Etke Anij Eaar Jab Kakkōl Eō?

Lark Montgomery

Texas, USA

Ļeo Pāleō im n̄a kar jokwe ilo m̧ōko an ilo kāāmbōj eo ilo Texas State Technical Institute eo ke ajri ro ruo nejim rerūtto raar emen im ruo aer iiō. Eaar en̄jake eo am kein kajuon ilo Texas hill country, im iaar iakwe! Aolep jibūriin̄, ioļapļap in Texas ej obrak kōn wut ko. Ilo jikin kallib ko, wōjke ko, meļaaj ko ejjeļo̧k kobbaer, ilo tōrerein iaļ ko, aolep jikin iaar reilo̧k eaar lōn̄ļo̧k wut ko rebbōl n̄an lali.

Iaar ektake ajri ro nejū ioon waan bwilbwil waan ajri enan̄in aolep raan. Kōm kar lo jikin ko rekāāl n̄an etali, im iaar kōtļo̧k an ajri ro nejūm ebbōk wut auwia ko jon̄an wōt eo raar kōņaan. Kōm kar kadedeļo̧k wabwilbwil eo am ilo juon jikin epaak ijo jikūm elōn̄ wōt iaan m̧ōko raar aiboojoj aer kōm̧m̧ani jikin kallib wut ko.

Juon raan kōm kar jepooļ juon kona n̄an lo bwijin peba ko rejepelōklōk ilo aolepān juon iaan jikin kallib wut ko. Em̧ōkaj an kōto kar kajepelōlōk peba ko ilo aolepān meļan eo. Iaar kāālet n̄an aiin kopej ko m̧okta jān an ļapļo̧k an ejepelōklōk. Iaar aiintok bwjin in peij ko im kanni ilo pāāk in kaļ eo aō.

Ke iaar reilaļļo̧k, iaar kile iaar jibwe bok in pija ko renana. Ļo̧kjenaō, iaar kajjitōk ippān ajri ro nejū n̄an pād wōt ilo waan bwilbwil eo an ajri ilo aō m̧ōkaj in aiin aolepān peij ko. Iaar jino illu ke iaar lo mirokan men ko iaar jab kōņaan loe. Ilo būruwō, iaar jino jekpen ņae, “Etke Anij eaar jab kakkōl eō n̄an bar etal ilo bar juon iaļ n̄an m̧weo?”

Innām̧ iaar ron̄ ainikien āinjuon an būreek in baj in jikuuļ eo. Juon kumi in ajri ro jon̄oulruo uwaan raar to jān baj eo. Raar aolep ilo̧k ilo meļan eo me eaar obrak kōn bok in pija nana jejjo wōt minit im̧aanļo̧k.

Ilo iien eo, aolep kōļmenļo̧kjeņ eo aō eaar oktak. Iaar kiiō jeļā etke kar jab kakkōl eō n̄an ilo̧k bar ilo juon iaļ. Iaar kam̧m̧oolol iaar pād ijo n̄an bōk peij kein bwe ajri rein ren maron̄ jab loi pija ko renana. Ke iaar ro̧o̧lļo̧k n̄an m̧weo, iaar ļōmņak, “Ta eo eļan̄n̄e baj in jikuuļ eo en kar rum̧ij an itok? Ta eo eļan̄n̄e iban kar lo etke iaar bōk en̄jake eo? Ewi aitok an aō naaj kar inepata ippān Anij?”

Jān raan eo, iien eo em̧m̧an Irooj eaar letok n̄an eō n̄an lo “etke” jān en̄jake jab eo eaar jipan̄ eō lōke bwe An māletlet im jibadbad ko reļlapļo̧k jān eo aō.

Jet iien inaaj jeļā etke juon men eaar waļo̧k, bar jet iien, ijjab. Bōtaab jekdo̧o̧n ta, ijeļā ej aikuj wōr aō tōmak bwe Irooj ewōr juon an jibadbad ekilepļo̧k me ijjab aolep iien maron̄ loe.