Naan eo Āliktata
Ta eo Kwonaaj Loe ilo Bok in Mormon eo?
Jān Elder Gary E. Stevenson
Jān Doulul eo an Jon̄oulruo Rijilōk ro
Jān kōnono eo ilo Oktoba 2017 kweilo̧k eo eļap.
N̄e kolo iien im juon jikin elur n̄an riiti Bok in Mormon, ij lo am̧ lo uwaak ko, en̄jake tōl, im bōk naan in kam̧ool eo am̧ make kōn Bok in Mormon im juon naan in kam̧ool kōn Jisōs Kraist.
N̄e kwoj riit, kwonaaj ekkatak eoon ko an bok in eaorōk im ioon Rilo̧mo̧o̧r eo am̧ ejitōnbōro, Irooj Jisōs Kraist, ilo enan̄in aolep peij. Ej watwat bwe jet kain āt ko Etan rej kōjerbale ej jon̄an eo ilo aolep kajjojo 1.7 eoon ko.1 Em̧ool Kraist E make eaar kam̧ool kōn m̧ool eo an ilo raan kein āliktata, ba, “Āinwōt amijel Irooj im amijel Anij emour e em̧ool” (Katak im Bujen ko 17:6).
Ij kam̧m̧oolol kōn kūr eo im kallim̧ur eo me Irooj eaar letok kōn rikanaan Moronai n̄an kajjojo iaami—im n̄an aolep ro rej riiti Bok in Mormon: “Im n̄e kom̧ naaj būki men kein [Bok in Mormon], Ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan [Jisōs] Kraist, eļan̄n̄e men kein rej jab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwōjarjar.” (Moronai 10:4; lale barāinwōt eoon 3, 5).
M̧ool ko kwonaaj loi ilo Bok in Mormon renaaj ļōn̄aj im im̧we eok. Renaaj kōkajoorļo̧k am̧ tōmak, kobrak am̧ kōn meram, im kōpooj eok n̄an juon am̧ ilju jekļaj jidik wōt am̧ maron̄ meļeļe kake.
Ilowaan peij ko ilo bok eo, kwonaaj lo iakwe indeeo eo im jouj eo an Anij ban meļeļe kake. Ilo am̧ kajieon̄ ļoor katak ko kwoj loi ijo, am̧ lan̄lōn̄ enaaj depakpak ļo̧k, am̧ meļeļe enaaj eddōk ļo̧k, im uwaak ko kwoj pukōti n̄an elōn̄ apan̄ ko ilo mour wabanban in naaj peļļo̧k n̄an eok. Il am̧ reilo̧k n̄an bok eo, kwoj reilo̧k n̄an Irooj.