Wan Smol Pijin I Rimaenem Mi

Laura Linton

Yuta, YSA

Pikja i kam long Carolyn Vibbert

Taem mi gat 26 yia, mi mo hasban i lusum fasbon pikinini blong mitufala. Oli faenem se Kennedy i gat kansa long bren taem hem i gat 13 manis nomo. Afta long tri operesen, faef raon blong kimoterapi, mo planet meresin mo tritmen, hem i ded long han blong mitufala, taem hem i gat 20 manis.

Mi harem nogud tumas we mi lusum naesfala, mo strong smol gel blong mi. ?Olsem wanem samting ia i save hapen? ?Olsem wanem bae mi save muv i go fored? Mi gat plante kwestin, be mi no gat eni ansa. Sam dei afta long fenerol, hasban blong mi mo mi i visitim gref blong hem, we ol naes pink flaoa mo riben i kavremap.

Taem mi tingting long smol gel blong mi, mi bin luk wan smol bebi pijin i stap, we i smol tumas blong flae, mo i stap jiamjiam antap long gras. Pijin ia i mekem mi tingting i go long Kennedy from se hem i laekem ol animol. Pijin ia i jiamjiam ova long gref, mo i pleiplei insaed long ol riben mo flaoa. Mi smael, from se mi save stret wanem nao bae Kennedy i wantem. Nao, pijin ia i jiamjiam i kam long mi. Mi no ting nating blong muv smol. Smol pijin i jiamjiam i kam stret long saed blong mi, i lei long leg blong mi, i sarem ae blong hem, mo i slip.

Mi no save eksplenem ol filing we mi bin gat long tetaem ia. Mi filim olsem se mi kasem wan hag we i kam long Kennedy blong mitufala. Mi no save holem gel blong mi, be smol pijin ia—wan kriesen blong Papa blong yumi long Heven—i save kam mo i putum smol hed blong hem long mi, i rimaenem mi se Papa long Heven i bin andastanem soa insaed long mi, mo bae oltaem, hem i stap ia blong givim kamfot long mi mo helpem mi tru long tes ia.

Elda David A. Bednar blong Kworom blong Olgeta Twelef Aposol i talem: “Taem ol toktok oli no givim sapot ia we yumi nidim, taem stret tingting mo gud tingting oli no save givim stret andastaning ia abaot ol samting we oli no gat jastis mo oli no stret long laef, mo taem we i luk se yumi stap yumiwan nomo we i no gat man long saed blong yumi, be i tru nomo, yumi gat blesing tru long ol sore we oli kaen we i kam long Lod” (“The Tender Mercies of the Lord,” Liahona, May 2005, 100).

Mi stil no bin gat evri ansa long ol kwestin blong mi, be sore ia we i kaen i bin putum pis long tingting blong mi se, Kennedy mo mi, Papa blong mitufala long Heven i lavem mitufala, mo we, tru long sakrifaes blong Pikinini blong Hem, Jisas Kraes, mi gat hop ia se Kennedy, hasban blong mi mo mi, bae wan dei, bae mifala i stap tugeta bakegen olsem wan famli.