Ol Yang Adalt
Save Mekem Laet blong Gospel I Go Olbaot
Foto i kam long Weston C. Colton
Fasin blong stap wan adalt i wan taem blong gro, ol janis, mo wan janis blong stat blong bildim laef blong yu. I save mekem yu wari lelebet, glad, mo fraet, evriwan long semmak taem (i bin olsem ia wantaem blong mifala).
Be maet mifala i no save ol ansa long evri kwestin we i presa long laef, i gat wan samting we mifala i save stret—hem i oltaem ol yang oli bin wan impoten fos long Restoresen ia we i stap gohed blong Jos ia blong Jisas Kraes.
Long seksen blong manis blong mekem plan, mifala i toktok wetem fulap yang adalt abaot tekpat blong olgeta long karem Isrel i kambak tugeta. Mifala i bin gat tingting we i stap daon long lav blong olgeta we i tru mo dedikesen blong olgeta long gospel blong Jisas Kraes. Nomata long ol situesen blong olgeta, ol yangfala Sent ia oli andastanem impoten rol we oli gat long las dispensesen ia. Long “Olsem Wanem Ol Yang Adalt Oli Mekem I Defren long Restoresen ia we i stap gohed” long pej 44, yu save ridim olsem wanem ol yang adalt blong India, Hangari, Barbados, Ostrelia mo Yunaeted Stet oli stap rere long wol from Seken Kaming blong Sevya.
Long ol atikol we i kamaot onlaen nomo, Cesar i givim lukluk blong hem long olsem wanem yumi save faenem stamba tingting blong yumi mo kam ol lida we oli moa gud. Lauri i tokbaot ol blesing we yumi kasem taem yumi folem ol kaonsel blong profet. Ol nara yang adalt oli serem eksperiens blong olgeta wetem tempol seves, wok blong givhan, famli histri, mo misinari wok. Mo yumi serem wan eksampol blong wan yang adalt long Niu Kaledoni we i soem olsem wanem ol yang memba oli stap mekem wok blong Lod long ol eria blong Jos we i moa smol.
Nomata wea ples yu stap long hem mo wanem situesen blong yu, yu save mekem moa we i defren long kam tugeta blong Isrel bitim we yu stap tingting long hem. Olsem ol yang adalt, yumi ol fiuja lida blong Jos ia. Mo laet blong ol traehad blong yumi tedei bae i laet bigwan mo laet blong gospel bae i go olbaot truaot long wol ia tumoro.
Wetem tru hat,
Chakell Wardleigh mo Mindy Selu
Jos Magasin blong yang adalt seksen blong ol edita