Mekem Fet blong Yu I Kam Moa Strong Tru long Fas Visen
Mi prea se bae yu folem paten blong prea blong Josef, bae yu lanem ol trutok we hem i bin lanem, mo bae yu mekem fet blong yu long Papa long Heven mo long Pikinini blong Hem, Jisas Kraes, i kam moa strong.
Taem mi bin gat 16 yia, mi travel aot long hom blong mi i go long wan konfrens long Is Kos blong Yunaeted Stet, we ol yang woman mo ol yang man blong evri 50 stek mo kolosap 40 nesen i go long hem, Bifo long hemia, mi no bin stap tumas long wan situesen we ol bilif mo ol strong tingting blong mi oli mekem mi defren long ol narawan.
Long wan naet, wan storian i girap long wan grup abaot sam long ol bilif mo praktis blong Jos Ia blong Jisas Kraes Ia blong Ol Lata-dei Sent. Kwiktaem, wan bigfala grup blong studen oli lukluk mi mo stat blong askem ol kwestin, we sam long ol kwestin ia oli impoten long bilif blong yumi.
Mi no rere from nating. Be afta we mi luklukbak blong wan smol taem, mi stat blong serem ol stamba gospel prinsipol. Mi eksplenem se yumi gat wan Papa long Heven, mo yumi ol boe mo gel blong Hem, mo yumi stap long wol blong developem fet long Jisas Kraes mo blong pruvum yumiwan taem yumi stap jusum gud ova long ivel.
Blong stap serem ol prinsipol ia i lidim mi i go long testemoni blong Josef Smit. Ol nara studen oli no bin askem abaot Josef Smit, be mi sek se mi stap tokbaot ol stamba samting we from olgeta, i mekem mi bilivim wanem mi biliv long hem naoia. Taem mi tokbaot Papa mo Pikinini long Tabu Bus ia, kwiktaem nomo evri man i kwaet. Wan strong filing blong holines i kam insaed long rum, mo wan bigfala filing blong paoa long saed blong spirit i stap wetem mi mo ol toktok blong mi.
Afta long hem ia, sam studen oli tangkyu long mi from strong bilif blong mi. Sam i iven askem moa infomesen abaot Jos. Taem mi gobak long rum blong mi long naet ia, mi kam blong luksave se eksperiens i gat bigfala paoa long mi ia nao. Mi bin filim long miwan, paoa blong serem testemoni abaot God Papa, Jisas Kraes, mo Fas Visen.
Stat long eksperiens yia we i hapen moa long 50 yia i pas, mi bin testifae handred taem abaot Papa, Pikinini, mo Profet Josef Smit. Long ol eksperiens ia, mi bin filim Tabu Spirit i konfemem witnes blong Hem.
Mi laekem blong serem faef prinsipol we mi bin lanem aot long andastaning blong mi long saed blong spirit abaot Fas Visen. Ol prinsipol ia i bin mekem fet blong mi i kam strong moa mo mi wantem blong folem Papa long Heven mo Pikinini Boe blong Hem we Hem i lavem tumas. Mi hop se bae oli mekem yu kam strong moa tu.
1. Papa, Pikinini mo Tabu Spirit Oli Ol Seperet Man
Blong plante handred yia, ol man we oli stadi relijin mo ol man blong stadi long ol aedia mo tingting, oli stap storian abaot God Papa, Jisas Kraes, mo Tabu Spirit. Plante oli biliv se Olgeta i wan man nomo. From eksperiens blong Josef long Tabu Bus 200 yia i pas i mekem yumi save stret trutok abaot huia God.
Faswan long evriwan, !Hem i stap laef! Nambatu, Papa mo Pikinini, Tufala i tu man we i seperet, oli gat glori, oli gat bodi we i laef bakegen long ded, mo Tufala i defren long wanwan long Tufala. Afta, Josef i bin lanem se “Tabu Spirit, hem i no gat wan bodi blong mit mo bun, be hem i wan we i Spirit nomo. Sapos i no olsem, bae Tabu Spirit i no save stap insaed long yumi.” (Doktrin mo Ol Kavenan 130: 22).
2. Yumi Ol Pikinini Boe mo Pikinini Gel blong God
Tru long Fas Visen mo ol nara eksperiens, Profet Josef Smit i bin lanem se, God Hem i no wan paoa nomo we i stap longwe we i bin krietem wol mo ol samting we oli stap laef insaed long hem, mo afta fogetem olgeta. Be long ril laef, wanwan long yumi i “wan gel [o boe] blong papa mo mama long heven.”1
Ofisol toktok blong famli i talem: “Evri famli blong man—man mo woman—oli mekem olgeta folem imej blong God. Wanwan long olgeta hem i wan spirit pikinini boe o spirit pikinini gel blong papa wetem mama long heven we oli laekem olgeta tumas, mo from hemia, wanwan i gat gudfala fasin mo bigfala janis blong save kam olsem God.”2 Papa blong yumi i talemaot klia se bigfala janis ia blong save kam olsem God: “From luk, hemia i wok mo glori blong mi—blong mekem man i nomo save ded mo i kasem laef we i no save finis” (Moses 1:39).
Aedentiti blong yumi i stap wetem God, mo yumi stap long wol ia blong kam moa olsem Hem. Andastaning ia aot long Fas Visen, i mekem mi olsem wan yang man i save se mi gat wan Papa long Heven blong miwan we i lavem mi mo wantem mi blong gobak stap wetem Hem.
3. Hem I Save Fogivim Ol Sin blong Yumi
Wan long ol bigfala wari blong Josef i blong oli fogivim hem long ol sin blong hem. Long wan pat blong Fas Visen, Lod i toktok long yangfala man ia we i bin stap lukaotem trutok, mo i talem ol toktok ia: “Josef, boe blong mi, mi fogivim ol sin blong yu. Yu folem rod blong yu i go, yu wokbaot folem ol rul blong mi, mo yu obei long ol komanmen blong mi. Luk, mi mi Lod blong glori. Oli bin hangem mi antap long kros, long bihaf blong wol ia, mo evriwan we bambae oli biliv long nem blong mi, bae oli gat laef we i no save finis.”3
Josef i bin lanem se, tru long Atonmen blong Jisas Kraes, God i save fogivim ol sin blong hem, mo kam klin mo klin gud long fes blong God. God i bin givim stret save long hem se Jisas Kraes i bin tekem, antap long Hemwan, ol sin mo ol hevi trabol blong evriwan we i stap laef, mo evriwan we bambae i laef yet long wol ia.
Aot long Fas Visen, yumi lanem se, from gladhat blong Sevya blong yumi, Jisas Kraes, yumi tu, bambae God i fogivim ol sin blong yumi, mo wan dei, bambae yumi stanap klin long fes blong Papa.
4. Papa blong Yumi long Heven I Harem mo Ansarem Ol Prea blong Yumi
Insaed long bus ia, long dei ia, long yia 1820, Josef i bin lanem se Papa long Heven i stap harem mo ansa long prea. Afta long hemia, Josef i bin talem: “From tingting blong mi i strong se bae hem i soemaot wan samting long mi, olsem we mi bin kasem wan bifo” (Josef Smit—Histri 1:29). Eksampol blong Hem i tijim yumi se yumi save kam long fored blong Papa long Heven long prea blong kasem ol ansa blong yumiwan.
Josef i bin ripitim paten blong prea ia bakegen mo bakegen. Hem i bin gat tras se Lod bae i harem mo ansarem ol prea blong hem. Hem i bin prea abaot ol samting we, maet yu tu, bae yu prea from.
Hem i bin prea blong kasem waes (luk long Josef Smit—Histri 1:12–13).
Hem i bin prea abaot baptaes (luk long Josef Smit—Histri 1:68).
Hem i bin prea blong hem i kam fri (luk long Doktrin mo Ol Kavenan 121:1–4).
Hem i bin prea from ol misinari (luk long Doktrin mo Ol Kavenan 109:22).
Hem i prea from Jos, ol memba blong Jos, mo ol lida blong Jos (luk long Doktrin mo Ol Kavenan 109:71–76).
Hem i bin prea from famli blong hem (luk long Doktrin mo Ol Kavenan 109:68–69).
Hem i wan paten blong yumi folem. Josef i bin soem long yumi se yumi evriwan i save go long Papa, long prea.
5. Papa mo Pikinini, Tufala I Save Gud Huia Wanwan long Yumi
Stat long Fas Visen, yumi lanem se tufala Man ia we i kam long Heven, Tufala i save gud wanwan long yumi, semmak olsem we Tufala i bin save gud Josef. Papa i singaotem Josef long nem blong hem, mo talem wetem fingga blong Hem i “poenem narawan—Hem, Hem i Pikinini blong Mi we Mi Lavem Tumas. !Lisin gud long hem!” (Josef Smit—Histri 1:17.)
Papa mo Pikinini, Tufala i bin save ol nid, ol wari, mo ol samting Josef i bin wantem tumas long hat blong hem, semmak we Tufala i save nid, wari mo samting we yumi wantem tumas long hat blong yumi. Tufala i save tu ol sakses blong yumi mo ol harem nogud blong yumi.
Long yangfala taem blong mi, mi bin prea from plante samting. Taem mi lukluk i gobak, sam long ol samting ia, oli nomo impoten tumas. Be long tetaem ia, oli bin impoten long mi, mo taem mi yangfala nomo i stap, mi bin andastanem se mi bin gat wan Papa we i stap long Heven we i bin stap lisin long mi. I no oltaem we mi kasem wan kwik ansa, be mi bin filim se long stret taem blong Hem mo long stret wei blong Hem, bae Hem i ansarem prea blong mi long wan wei we i stret long mi.
Gat ful tras long yuwan mo tras long God se bambae Hem i toktok long yu. Bilivim ol filing ia we oli kam dip insaed long hat blong yu. Mi mi kam blong biliv long prea mo mi kam blong andastanem paoa blong hem from se mi save abaot ol eksperiens blong Profet Josef Smit. Mi bin save se God i save nem blong mi, mo bae Hem i ansarem mi, semmak olsem we Hem i save nem blong yu mo bae Hem i ansarem yu.
Testemoni
Plante taem long ol 68 yia we i bin stap laef long wol ia, mi bin testem paten blong Josef long saed blong prea. Olsem evri tru disaepol blong Sevya, mi bin kasem ol ansa we oli kam long heven. Mi save se Jisas Hem i Kraes. Hem i Pikinini blong God. Hem i bin laef bakegen long ded, mo Hem i stap laef tedei. Hem i gat paoa blong fogivim ol sin blong yumi. Tru long fet, fasin blong stap obei, mo fasin blong sakem sin blong yumi, bambae Hem i save tekem yumi i gobak sef long hom blong yumi long heven.
Olsem wan Aposol blong Lod Jisas Kraes, mo olsem wan witnes blong Hem we Hem i odenem mi, mi testifae, wetem tru fasin mo tru tingting we Tabu Spirit i konfemem, se Papa mo Pikinini, Tufala i bin kamaot long Josef Smit insaed long Tabu Bus. Mi prea se bae yu folem paten blong prea blong Josef, bae yu lanem ol trutok we hem i bin lanem, mo bae yu mekem fet blong yu long Papa long Heven mo long Pikinini blong Hem, Jisas Kraes, i kam moa strong.
Pikja i kam long David Malan
Pikja i kam long Kendall Ray Johnson