!Jos blong Jisas Kraes i kambak finis!

Bifo yumi bin kam long wol ia, yumi laef wetem Papa mo Mama blong yumi long Heven. !Oli lavem yumi! Papa long Heven i gat wan plan blong yumi we i gud tumas. Bae yumi kam long wol blong save gat wan bodi mo lan mo gro. Afta bae yumi kambak blong laef long hom blong yumi long heven. Be yumi no save mekem yumiwan. Bae yumi nidim help.

Papa long Heven i jusum brata blong yumi we i bigwan long yumi, Jisas Kraes, blong kam long wol blong helpem yumi. Jisas i bin soem long yumi olsem wanem blong lavem ol narawan mo folem ol komanmen blong Papa long Heven. Hem i bin jusum ol Aposol blong lidim Jos blong Hem.

Afta, Jisas i bin safa from yumi long Garen blong Getsemane. Hem i bin filim evri harem nogud blong yumi. Hem i bin ded from yumi long kros. From hemia, yumi save go long Hem taem yumi harem nogud o nidim help. Yumi save sakem sin taem yumi mekem wan samting we i no stret.

Long nambatri dei afta we Jisas i ded, Hem i laef bakegen long ded. !Jisas i laef bakegen! From hemia, bae yumi tu, yumi laef bakegen long ded. Yumi save laef long Heven bakegen afta we yumi ded.

Afta we Hem i laef bakegen long ded, Jisas i bin visitim ol disaepol blong Hem long Jerusalem mo long Amerika. Hem i bin askem ol Aposol blong Hem blong gohed blong tijim ol pipol abaot gospel blong Hem. Plante pipol i bin harem ol Aposol oli baptaes mo joenem Jos.

Afta we ol Aposol oli ded, ol pipol i stat blong fogetem sam impoten pat blong gospel blong Jisas. Oli stop blong bilivim se oltaem bae Papa long Heven i givim insperesen long ol pikinini blong Hem long wol. Oli foget se evriwan long wol bae i gat wan janis blong kasem baptaes. Oli stop blong biliv se ol profet mo ol aposol bae oltaem oli lidim Jos.

Plante yia i pas. Mo afta, i taem blong karembak ol pat blong gospel blong Jisas we i nogat. !Hem i taem blong putumbak Jos blong Hem bakegen! Papa long Heven i bin nidim wan man blong stap olsem profet mo help blong karembak gospel long wol. Hem i bin jusum wan yang boe we nem blong hem Josef Smit.

Wan dei, Josef i stap ridim Baebol. Long Jemes 1:5, i talem se Papa long Heven bae i ansarem ol kwestin blong yumi taem yumi askem wetem fet. !Josef i bin gat wan kwestin? Hem i save se i gat fulap jos we oli stap tij abaot Jisas. Be hem i wantem faenemaot sapos i gat wan i olsem Jos blong Jisas long Niu Testeman.

Long wan naes dei long Spring, samples long taem blong Ista, Josef i bin go long ol bus kolosap long hom blong hem. Hem i bin nildaon mo stat blong prea. Afta, Josef i bin filim wan filing blong tudak. Setan i stap traem blong mekem tingting blong hem i slak. Be Josef i gohed blong prea wetem evri paoa blong hem.

Afta, wan naesfala laet i kam daon. Josef i bin luk Papa long Heven mo Jisas Kraes. Hemia oli singaotem, Fas Visen. Oli talem se Jos blong Jisas i no stap long wol. Be bae i kam i no longtaem. !Restoresen i stap stat!

Papa long Heven i sendem ol enjel blong putumbak ol impoten pat blong gospel. Enjel Moronae i bin givim ol buk we oli wokem long gol long Josef, mekem se yumi save gat Buk blong Momon blong helpem yumi blong lan abaot Jisas Kraes.

Jon Baptaes i karembak Aronik Prishud mekem se yumi save kasem baptaes. Pita, Jemes, mo Jon oli bin karembak Melkesedek Prishud mekem se yumi save kasem Tabu Spirit mo gat ol blesing taem yumi sik.

Elaeja i bin kam mekem se yumi save sil i go long ol famli blong yumi long tempol.

Oli bin oganaesem Jos Ia blong Jisas Kraes blong Ol Lata-dei Sent. !Hemia i minim se Jos blong Jisas i kambak long wol! Evri samting ia i pat blong Restoresen.

Restoresen blong gospel ia i stap gohed yet tedei. Ol profet, ol aposol, ol misinari mo ol memba oli stap serem gud nius ia blong Jisas Kraes raon long ful wol. Oli stap bildim ol tempol long fulap graon mekem se ol pipol i save sil i go long ol famli blong olgeta blong taem we i no save finis. Mo Jos i stap helpem ol pipol blong hem long ol ples we i gat hanggri mo disasta.

Evri man i save mekem wan samting blong help wetem Restoresen. Yu save help taem yu stap lan abaot famli histri blong yu mo stap mekem ol baptaes long tempol. Yu save givim taeting blong bildim ol jos mo tempol. Yu save givim fas ofring blong helpem ol pipol we oli stap long nid. Yu save talem long ol pipol abaot Jisas Kraes.

Jisas i bin givim Jos blong Hem blong helpem yumi blong gobak long hom blong yumi long heven. Yu save tekem sakramen mo oltaem tingbaot tingbaot wanem Hem i bin mekem blong yumi. Yumi save soem lav long ol narawan, olsem we Hem bin mekem. !Yumi save helpem evri man blong lan abaot gospel blong Hem! ●

Ol pikja oli kam long Apryl Stott