Ekkatak, Riit, Etale, Jar. Āliji.
Rijeje eo ej jokwe ilo Cautín Province, Chile.
An ejjeļo̧k scholarship, ijjab maron̄ kōļļā wōņaan kaļōj.
Kōmeļeļe ko jān Adam Howling
Ilo Chile, n̄an maron̄ etal n̄an kaļōj, kwoj aikuj bōk juon university placement test. Iaar kōņaan ekkatak engineering ilo juon university me eaar ettoļo̧k jān ijo iaar jokwe ie. Enaaj kar lukkuun ļap wōņāān, kōn menin kōttōpar eo aō eaar n̄an bōk jikoor eo eutiej tata ilo placement test eo bwe in maron̄ bōk juon scholarship kōn jikoor eo teej eo em̧m̧an tata.
Iaar jeļā ijo im ta eo iaar kōņaan ekkatak, im iaar jeļā ta eo inaaj kar aikuj kōm̧m̧ane n̄an kōm̧m̧an bwe en tōprak. Iaar jino m̧aanjabpopo n̄an teej eo. Iaar ekkatak, riit, im etale bok ko, bōtaab ilo teej in kōmālmel ko, iļakkar jab bōk jikoor eo iaar aikuji. Iaar oktakļo̧k n̄an Jema Ilan̄ ilo jar im kajjitōk Ippān kōn eļapļo̧k jeļāļo̧kjeņ im n̄an katakin meļeļe eo aō bwe in maron̄ tōpar kōttōpar eo aō. Iaar jar kōn menin raan otemjej ium̧win juon iiō dipio. Iaar etal n̄an kūlaaj in kōppopo ko ilo jikuuļ eo aō, im iaar deļo̧n̄e kūlaaj ko ilo juon institution me kar ejake n̄an exam eo.
Iaar kōm̧m̧ane wōt ekkatak jeje ko rekwojarjar raan otemjej, im iaar jab likjab jān juon raan in jemenere. Iaar kakūrm̧ool aolep jerbal ko aō ilo Priesthood eo an Aron eo aō im jab ekkatak ilo Jabōt ko, jekdo̧o̧n ta ewi jon̄an aorōk in jekjek eo kar. Iaar jeļā Jabōt ej raan eo an Irooj, im iaar kōņaan kautieje ilo wāween eo ro jinō im jema raar katakin eō. Iaar jeļā ijjab maron̄ kar luuji kōjeraam̧m̧an ko an Jemedwōj Ilan̄ n̄an n̄a, eļap tata n̄e ij lukkuun in kar aikuji er. Kōjekdo̧o̧n aolep men kein, iaar jab bōk jikoor eo iaar aikuj ilo teej in kōmālmel ko aō.
Baam̧le eo aō im n̄a kar jar im jitlo̧k, im jema eaar letok juon kōjeraam̧m̧an n̄an n̄a. Kōn m̧aanjabpopo in ilo jetōb im m̧aanjabpopo eo juon aō, iaar bōk teej eo. Iaar jab wōt bōk jikoor eo iaar aikuji, ak iaar ļeļo̧k jān kōttōpar eo aō, jikoore juon iaan bōkjāān ko reutiej tata maron̄ bōke lo jākjen eo an bōnbōn (math). Iaar bōk scholarship ko im kōjeraam̧m̧an ko iaar aikuji, im iaar maron̄ ekkatak ilo juon university iaar kāālete.
Jān iien eo iaar dik, iaar ekkatak bwe eļan̄n̄e iaar kōm̧m̧ane aolep men ko imaron̄ kar im kar lolorjake eddo ko aō ilo jetōb m̧okta, innām Jemedwō Ilan̄ enaaj kar kōjeraam̧m̧an n̄a. Men ko remaron̄ jab iien otemjej tōprak ilo wāween eo jej kōtmene bwe ren, bōtaab Anij enaaj lolorjake eok. Ijeļā ej kōn wōt jipan̄ eo An me aolep rej pidodo.