabun̄ in.”
Ilo̧k n̄an kweilo̧k ko an ritōl “ej letok n̄an kōm iien eo em̧m̧an n̄an ikitōltōl ippān armej ro raiboojoj im rem̧m̧an,” Elder Cook eaar ba. “Kōmij etal n̄an im̧ōko m̧weer, im ewōr am iien n̄an jerbal in karejar n̄an er. … Ej jerbal in karejar eo n̄an Armej ro Rekwojarjar me rej un̄ur ijo em̧wilaļ tata ilo būruwōm. Kōmij kōm̧m̧ane kōn tōl eo jān Jetōb Kwojarjar eo im Rilo̧mo̧o̧r eo kōn jeļā eo kar ekkatak jān en̄jake, jet rekanooj ekwojarjar n̄an kwaļo̧k,” eaar ba.
Jerbal in Karejar n̄an Kajjojo Armej
Ālkin 43 iiō ko āinwōt juon Ritōl Eutiej im kiiō ilo kein ken̄oul iiō in jerbal ilo Doulul eo an Jon̄oulruo Rijilōk ro, jerbal ko an Būreejtōn Ballard kar bōkļo̧k e n̄an enan̄in aolep laļ ko ilo laļ in, kōm̧m̧an bwe en jerbal in karejar im jelm̧ae elōn̄ membōr ro im mijenede ro. Milien kar ron̄jake kōnono ko an ilo kweilo̧k eo eļap im iien nokon ko. Bōtaab ilo an bōk juon eddo n̄an aolepān laļ in, Jetōb Kwojarjar eo ej kōtļo̧k an ekkeijel ippān im kōjeraam̧m̧an kajjojo armej. Menin āinwōt epen n̄an meļeļe kake ej wāween eo an Rilo̧mo̧o̧r, eaar ba. “Jet iien ij bōk juon leta jān juon eo ej ba, ‘Iaar pād ilo kweilo̧k eo, im kwar ba juon men me eaar ukōt mour eo aō.’ Ej kajoor eo an Jetōb Kwojarjar. Irooj ej kea kōn men ko reddik tata ilo Kabun̄ eo An.”
Ekanooj “lōn̄ men ko rem̧m̧an, en̄jake ko reļem waan ippān ro uwaan Kabun̄ in ilo aolepān laļ in” rej kōmeļeļeik jerbal in karejar an rijilōk Elder Bednar eaar ba. “Irooj ej jilkinļo̧k juon uwaan Doulul eo an Jon̄oulruo Rijilōk ro n̄an jikin ko renejo̧lok ilo iien ko rejejjet ijo kōmij ioon Armej ro Rekwōjarjar ilo Raan-ko Āliktata im ro jet me ekkā aer kakkōt ak rej pād ilo aikuj kaenōm̧m̧an im kōketak. Anij ej karōk ikitōltōl kein,” Elder Bednar eaar ba.
Elder Ronald A. Rasband eaar ba bwe ālkin kūr e n̄an rijilōk, eaar ekkatak bwe eaar aikuj in kobaik dam̧oļo̧k in iien n̄an aolep m̧akūtkūt n̄an mour eo an bwe en maron̄ iak-iakwe ro uwaan Kabun̄ in im ro jet. “Ejjab kōn n̄a,” eaar ba. “Ej kōn nebar im utiej eo ro uwaan Kabun̄ in rej kwaļo̧k n̄an opiij eo an rijilōk.”
Elder Rasband eaar ba menin ilo iien ekkapit eo an n̄an rijilōk, kar rōjan̄e, “‘Kōmij likūt eok ilo juon jerbal n̄an erom juon rikam̧ool ejenolo̧k kōn etan Kraist ilo aolepān laļ in … ilo iien otemjej im ilo aolep jekjek.’ Naan ko raar kobaik ilo ekkapit eo aō: ‘ilo iien otemjej im ilo aolep jekjek ko.’”
Būreejtōn Ballard ilo Spain
Elder Holland ilo England
Elder Uchtdorf ilo Russia
Elder Bednar ilo Peru
Pija jān Juan Antonio Rodriguez (Spain), Simon Jones (England), Luis Antonio Arroyo Abando (Peru), Christen Albo (Argentina), Dalene Griffin (Mexico), Alexandre Borges (Brazil)
Juon Kadkad Aorōk
Rijilōk ro im elōn̄ļo̧k jān 70,000 mijenede ro rej jerbal aolep raan rej kwaļo̧k juon kadkad, ekkeijel ekwojarjar.
Naan eo rijilōk ej itok jān juon naan in Greek meļeļe in “n̄an jilkinļo̧k,” Elder Dale G. Renlund eaar kōmeļeļeik. Ļōmņak kōn eddo eo aorōk an Rilo̧mo̧o̧r n̄an Rijilōk ro An etto: “Kom̧in ilo̧k n̄an aolepen laļ, im kwaļo̧k gospel n̄an armej otemjeļo̧k. Eo ej tōmak im peptaij, enaaj mour.” (Mark 16:15–16).
Ilo ļoor kean̄ in, Jon̄oulruo ro rej “ilo jim̧we rej bōk kuņaer” ilo jerbal in mijenede im bōkļo̧k ennaan eo an gospel eo, Būreejtōn Ballard eaar ba.
Āinwōt Paul eo etto, Rijilōk ro rainin rej jar kōn waween leto letak jerbal ko aer n̄an kwaļo̧k gospel eo ippān ro jet. Im, ilo jekjek eo āinwōt an rijilōk, mijenede ro rej jilkinļo̧k er aolepān laļ in n̄an katakin gospel eo an Kraist. “Ej Jon̄oulruo ro rej, kōjerbal kii ko me ewōr ippāer, ro rej jitōn̄ er n̄an mijen ko” Elder Bednar eaar ba. “Im kōn menin kōmij jilkinļo̧k er.”
Irooj ej pād wōt ilo an ritōl n̄an jerbal in mijenede. Ej kōmālim Rijilōk ro An remour, ro em̧ōj jitōn̄ er ilo iien ko roktak jān doon n̄an jerbal ilo Missionary Executive Council eo, n̄an ekōnono kōn kōņaan ko An n̄an mijinede ro rej jerbal aolep raan ilo mijen ko. Kain jerbal in tōl ko eļapļo̧k jān baj “tōl juon doulul,” Elder Bednar eaar ba. Rijilōk ro rej kabwijer kii ko n̄an aiintok Israel. “Kōmij leļo̧k unin tōl eo ilo jetōb im tōl eo bwe jerbal eo ej kōm̧m̧an ilo wāween eo Irooj ej kōņaan,” eaar ba.
Elder Dieter F. Uchtdorf ej tōl Missionary Executive Council eo an Kabun̄ in. Jijet ioon tebōl eo ilo opiij eo an ej juon annan̄ būraan (bronze sculpture) in juon kōmpānien in mijenede kar kwaļo̧k ilo aer buuļ patōle bajkōļ eo, bōlen ekairir n̄an juon iien ekkatak. Jabdewōt iien ej ekkatak annan̄ būraan eo, ej kakememej e kōn ekkeijel eo ejjab tūm̧ ikōtaan Rijilōk ro im mijenede ro. “Aolep kajjojo mijenede ro 70,000 rej kōm̧m̧ane juon jebal in jipan̄ ekwojarjar im rej kūr jān Irooj kōn juon leta jān rikanaan eo an Anij n̄an erom ribōk jikin Rilo̧mo̧o̧r. Er rej juon kein jerbal n̄an jipan̄ kadedeļo̧k jerbal eo an Jon̄oulruo ro.”
“Jabdewōt iien ewōr am iien, kōmij kweilo̧k ippāer,” Būreejtōn Ballard eaar ba. “Kōm kōm̧m̧an bwe ren kajjitōk kajjitōk ko. Kōmij kajjion̄ jipan̄ er kappukōt, peptaij, im kōkajoorļo̧k ajri ro nejin Jemedwōj Ilan̄.”
Jerbal ippān doon, kurup ko jim̧or rej jilkinļo̧k n̄an kwaļo̧k ennaan eo em̧m̧an an gospel eo ilo aolepān laļ in. “Kōmij watōk mijenede ro rej jerbal aolep raan āinwōt kōmpānien ro m̧ōttam,” Elder D. Todd Christofferson eaar ba.
Bōd in Meļeļe
Ilo an jet riaron̄ron̄ ro itulikin maron̄ ļōmņak Kabun̄ in ej tōl āinwōt juon kom̧bani “ejjab āinwōt juon business executive, ebwe an oktak,” Elder Gary E. Stevenson eaar ba. “Jerbal eo an juon Rijilōk an Irooj Jisōs Kraist ej lukkuun juon jerbal in tōl, kwaļo̧k.” Jerbal eo kōn erom juon rikam̧ool an Jisōs Kraist n̄an laļ in “ej katakin im ej kōmeļeļeik kōm.”
Elder Neal L. Andersen eaar ba bwe ilo Doulul eo an Jon̄oulruo Rijilōk ro, kumi ko, kajjion̄ kareel ro jet n̄an ļoor karōk ko am̧, ak aiin aolep kajoor. Ewōr “ļōmņak ko roktak,” bōtaab “ejjeļo̧k juwa.”
Irooj ej likūt elōn̄ armej ro ippān doon jān jerbal ko roktak im iminene ko, Elder Andersen eaar ba. Bōtaab “rej eier wōt juon ilo naan in kam̧ool eo aer kōn Rilo̧mo̧o̧r im ilo aer ettā. Rejjab pukōt jerbal eo, rejjab kajjion̄ in erom armej eo emeletlet tata ilo ruum̧ eo. Irooj emaron̄ jerbale men jab in. Ijjan̄in kar lo jabdewōt [ilo Jon̄oulruo eo] kwaļo̧k illu, im ijjan̄in kar lo an juon lāj n̄an bar juon.”
Ettā ej kōmeļeļeik rijilōk, Elder Uchtdorf eaar ba. Kūr ko aer ekōm̧m̧an bwe ren kile er enan̄in aolep jikin ko rej ilo̧k n̄ani, “bōtaab kōm jeļā ejjab kōn kōm—ej kōn E. Kōmij jerbal ilo Etan. … Ej kōn em̧m̧an eo An.”
Elder Cook ilo Argentina
Elder Christofferson ilo Mexico
Elder Andersen ilo Brazil
Elder Rasband ilo India
Kōm Aolep kar Kūr n̄an Jerbal
Ālkin mej im Jerkakpeje eo an Rilo̧mo̧o̧r, Eaar katakin rikaļoor ro An ium̧win 40 raan ko innām weaakļo̧k n̄an lan̄. Kōnke juon peļļo̧k ilo Doulul eo an Jon̄oulruo Rijilōk ro—kar kōm̧m̧an jān riliaakeļo̧k eo im mej eo an Judas Iscariot—ro uwaan doulul eo an raar koba ippān doon im kar jar n̄an Irooj.
Ruo em̧m̧aan ro, Mattaias im Barsebas, kar jeļā kake, im Rijilōk ro raar jar bwe Irooj en kar kwaļo̧k “Wōn iaerro Kwōj kāālōte, … im e alikkar Mattaias, rej bwine ņa ippān jon̄oul im juon ri jelōk” (lale Jerbal 1:23–26).
Āinwōt kar etto, rainin, “kūr āinwōt juon Rijilōk ejjab juon tōprak ak anjo̧,” Elder Renlund eaar kōmeļeļeik. “Ejjab juon kūr jej kōļļā jāne. Mattaias, ilo Jerbal jepta 1, kar kāālet jān Anij ijello̧kin Barsebas. Anij ejjab jiron̄ kōj etke. Bōtaab men eo jej aikuj jeļā ej bwe naan in kam̧ool eo an Barsebas ej kautiej Rilo̧mo̧o̧r im Jerkakpeje eo An ekar jon̄an wōt naan in kam̧ool eo an Mattaias.”
Anij eaar kāālet, ekar kōmeļeļeik. “Eļan̄n̄e Barsebas eaar kakūrm̧ool jekdo̧o̧n ta kūr eo eaar bōke, jinekjej eo an eaar ejjeļo̧k oktak jān eo me Mattaias eaar bōke, eļan̄n̄e eaar kōļapļo̧k kūr eo an.”
Ejja āinwōt an jon̄an wōt juon naan in kam̧ool eo an Barsebas n̄an naan in kam̧ool eo an Mattaias, aolep ro uwaan Kabun̄ in ej kōtļo̧k n̄an im maron̄ “kaddōkļo̧k kadkad eo āinwōt jemjerā an rijilōk ippān Irooj,” Būreejtōn Ballard eaar ba.
Jerbal in jipan̄ n̄an Irooj im Kabun̄ eo an ej “juon iien em̧m̧an im juon kōjeraam̧m̧an. Ej juon menin utiej,” Elder Uchtdorf eaar ba. “Irooj ej kwaļo̧k An iakwe n̄an kōj, im jemaron̄ kwaļo̧k ad iakwe n̄an Irooj kōn kōm̧m̧ane jabdewōt Ej kajjitōk ippād n̄an kōm̧m̧ane.”
Juon En̄jake Ekwojarjar
Erom m̧ōttan juon ko̧o̧njeļ eutiej ej etal n̄an aolep jikin ej juon en̄jake ekwojarjar, Elder Andersen eaar ba. “N̄e kōmij kwaļo̧k naan in kam̧ool, naan in kam̧ool eo ej deļo̧n̄e būruwōn armej ro, jidik in, kōnke kōn ekkapit eo am.”
Elder Christofferson eaar ba bwe ilo jinoin an kar jerbal in karejar āinwōt juon rijilōk, eaar en̄jake tōrjān jon̄an kōn ļōmņak kōn kōtmene ko. Bōtaab innām eaar bōk juon ennaan eļem waan jān Irooj: “Meļo̧kļo̧k eok im ta eo armej remaron̄ ļōmņak kōn kwe, men̄e rej kabwilōn̄ eok ak kainepataik eok ak bar men ko jet. Kalimjōk wōt ta eo ikōņaan leļo̧k n̄an er kōn kwe. Kalimjōk wōt ta eo ikōņaan bwe ren ron̄ jān kwe.”
Jet iiō ko remootļo̧k, Elder Christofferson eaar loļo̧k Mérida, Venezuela, ijo juon ļaddik edik, bōlen 7 iiō dettan, kar leo jān juon wintō im kar jino lam̧ōj, “El Apostol, el Apostol!” (“Rijilōk, Rijilōk!”).
“Ej juon men eļem waan, bōtaab ej kwaļo̧k n̄an n̄a m̧wilaļ in kam̧m̧oolol bwe jekdo̧o̧n ajri ro ewōr aer kōn kūr eo,” eaar ba. “Ejjab kōn armej eo me ej kabwijer kūr eo. Ajri eo eaar ekkatak bwe jon̄an kaam̧oolol eo n̄an kūr eo im ta ej jutak kake.”
Elder Rasband ilo India; Elder Stevenson ilo Hong Kong; Elder Renlund ilo Brazil; Elder Gong ilo Shanghai, China; Elder Soares ilo Brigham Young University
Pija jān Wendy Gibbs Keeler (India), Clebher Tex (Brazil), Monica Georgina Alvarado Zarate (Shanghai), Janae Bingham (BYU)