RestoresenIa we I Stap Gogohed
Restoresen, o Kambak blong Gospel i bin stat long Tabu Bus 200 yia i pas finis, mo i stap gohed tedei—mo yu mo mi i save pat long hem.
The Desires of My Heart (First Vision), i kam long Walter Rane
Hem i wan gudfala taem mo wan taem blong mekem man i glad tumas long wol ia. Yumi gat blesing blong tekpat long ol bigfala samting we oli stap hapen long dispensesen blong taem we wok blong Lod i hapen fulwan, we i kam blong stap rere long Seken Kaming blong Lod.1 Yumi no stap ia mo stap luk nomo ol bigfala taem ia oli stap hapen, be tu, yumi pat long ol taem ia.2
Samtaem, yumi stap tokbaot Restoresen ia olsem se evri samting i bin hapen wan taem ia nomo. Tu handred yia i pas, Fas Visen i bin statem rod ia, be yes, Restoresen i no bin finis long taem ia. Wok blong Lod i kam kasem Josef Smit mo ol narawan we oli bin wok wetem hem, i gohed wetem wok blong transletem Buk blong Momon, putumbak prishud, oganaesem Jos, sendem ol misinari i go, bildim ol tempol, oganaesem Rilif Sosaeti, mo plante moa afta. Ol taem ia insaed long Restoresen oli bin stat long 1820 mo oli bin gohed truaot long laef blong Josef Smit.
Nomata we ol samting we God i bin soemaot tru long Josef Smit oli bin gud mo naes tumas, Restoresen i no bin finis long taem blong laef blong Josef. Tru long ol profet we oli bin kam afta long hem, yumi bin kasem ol samting olsem ol divelopmen long saed blong tempol wok; sam moa skripja; translesen blong ol skripja long plante lanwis; wok blong tekem gospel i go raon long wol; oganaesesen blong Sandei Skul, OI Yang Woman, Praemeri, mo ol kworom blong prishud; mo plante samting we oli stretem long oganaesesen blong Jos mo fasin blong wok.
Presiden Russell M. Nelson i talem: “Yumi nao yumi ol witnes blong wok ia we i gogohed blong restoresen. “Sapos yu ting se Jos ia, oli bin putumbak evriwan, be yu yu jes stat blong luk stat blong hem ia nao. I gat fulap samting blong kam yet. … Wet kasem nekis yia. Mo afta, long nekis yia blong hem bakegen. Kakae gud ol vitamin tablet blong yufala. Spel inaf tu. Bae ol samting oli gud tumas.”3
Semmak wetem toktok blong Presiden Nelson se Restoresen i stap gohed, yumi bin luk fulap impoten jenis long Jos stat long taem we hem i bin kam Presiden. Long medel blong hemia, i gat ol kworom blong prishud we oli jenisim oda blong hem, wok blong givhan i stap tekem ples blong hom mo visiting tijing, mo institusen blong wan hom senta, Jos sapot wosip wei blong stadi long gospel.4 I gat moa jenis i bin hapen stat long taem ia, mo bae i gat sam moa we bae i kam yet.
Wan Eksampol long Afrika Wes
Ol faef yia we mi spendem blong givim mekem wok blong misin long Afrika Wes Eria Presidensi, i gat gudfala paoa long testemoni blong mi long Restoresen ia we i stap gohed. Stat long taem we mi bin wan yangfala man, mi bin gat wan testemoni blong gospel. Be taem mi stap laef long Afrika, mi bin wok wetem sam long ol fas Afrika Wes man blong akseptem gospel. Mi bin luk Jos i go olbaot long bigfala graon ia kwiktaem, wetem handred wod mo stek we oli bin mekem, ol tempol mo mitinghaos oli fulap ova wetem ol fetful memba, mo ol gud woman mo man we oli stap akseptem gospel ia we i kambak bakegen wetem ful hat blong olgeta. Long fored blong ae blong mi, mi bin luk profesi blong Josef Smit i kam tru, se Jos “bae i fulumap wol ia.”5
Tu fetful memba, James Ewudzie mo Frederick Antwi, i bin helpem mi wan dei long Akra Gana Temple. Sam yia bifo Ol Lata-dei Sent misinari i bin kam long Gana, James i bin pat long grup wan grup blong samples 1,000 man, we oli bin yusum Buk blong Momon mo ol nara buk blong Jos long ol jos wosip blong olgeta. Oli bin prea from dei ia we bae Jos i kam long Gana. Hem i bin joen wetem ol nara yang man we oli stap travel raon long Gana mo stap tijim gospel folem ol buk we oli gat. Taem ol misinari oli bin kasem ples long 1978, hem i bin kasem baptaes long fas dei we oli bin mekem ol baptaes blong Ol Lata-dei Sent long Gana.
Fred Antwi, wan paeonia memba blong Jos long Gana
Long taem blong Fred olsem wan memba bifo, hem i bin go long ded blong wan famli we i bin wan jif blong wan traeb. Long we, hem i bin faenemaot se plan blong famli ia i blong mekem hem i kam niu jif. Blong save se wan posisen olsem bae i mekem hem i mekem ol samting we i go agensem ol gospel bilif blong hem, hem i ronwe afta long ded mo tanem baksaed blong hem long wan posisen we bae oli luksave hem long hem mo gat plante samting mo mane.
Taem oli bin dediketem Akra Tempol, tugeta, James mo Fred i bin travel ova long fo aoa, long wan wei, evri wik blong mekem se oli save kam ol man blong wok long tempol. Taem mi bin stap mekem ol odinens wetem olgeta, mi filim paoa blong histri i raonem mi. Blong luksave Jos histri long Afrika we tufala i ripresentem, mi filim olsem Jon Teila o Wilfod Wudrof o ol memba blong Jos bifo stret, oli stap wetem mi mo stap mekem ol odinens ia.
Wanem mi bin luk, eksperiensem, mo filim long Afrika Wes, i pat blong wanem Lod i bin talem long Inok se bae i hapen: “Mo stret mo gud fasin, bae mi sendem i kamdaon aot long heven; mo bae mi sendem trutok i go long wol, blong testifae abaot Wan Stret Pikinini Ia Nomo blong mi; … mo bae mi mekem stret mo gud fasin mo trutok bae i swipim wol olsem wan bigfala wota, blong karem i kam wanples, olgeta we mi jusum aot long ol fo pat blong wol ia” (Moses 7:62).
Mi bin luk stret mo gud fasin mo trutok i kavremap bigfala graon blong Afrika mo hemia we oli jusum, oli stap karem i kam tugeta long pat ia blong wol. Testemoni blong mi abaot Restoresen i kam antap moa from mi bin luk impoten pat blong Restoresen ia i hapen long fored blong ae blong mi.
Mi bin luk tu wan nara samting abaot Restoresen ia we i stap gohed: wan strong fos we i laef long fet mo long saed blong spirit long medel blong ol memba ia blong Afrika. Mi bin harem Elda Deved A. Bedna blong Kworom blong Olgeta Twelef Aposol, i talem, “Ketlan [ples we Ol Lata-dei Sent oli bin laef long hem long yia blong 1830] i no stap nomo long Ohaeo. Hem i stap tu long Afrika.” Plante pipol oli stap joenem Jos ia long Afrika folem ol eksperiens blong olgetawan long saed blong spirit, we i gat fulap paoa. Ol niu memba ia oli karem wan fos long saed blong spirit mo wan nid blong lanem moa abaot gospel. Long olgeta, Restoresen ia i stap gohed long wan wei we i blong olgetawan. Taem oli stap lanem moa mo moa abaot Jos, ol trutok blong gospel i gohed blong kamkamaot long lukluk blong olgeta. Semmak samting i tru blong yumi evriwan taem yumi stap gohed blong mekem save blong yumi long gospel i kam moa bigwan.
Trifala Wei blong Help long Restoresen Ia we I Stap Gogohed.
God i bin givim yumi bigfala janis ia blong mekem wan impoten rol insaed long wok ia. Lod i bin talem se “bodi [blong Jos] i gat nid long evri pat blong hem” (Doktrin mo Ol Kavenan 84:110). Evri memba blong Jos i gat blesing ia blong tekpat long Restoresen ia we i stap gohed. ?Olsem wanem nao yumi mekem hemia?
Wan wei blong tekpat i blong mekem mo kipim ol tabu kavenan. Ol odinens, mo tu ol tempol odinens, i nogat wan stamba tingting sapos ol pipol oli mekem afta kipim ol kavenan we i kam wetem ol odinens ia. Sista Bonnie Parkin, Rilif Sosaeti Jeneral Presiden blong bifo, i bin tijim se, “Blong stap mekem kavenan i wan aksen blong wan hat we i glad blong mekem samting. Blong stap kipim ol kavenan, i wan aksen blong wan fetful hat.”6
Taem yumi stap mekem mo kipim ol kavenan, yumi no stap rere long yumiwan nomo blong laef we i no save finis, be tu, yumi stap help blong rere mo mekem wanem Lod i singaotem “ol kavenan pipol blong mi” i kam moa strong (Doktrin mo Ol Kavenan 42:36). Yumi mekem kavenan wetem God mo kam pat blong ol kavenan pipol blong Hem tru long baptaes, konfemesen, sakramen, Melkesedek Prishud, mo ol tempol odinens.
Nambatu wei we yumi save tekpat long Restoresen ia we i stap gohed, i taem yumi stap mekem ol koling mo asaenmen we yumi kasem. Hemia i olsem wanem Jos i stap muv fored. Ol tija we oli givim taem blong olgeta blong tijim gospel long ol pikinini, yut, mo ol adalt. Ol givhan brata mo sista oli kea long wanwan memba blong Jos. Ol presidensi mo bisoprik i givim gaed long ol stek, ol distrik, ol wod, ol branj, ol kworom, ol oganaesesen, ol klas, mo ol grup. Ol yut lida oli kea long ol yang woman mo yang man. Ol klak mo sekretari oli rekodem ol impoten infomesen we afta, oli rekodem long heven, mo wan grup blong ol narawan i mekem ol impoten rol blong stap rere long ol pipol from laef we i no save finis mo Seken Kaming blong Sevya.
Ol yut i stap laen blong go long long Akra Gana Tempol.
Nambatri wei we yumi save tekpat long Restoresen i taem yumi stap help blong karem Isrel i kam tugeta. Stat long fas dei blong Restoresen, hemia i bin ki pat blong wok ia. Olsem we Presiden Nelson i bin tijim, yumi gat janis ia mo wok blong help blong karem ol pipol i kam tugeta, we i stap hapen long tugeta saed blong vel. Long mesej blong klosem fas jeneral konfrens blong hem olsem Presiden blong Jos, Presiden Nelson i bin talem i sot mo klia se, “Mesej blong yumi long wol i simpol mo i ones: mifala i stap invaetem evriwan long ol pikinini blong God, long tugeta saed blong vel, blong kam long Sevya blong olgeta, blong kasem ol blesing blong tabu tempol, gat wan glad we i gogohed blong stap, mo kwalifae from laef we i no save finis.”7
Kam tugeta blong Isrel long tugeta saed blong vel i minim misinari wok. Evri wan long yumi we i save sevem ol fultaem misin, i mas tingting gud long janis ia. Mi mi kaontem olsem wan bigfala blesing we mi bin givim seves long wan misin long Itali longwan taem we Jos i yang tumas yet long we. Ol branj blong mifala i stap mit long ples we oli rentem, mo mifala i bin hop se sam dei, bae i gat ol stek mo wod long we. Mi bin wajem ol paeonia we oli nogat fasin blong fraet, oli kam long Jos mo statem fandesen blong kam tugeta blong Isrel long bigfala graon ia.
Wan long olgeta ia hem i Agnese Galdiolo. Mifala evriwan i bin filim paoa blong Spirit i fulap taem hem i bin tijim ol misinari lesen. Be, iven blong filim Spirit ia, hem i save se famli blong hem i agensem strong blong hem i kasem baptaes. Nomata long hemia, long wan taem, taem we hem i fulap wetem Spirit, hem i bin agri blong kasem baptaes. Be afta, hem i jenisim tingting blong hem long moning we oli bin putum taem blong baptaes blong hem long hem. Hem i bin kam eli long ples we oli rentem, long ples we bae oli baptaesem hem long hem blong talem se, from presa blong famli, bae hem i no save mekem.
Bifo hem i go, hem i agri blong mifala i toktok blong sam minit. Mifala i bin go long wan klasrum mo mifala i askem blong prea tugeta. Afta we mifala i nildaon, mifala i bin askem hem blong mekem prea. Afta long prea ia, hem i stanap wetem wota long ae blong hem mo talem, “Oraet, bae mi baptaes.” Mo afta sam minit i pas, hem i kasem baptaes. Long nekis yia, hem i maredem Sebastiano Caruso, mo oli bin lukaotem fo pikinini, we evriwan i bin go long ol misin mo gohed long taem ia i kam blong givim seves insaed long Jos.
Elda mo Sista Nelson Curtis wetem sam famli memba blong Caruso
Agnese mo Sebastiano tu i bin go long wan misin, wetem Sebastiano olsem misin presiden. Taem mi bin go long wan nambatu misin long Itali, 25 yia afta long faswan, mi bin gat janis blong luk wanem ol Carusos mo ol nara paeonia i bin mekem blong mekem kingdom blong God long we i go moa bigwan. Ol misinari blong mi mo mi i bin wok blong bildim Jos, mo stap drim se sam dei, maet bae oli bildim wan tempol long Itali. Pikjarem glad blong mi long tru toktok ia se, naoia yumi gat Rom Itali Tempol.
I gat sam glad nomo we yumi save komperem wetem glad blong misinari. !Wan bigfala blesing tru blong bon long wan taem we yumi save tekpat wetem glad long Restoresen ia we i stap gohed, taem yumi stap help blong karem Isrel i kam tugeta!
Glad blong misinari, yes, i no ol fultaem misinari nomo oli filim. Wanwan long yumi i save helpem ol brata mo sista blong yumi blong jenisim laef mo mekem olgeta i kambak strong long Jos, taem yumi stap wok wetem han blong yumi tugeta wetem ol fultaem misinari. Yumi gat janis ia blong karem Isrel i kam tugeta taem yumi stap invaetem ol narawan blong kam mo luk mo taem yumi felosip wetem olgeta we oli stap tijim olgeta.
Hem i tru long tempol mo famli histri wok, we yumi stap help blong karem Isrel i kam tugeta long narasaed blong vel. Blong plante yia, hem i bin tabu responsabiliti blong yumi blong mekem wok ia. Bifo ded blong Josef Smit, Ol Sent oli bin mekem ol baptaes blong ded, mo sam i bin kasem endaomen mo siling blong olgeta. Taem oli bin finisim Nauvu Tempol, ol endaomen blong olgeta we i laef i bin stat kwiktaem. Ol endaomen mo siling blong ol bubu i stat tu long ol tempol long Yuta.
Elisa R. Snow, wan impoten woman we i tekpat long rod blong Restoresen, i bin andastanem impoten pat ia blong Restoresen. Hem i spendem fulap taem insaed long endaomen haos blong stap help wetem ol odinens long we.8 Long taem blong wan long ol Rilif Sosaeti visit long 1869, hem i bin tijim ol sista blong hem se, “Mi bin stap luklukbak long bigfala wok ia we yumi gat blong mekem, iven blong stap help blong sevem laef blong olgeta we oli stap laef mo olgeta we oli ded. Yumi wantem stap olsem … ol fit kompanion blong ol God mo Ol Tabu Wan.”9
Mo yes, ol tempol odinens i stap mo bin go bigwan moa tumas wetem fulap tempol we oli stap bildim raon long wol, wetem fulap moa blong kam.
Wetem ol tul we yumi gat naoia we i stap blong yumi yusum, tempol mo famli histri wok i save kam wan nomol pat blong yumi tekpat long hem long Restoresen ia we i stap gohed. Mi bin intres mo pat long famli histri wok blong fulap yia, be ol tul onlaen i bin mekem sakses blong mi i bigwan blong stap tekem ol nem blong famli i go long tempol. Mi gat ol tabu memori blong stap sidaon long wan tebol long apatmen blong mifala long Gana mo stap faenem ol nem blong ol bubu blong mi long Yurop, we waef blong mi mo mi i save tekem i go long Akra Gana Tempol. Janis ia we i fulap long glad, i bin folem mifala i go long ol nara ples we oli bin sendem mifala i go long hem.
Tru long Profet Josef Smit, God i bin statem proses blong “blong mekem i hapen, wok ia blong putumbak evri samting we evri tabu profet i bin talem, stat long stat blong wol” (Doktrin mo Ol Kavenan 27:6). Restoresen i bin gohed kasem naoia taem God “i stap talemaot naoia” mo “bambae Hem i soemaot yet plante bigfala mo impoten samting abaot kingdom blong God” (Toktok blong Bilif 1:9.). Mi talem tangkyu tumas se yumi save tekpat long Restoresen ia we i stap gohed.