Rūm̧m̧an Ded ro
Eļan̄n̄e Mijen Eo Am̧ Ekar M̧ōkaj An Jem̧ļo̧k, Jab Ebbweer
Rijeje eo ej jokwe ilo Utah, USA.
Am̧ aorōk ejjab mājukinļo̧k jān an m̧ōkaj am̧ ro̧o̧l n̄an m̧weo jān mijen eo am̧.
Kōmeļeļe jān David Green
Eļan̄n̄e kwoj riiti menin, bōlen emōj de am̧ jeļā ewi tōr jān jon̄an an maron̄ pen m̧ōkaj in ro̧o̧l n̄an m̧weo jān juon mijen. Rūm̧m̧an Ded ro me rej jerbal remaron̄ en̄jake jorrāān ilo ānbwin, jekjek ko ilo ājmour in kōļmenļo̧kjeņ, idin̄ ko ilo jukjuk in pād, n̄ūrbōktak ko an erreo, idaptōk ko reļļap ippān ro jet, ak jab pokake kein ko an mijen, kōm̧m̧an bwe ren em̧m̧akūt jān mijen ko aer m̧okta jān iien eo kōtļo̧k er kar kōtmene.
Jekdo̧o̧n ta un eo, Anij ejjab kōņaan bwe en̄jake in epen en indeeo jelet eddōkļo̧k eo ilo jetōb an armej eo. Kōn menin ekōjkan an mijenede ro ekar m̧ōkaj aer ro̧o̧l wōnm̧aanļo̧k jān kain oktak in ekainepata? Im ekōjkan an ro jinen im jemen, ritōl ro an Kabun̄, im ro rejitōnbōro jipan̄?
Juon Mijenede ilo Bok in Mormon
Juon bwebwenato jān bok in Alma ej letok n̄an kōj juon waanjon̄ak ejipan̄. Rikanaan in Nipai eo Alma eaar tōl juon mijen n̄an armej in Zoram ro renana, ippānļo̧k juon oran armej ro kar lōke er. Juon iaan armej rein, ļeo nejin Koriantōn, “[kar]kaarmejjete jerbal eo, im kar ilo̧k ilo āneen Sirōn ilubwiljin tōrerein ko an riLeman ro, ilo̧kanļo̧k kōrā kijon̄ eo Isabel.” (Alma 39:3). Kōn menin, Alma eaar kajoor an ko̧o̧le Koriantōn im kar kūri n̄an ukweļo̧k, kōm̧eļeļeik, “Iban bōk iien kōn men kein ruōm̧ n̄an kainepataik buruōm̧, eļan̄n̄e eaar jab n̄an em̧m̧an eo am̧” (Alma 39:7).
Koriantōn eaar bōk ko̧o̧le eo an jemen ilo ettā, kar ukweļo̧k jān jerawiwi ko an, im bar ro̧o̧l n̄an jerbal āinwōt juon mijenede ibwilijn armej in Zoram ro n̄an “kabun̄bun̄ļo̧k naan eo kōn m̧ool im jatōr” (Alma 42:31). Bwebwenato eo ej etal wōt im ba bwe ālkin an Alma kar kōnono n̄an ļōm̧aro nejin, “ļōm̧aro nejin Alma [jim̧ro Siblon im Koriantōn] raar ilo̧k ilubwiljin armej ro, n̄an kwaļo̧k naan eo n̄an er” (Alma 43:1).
Ro̧o̧l kōn Kōjatdikdik
Ta ko jej katak jān bwebwenato in? M̧oktata, juon mijenede eo ej m̧ōkaj an em̧m̧akūt—jekdo̧o̧n kōn un ko maron̄ kabōjraki—ej maron̄ wōt kōtōprak men ko reļļap. Koriantōn emaron̄ in kar kōm̧m̧ane bōd ko reļļap, bōtaab eaar etal wōt n̄an kōtōprak juon jerbal eļap. Ejja āinwōt, jekdo̧o̧n mijenede ro me raar ro̧o̧l āinwōt juon tōprak jān jerbal ko aer make aikuj jab en̄jake āinwōt em̧ōj aer kakkure kōjatdikdik ilo jetōb eo aer. Koriantōn eaar ekkatak jān bōd ko an im itok n̄an kōkajoorļo̧k aelōn̄ in kiin̄ eo an Anij ilo wāween ko rekabwilōn̄lōn̄, im ejja maron̄ in wōt ej maron̄ n̄an jabdewōt jekdo̧o̧n ta ewi jon̄an aer en̄jake āinwōt raar likjab.
Ruo, jej ekkatak kōn jerbal eo ekanooj in aorōk ewōr ippān ro jet ilo bar kōjepļaaktok ilo jetōb an juon mijenede eo eaar m̧ōkaj an ro̧o̧l. Alma—jemān Koriantōn im juon ritōl an priesthood—kar kapilōk Koriantōn kōn kajoor bōtaab barāinwōt kōn lōke ilo maron̄ eo an n̄an kōtōprak wōt kōjatdikdik eo an ilo jetōb. Āinwōt Koriantōn, kaje ko kōn jab pokake ilo juon mijen aikuj waļo̧k, bōtaab jabdewōt kaje aikuj kōm̧m̧an kōn iakwe, jeorļo̧k bōd,im meanwōd (lale Katak im Bujen ko 121:41–44).
Ro̧o̧ltok n̄an Kemour
Ejja ennaan in wōt an kōjatdikdik n̄an mijenede ro ekar m̧ōkaj aer ro̧o̧l ej āliji rainin. Marhsall, eo eaar m̧ōkaj an ro̧o̧l kōn apan̄ in ājmour ko ilo ānbwin im kōļmenļo̧kjeņ, ilo jet iien kar en̄jake ajļo̧k kōn jim̧or kapan̄pan̄ ko ilo ājmour im likjab ko an make me kar bōbrae e jān erom juon mijenede ej lukkuun jerbal. Mekarta, ej en̄jake bwe jerbal in jipan̄ eo an eaar lukkuun in ļap tokjān.
“Ilo jerbal eo ad āinwōt mijenede ro, jejjab weppān” Marshall ej ba. “Jej lokjak wōt n̄an kapo, jej maron̄ in jerawiwi wōt. Bōtaab jab wanōk ko am̧ rej bōlen ta eo Setan ej kōņaan bwe kwon pedped ioon—n̄an en̄jake āinwōt jortak eo am̧ Irooj ejjab bōke kōnke kōn iien ko ke kwar jab juon mijenede em̧m̧an.”
Marshall ej tōmk bwe Irooj ekōņan bwe mijenede ro rej jeļā Ej m̧ōņōņō kōn jerbal in jipan̄ eo raar kōm̧m̧ane, jekdo̧o̧n n̄e jerbal in jipan̄ jab eo eaar jab weppān ilo kōm̧m̧ane kōnke kōn kāālet ak jekjek.
Marshall eaar ekaktak n̄an ņa mejļan im mour jān kōm̧m̧ane aolep men emaron̄e n̄an epake Jemedwōj Ilan̄ im Jisōs Kraist.
Ro̧o̧ltok n̄an Ukweļo̧k
Bar juon mijenede, eo eaar jerbal ilo Colorado, USA, kar kōro̧o̧le n̄an m̧weo jān mijen eo an kōn un ko an bōk jān koņaan im bukweļo̧k jān Kabun̄ in, bōtaab tok ālik eaar bar peptaij. “Ro̧o̧ltok n̄an m̧weo eaar pen,” ej ba. “Iaar en̄jake jōbwābwe im waan. Jet iien, m̧ōttan eo epen tata an ro̧o̧ltok n̄an m̧weo eaar [kappukōt] itoklimo eo n̄an etal wōt n̄an jar, riiti jeje ko rekwojarjar, im jar. Men ko reļem waan raar eppen tata.”
Bōtaab eaar lo kajoor eo ilo rejtake an ro m̧ōttan im baam̧le eo an im kōn jerbal n̄an ukweļo̧k.
“Kōm̧m̧ani kōttōpar ko, ioon bisop eo, im etal n̄an tampeļ ke iaar erreo raar aorōk ko ilo maron̄ itok n̄an epaak Jema Ilan̄,” ej kakobaba. “Ij keememej iien ko ke iaar jab maron̄ ioon bisop eo aō ak kōtōprak jet kōttōpar ko, rikapo eo eaar iien otemjej pād, kapok n̄a.”
Kemour eo an eaar pidodo jān “iien otemjej keememej bwe ewōr juon Jema Ilan̄ eo ej iakwe eō im ekōņaan bwe in m̧ōņōņō. Bōk juon naan in kam̧ool kōn Pinmuur eo an Rilo̧mo̧o̧r eo im kōn ukweļo̧k, jemaron̄ iien otemjej itok epaak Anij jekdo̧o̧n ta ewi jon̄an ettoļo̧k eo jemaron̄ in en̄jake.
“Reilikļo̧k n̄an mijen eo aō,” ej wōnm̧aanļo̧k wōt, kōnono kōn allōn̄ ko eaar jerbal m̧okta jān iien ko me kar tōlļo̧k bwe ren kōro̧o̧l n̄an m̧weo, “Ij en̄jake wōt eaar juon iaan en̄jak ko aō rem̧m̧an tata iaar bōke. Eļap aō kar ekkatak im men̄e eaar jab tōprak ilo wāween eo iaar karōke, iaar maron̄ in wōt lo mour ko rej oktak kōnke kōn gospel eo. Iaar kōm̧m̧ane jet bōd ko, bōtaab naan in kam̧ool eo aō eaar kanooj ļapļo̧k an eddōkļo̧k n̄e iaar kajjion̄ ijo em̧m̧an tata ippa n̄an ukweļo̧k im eddōkļo̧k ilo jetōb.”
Ej kōņan bwe ro jet me eaar m̧ōkaj aer ro̧o̧l kōnke kōn kāālet ko aer n̄an jeļā bwe “laļ in ejjan̄in jem̧ļo̧k. Ro̧o̧l n̄an m̧weo ej juon bun̄tōn im̧aan tata n̄an ukweļo̧k. N̄e kwoj kōm̧m̧an menin jekjek in an ukweļo̧k, kwonaaj bōk eļap. Eddo jab in enaaj ļōn̄jak. Ejjeļo̧k juon en̄jake em̧m̧anļo̧k jān jeļā kwoj pokake kien ko an Anij.”
Iakwe Ro Me Em̧ōkaj Aer Ro̧o̧l
Jimo̧r meijenede rein me ekar m̧ōkaj aer ro̧o̧l n̄an m̧weo raar kōmejajaik ewi jon̄an an aorōk kōn ro m̧ōttaer im baam̧le eo an mijeneed ro ekar m̧ōkaj aer ro̧o̧l n̄an iakwe im rejtake er.
“Leļo̧k n̄an er anemkwoj,” Marshall ej ba. “Bōtaab kanooj lale kwoj epaake, kōnke emaron̄ in jidik kabūrom̧ōjm̧ōj. Erom rp m̧ōttaer.” Jān ron̄jake Jetōb eo, jemaron̄ jeļā aikuj ko aer im jeļā n̄aat eo n̄an pukōtļo̧k im n̄e eo n̄an kautiej aer makeļo̧k.
“Baj iakwe wōt er,” mijenede eo eaara jerbal ilo Colorado ej kakobaba. “Kōketak er n̄an iien otemjej keememej pinmuur in en̄taan eo an Jiōs Kraist.”
Ekōjkan an ro jet kōm̧m̧an n̄an mijenede ro ekar m̧ōkaj aer ro̧o̧l maron̄ jipan̄ kōm̧m̧an oktak ikōtaan ro rej en̄jake ekajet im jook im ilo̧k jān Kabun̄ in ak eddōkļo̧k kōn tōmak. Ej aorōk, innām, bwe ren kaorōk er kōn jab ekajet.
Āinwōt Koriantōn, mijenede ro ekar m̧ōkaj aer ro̧o̧l ewōr aer kōjatdikdik n̄an jerkak jān jekjek eo aer em̧ōjņo̧ kiiō n̄an kein jerbal eo an Irooj ekajoor.
Pukōt Kōjatdikdik ilo Karōk an Anij
Elder Jeffrey R. Holland jān Doulul eo an Jon̄oulruo Rijilōk ro ej letok jet naan in kaenōm̧m̧an ko n̄an mijenede ro ekar m̧ōkaj aer ro̧o̧l. “N̄e juon ej kajjitōk eļan̄n̄e kwar jerbal juon mijen, kwoj ba aaet,” eaar ba. “… Kaorōk jerbal in jipan̄ eo kwar kōm̧m̧ane. Kam̧m̧oolol kōn iien eo em̧m̧an n̄an kar kam̧ool, n̄an kar jerbal ilo etan Irooj, n̄an kōņak kar pāāj in mijenede eo. … Jouj, jouj jab ļōmņak iien otemjej kōn an kar m̧ōkaj in ro̧o̧l; jab pedped ioon unin kōnono in; jab ļōmņak kojabwe ak likjab.”1
N̄an ro ekar m̧ōkaj aer ro̧o̧l āinwōt juon tōprak in jerawiwi, keememej naan kein an Sister Joy D. Jones, Būreejtōn eo Eutiej an Būraimere “Eļan̄n̄e jej jero̧wiwi, edik ad erreeo, ak jeban jaorōk!”2 Liin ej kwaļo̧k bwe Anij enaaj jipan̄ kōj ejak lōke ilo kōj make ilo iien ko ad remarok tata eļan̄n̄e jenaaj oktakļo̧k n̄an E.
Ennaan eo jān Bok in Mormon, jān mijenede ro ekar m̧ōkaj aer ro̧o̧l raan kein, jān ritōl ro an Kabun̄ in ej juon wōt: Jāmin ebbwer jān kōjatdikdik, kōnke Anij ej wōr wōt an karōk ko n̄an eok eļapļo̧k jān am̧ maron̄ ļōmņak. N̄ān ro jitōnbōro an mijenede ro, uwaak eo am̧ n̄an ro̧o̧l n̄an m̧weo eo aer enaaj kōm̧m̧ane juon oktak eļap ilo jipan̄ er mour im tōpar kōjatdikdik eo aer. Keememej bwe Pinmuur eo an Jisōs Kraist emaron̄ kemour aolep kijen ko—ekoba ko an ro em̧ōkaj aer ro̧o̧l jān juon mijen.