Dijitol Nomo: Blong Ol Yang Adalt
Stap Bildim Kingdom long Niu Kaledoni
Ol yang adalt long Niu Kaledoni mo raon long wol oli stap akseptem singaot ia blong givim seves mo kam ol lida long Jos.
“Janis ia blong givim seves i wan long ol bigfala blesing blong wan membasip insaed long Jos”1 Olsem wan yang adalt, blong givim seves insaed long Jos bae i save wan gudfala janis blong gro, blong stap lid, mo mekem ol masel blong yu long saed blong spirit i kam moa strong. Be wetem ol nara responsabiliti we ol yang adalt oli karem, blong givim seves samtaem hem i save kam wan jalenj—speseli long ol eria we Jos i smol long hem. Eksampol,?wanem bae yu mekem taem oli singaotem yu kam olsem Stek Yang Woman presiden, yu stap traehad tu blong rere blong go long wan misin long semtaem we yu stap go long kolej mo helpem blong kodinetem institiut, mo, yes, yu 21 yia nomo?
Blong plante eria long Jos, hemia i no wan samting we i no stap hapen oltaem. Long Niu Kaledoni, wan smol ovasi teritri blong Franis wetem samples long 2400 memba blong Jos, ol yang adalt memba, ol givim long olgeta sam bigfala responsabiliti blong bildim kingdom blong Lod. Presiden Russell M. Nelson i talem wan taem long ol yang adalt,: “!Yufala ol fiuja lida blong Jos ia! ?Yufala i rere blong holem ol rop ia blong lidasip?”2 From se hem i wan mas mo from lav blong Sevya we oli gat, ol yang adalt raon long wol oli rere blong givim seves mo lidim Jos.
Long Seves blong Hem blong Laeftaem.
Blong fulap long ol yang adalt blong Niu Kaledoni, misin blong olgeta i help blong rere long olgeta blong givim wan laeftaem seves insaed long Jos. Syoelanne (Syo) Ulivaka i kasem wan koling blong givim seves olsem seken kaonsela long bisoprik wan wik nomo afta we hem i kambak long haos afta long misin. “Mi jes finisim misin blong mi nomo,” Syo i talem. “Mi taet, mo talem long miwan, naoia bae mi spel smol.” Be yet hem i akseptem koling ia. “Mi luksave se bae mi go wea nao we Lod i wantem mi blong go long hem, Mi stap long seves blong Hem—i no blong tu yia nomo, be blong laeftaem.”
Taem hem i stap givim seves long bisoprik, Syo i mared, gat wan pikinini, mo i muv i go long wan defren wod. Be hem i gohed blong givim seves mo mekem ol Jos koling blong hem.
Elda Earl C. Tingey, emeritus Jeneral Atoriti Seventi, i talem long ol yang adalt: “Wan Jos koling i wan long ol naesfala blesing we yu save gat wan gud taem wetem long taem ia insaed long laef blong yu. Yu gat fulap blong givim long wod o branj we yu stap long hem. Ol talen mo skil blong yu oli nidim blong mekem Jos i gro.”3 Syo i no wan yang adalt ia nomo long aelan ia we oli yusum ol skil blong hem blong help blong mekem Jos i gro—ol narafala yang adalt tu oli givim seves long ful paoa blong olgeta long wod o stek level. Syo i talem, “Mifala i traem blong karem wanem mifala i lanem long misin blong mifala blong mekem stek o wod blong mifala i kam strong moa.” Ol yang adalt ia oli mekem fulap sakrifaes blong oli save mekem kingdom long hom kantri blong olgeta i kam strong moa, be olsem we Syo i talem, “wanem mifala i sakrifaesem plante, hem i taem blong mifala.”
Sam yang adalt i gat tu o iven tri koling. “Hemia bae i wan blesing blong olgeta, be bae i wan hadtaem blong olgeta tu,” Syo i talem, olsem fulap i traem blong balensem ol samting we wan yang adalt i mas mekem long laef wetem ol responsabiliti long Jos. “Hem i had blong mekem evri samting long semtaem.” Be Syo i faenemaot se taem hem i putum Lod faswan, i isi blong flatem ol narafala samting. Hem i talem, “Lod i help wetem evri narafala samting—skul, faenem wan waef— evri samting ia i stap long han blong Lod.”
Fiuja blong Jos ia.
Ol profet mo ol aposol oli gat strong tingting abaot paoa mo seves we ol yang adalt oli save givim long Jos: “Mifala i nidim ful hat mo sol blong yu. Mifala i nidim ol yang adalt we oli gat ol gudfala tingting mo oli wantem blong ansa long smol voes blong Tabu Spirit.”4
Ol yang adalt long Niu Kaledoni mo raon long wol oli stap girap long singaot ia blong wan aposol. Oli luksave se oli ol fiuja blong Jos ia, mo oli jusum blong givim seves long eni wei we oli save mekem. Oli leftemap wanwan long olgeta long ol koling blong olgeta. Oli wok wetem ol misinari. Oli serem gospel mo invaetem ol fren blong olgeta long Jos. Oli givim ol advaes long ol yut long wod blong olgeta mo givim strong tingting long olgeta blong go long wan misin. Oli travel ol longfala rod blong go long tempol. Oli tijim olgeta we oli no memba long famli blong olgeta. Mo evri hadwok ia i stap bildim kingdom.
Syo i luksave se, taem i kam blong givim seves i go long Lod, “Yumi ol tul blong Hem.” Long ol taem ia we Jos i stap gro, Lod bae i singaotem ol Sent, ol yangfala mo ol olfala, blong akseptem ol responsabiliti blong bildim mo mekem kingdom blong Hem i kam strong moa. ?Yumi rere blong ansa long singaot ia?