Famli blong Alonso I blong Oltaem
“Tempol hem i wan tabu ples we yumi save sil tugeta long hem” (Children’s Songbook, 95).
“?Mi save stap wetem Mama mo Papa bakegen?”
“Ista i wan gud taem blong tingbaot Jisas mo blong tingbaot taem Hem I Girap long Ded Bakegen,” Sista Rojas i talem. Hem i holem wan pikja blong Jisas i go antap. “From Jisas Kraes, ol pipol we oli bin ded oli save laef bakegen.”
Alonso i lukluk i go antap long Praemeri tija blong hem talem hemia. ?I minim se mi save luk papa mo mama blong mi bakegen? Alonso i askem long hemwan.
Mama i bin ded fulap yia i pas. Alonso i no tingbaot hem gud tumas, be hem i laekem blong lukluk ol pikja blong hem. Afta, Papa i bin ded tu.
Naoia Alonso i laef wetem Abuela, apu woman blong hem. Hem i bin stap tijim Alonso abaot jos blong hem, Jos Ia blong Jisas Kraes Ia blong Ol Lata-dei Sent. Bae hem i kasem baptaes mo kasem konfemesen nekis yia, taem yia blong hem i naf blong kasem baptaes.
Afta, Sista Rojas i holem wan pikja blong wan waet bilding i go antap. “Ol tempol i ol nara naes presen we i kam long Jisas. Hemia i wan long ol tempol long ples long Jael.”
Alonso i lukluk statiu we oli wokem long go antap long long bilding ia. !I naes tumas! Hem i askem long hemwan se wanem i stap hapen insaed ia.
“Ol tempol i ples we ol famli oli sil tugeta blong taem we i no save finis,” Sista Rojas i talem. “Tempol ia long Santiago i ples we mi mi bin sil wetem papa mo mama blong mi, afta we mifala i bin joenem Jos. From se mifala i bin sil, mi save stap wetem olgeta iven afta long laef ia.”
Alonso i glad tumas taem i harem hemia. “?Mi save sil wetem papa mo mama blong mi?” hem i askem. “?Iven sapos oli ded finis?”
Sista Rojas i sakem hed blong hem blong agri. “!Yes! Hemia i wan long ol risen from wanem ol tempol i impoten tumas. Oli blesem evri memba blong famli blong yumi, mo olgeta we oli ded tu.”
Ful dei, Alonso i stap tingbaot ol tempol. Hem i askem Abuela blong tijim hem sam moa. Hem i tokbaot ol waet klos we ol pipol i werem insaed mo naes wok blong art long ol wol.
“Be bes samting long evri wan i we, ples ia nao yu save sil wetem papa mo mama blong yu,” Abuela i talem. “Bae yumi askem tu man long wod blong stanap long ples blong olgeta long taem blong siling.”
“?Yumi save go tumoro?” Alonso i askem. “!Mi wantem stap wetem Mama mo Papa foreva!”
Abuela i smael. “Mi glad se yu wantem go,” hem i talem. “Be tempol we i kolosap moa i stap long Concepción. Yumitu no gat inaf mane blong pem tikit blong bas.”
“!Bae mi help blong sevem mane blong trip ia!” Alonso i talem.
Stat long taem ia i go, taem Alonso i faenem wan koen long rod o gat janis blong mekem sam mane, hem i pem taeting mo afta putum ol nara mane long mane blong go long tempol.
Afta sam manis blong sevem mane, Alonso mo Abuela i gat inaf mane blong travel i go long tempol. Oli talem tangkyu long Brata mo Sista Silva blong kam wetem olgeta. Long dei blong trip ia, oli tekem wan bas long wan longfala rod i go long siti blong Concepción. Kolosap san i stap draon taem Alonso i luk wan samting olsem gol.
“!Mi save luk enjel Moronae!” Alonso i talem mo stap poen i go long statiu we i stap antap long blu ruf blong tempol.
Oli spendem wan naet long wan haos narasaed long tempol. Long moning, Alonso i go insaed long tempol blong fas taem. Hem i luk wan bigfala pikja blong Jisas insaed. Hem mo Abuela i jenis long waet klos. Hem i filim hapi mo pis.
Taem we i taem blong sil, Alonso i wokbaot i go insaed long wan naes rum wetem ol mira long ol wol. Wan man blong wok long tempol i soem Alonso, Abuela, mo ol Silvas olsem wanem blong nil daon raon long spesel tebol we oli singaotem wan alta. Oli kavremap long sopsop kaliko.
Brata mo Sista Silva oli stap long ples blong mama mo papa blong Alonso. Abuela i stap long ples blong sista blong Alonso we i bin ded bifo Alonso i bon.
Alonso i pikjarem famli blong hem tugeta, taem Hem i sarem ol ae blong hem.
Mi no save wet blong luk olgeta bakegen, Alonso i tingting. !Mi talem tangkyu tumas se ol famli i save stap tugeta blong taem we i no save finis! ●
Ol pikja i kam long Mark Jarman