Stap Kasem Fet blong Mi Wan Step long Wan Taem
Blong kasem wan testemoni i tekem taem. Plante taem, hem i karem ol smosmol eksperiens i kam tugeta.
Wan long ol taem we i eksplenem laef blong mi i hapen blong mi taem mi gat 10 yia, taem mi bin spendem tu wik blong stap lanem abaot Katolik doktrin long Loreto Katolik Misin, raon long 32 kilometa longwe long hom blong mi long Silobelo, Simbabwe. Mi kam blong save mo lavem Sevya Jisas Kraes mo lukluk antap long Lod tru long ol eli lesen mo filing ia.
Taem mi stap insaed long Katolik japel ia, mi luk ol penting we oli soem ol taem long laef blong Sevya, we oli putum long wol: ol taem we Jisas Kraes i bon, taem Hem i stap tij long tempol, stap prea long Garen blong Getsemane, stap karem kros i go long Kalvari, taem oli hangem Hem long kros long Golgota, mo taem Hem i Laef Bakegen long Ded. I mekem mi harem nogud blong luk ol nil mo ol ropnil. Be taem mi kasem penting blong taem we oli hangem Hem long kros, wota blong ae blong mi i fulap. Mo evri taem bae mi krae mo talem, “Ei, Hem i go tru fulap samting from mi nomo.”
Long taem blong seremoni blong konfemesen, wan long ol pris i lukluk insaed long ol ae blong mi mo talem, “Yu yu laet blong wol” (luk long Matiu 5:14). Afta, hem i poen i go long wan kandel we i stap laet mo talem ol toktok blong Sevya: “Yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala, we i stap long heven.” (Matiu 5:16).
Taem mi stap lanem moa abaot Jisas, mi stat blong wantem givim seves long ol nara man. Eksampol, mifala i mas kasem wota blong mifala we i stap 8 kilometa longwe long vilej blong mifala. Plante taem, ol woman long vilej, mo mama blong mi tu, oli stap kasem wan 20 lita kontena we i fulap long wota antap long hed blong olgeta. Afta long eksperiens blong mi long Katolik Seminari, plante taem bae mi pusum wan 200 lita kontena blong wota blong helpem mama blong mi, mo tu, helpem tu nara wido we oli ol neba blong mifala. Mi tingbaot gudfala filing ia we mi filim evri taem mi helpem ol nara wan.
Ol eksperiens ia i bin help blong developem fet blong mi long Papa long Heven mo Jisas Kraes mo, i bin rere long mi blong akseptem gospel blong Jisas Kraes taem mi gat 22 yia.
Stap Akseptem Buk blong Momon
Mi groap long wan taem blong jenis long kantri blong mi. Sam waet man we Ian Smit i stap lidim olgeta i singaotem indipendens aot long Briten long 1965. Hemia i mekem Yunaeted Nesen i kros mo statem ol yia blong sivil wo i stap kasem 1980, we i makem indipendens blong Simbabwe. Taem mi finisim skul blong mi, mi muv i gobak long siti blong wo mo no go long jos blong sam yia.Wan dei, mi stap pleplei wetem ol boe blong bos blong mi. Wan i gat naen yia, mo narawan i gat seven yia.
Oli talem, “Yu save, papa blong mifala i branj presiden long Jos blong mifala.” Oli eksplenem wanem i wan branj presiden, mo afta mi no tingting gud mo talem, “Papa blong yufala bae i no go long heven.” Mi bin luksave se mi mekem wan bigfala mistek, mo traem bes blong talem wan samting long olgeta blong mekem oli fogetem toktok we mi bin talem. Long en blong dei, taem oli luk papa blong olgeta, oli ron i go long hem mo talem wanem mi bin talem. Mi ting se bae mi lusum wok blong mi.
Bifo taem ia, bos blong mi i bin soem wan jaket long mi we hem i bin gat taem hem i stap long ami, mo soem se hem i bin kilim man i ded. Hemia nao i mekem mi talem wanem we mi bin talem. Bos, i askem long mi from wanem mi bin talem hemia be long wan kwaet wei. Mi talem, “Bos, tingbaot yu bin talem long mi se yu kilim man i ded long wo. Long Baebol i talem se, ‘Yu no mas kilim man i ded.’”
Hem i askem long mi wanem jos mi stap go long hem. Mi talem long hem se bin stap go long Katolik Jos be mi nomo go blong sam yia nao. Hem i serem ol eksperiens insaed long OlTesteman abaot ol wo mo taem blong agens, mo afta hem i givim wan kopi blong Buk blong Momon. Mi bin glad tumas se mi no lusum wok blong mi.
Hem i givim Buk blong Momon long mi long 1981, be mi no ridim o iven openem blong tu yia. Wan Sandei, mi nogat samting blong mekem taem ol fren blong mi oli aot long taon, mekem se mi pikimap buk ia mo go long stesen blong tren we i moa kolosap mo rid. Taem mi bin rid long dei ia, mi filim strong filing ia blong mekem gud, be wanem we i tajem mi afta long riding blong mi hem i 3 Nifae 11. Mi bin rid abaot Ol Man blong Nifae we oli laef afta long wo mo hadtaem, mo afta Sevya Jisas Kraes i kamkamaot long olgeta.
Kantri blong mi i bin gotru wo blong olgetawan blong 15 yia. Sam long ol pipol we mi bin groap wetem olgeta long vilej blong mi i bin go long wo mo nomo kambak. Ol narawan oli handikap blong laef.
Mekem se, taem mi stap rid abaot Ol Man blong Nifae, mi filim olsem Sevya Jisas Kraes i stap pusum han blong Hem from mi taem Hem i talem, “Girap mo kam fored long mi, blong yufala i save … filim ol mak blong ol nil long ol han blong mi mo long ol leg blong mi, blong yufala i save gat save se mi mi God blong Isrel, mo God blong ful wol, mo oli bin kilimded mi from ol sin blong wol” (3 Nifae 11:14).
Mi filim olsem Hem i stap pusum han blong Hem i kam stret long mi, i stap invaetem mi blong go long Hem. Mi luksave se mi save mekem hemia. I bin jenisim evri samting.
Stap Kasem Testemoni blong Mi
I tekem mi sam manis blong kasem karej blong go long jos. Mi save ples we jos i stap long hem, be i no gat ol misinari long smol branj blong mifala. Long Febwari 1984, mi bin wokbaot i go insaed long Kwekwe japel. Mi bin wantem blong wokbaot i kambak aotsaed. Mi no sua sapos mi fit long ples ia, mo mi sidaon biaen, rere blong ronwe. Afta we oli openem taem, branj presiden, Mike Allen, i serem testemoni blong hem abaot Sevya Jisas Kraes mo Buk blong Momon. Mi filim se mi joen wetem olgeta. Nekis man tu i serem testemoni blong hem abaot Sevya mo Buk blong Momon, mo nambatri man tu. Mi bin filim glad tumas. Mi no bin gat inaf strong paoa long tingting blong go long pulpit, mekem se mi stanap nomo long ples we stap long hem mo talem, “Mi lavem Jisas. Mi stap ridim Buk blong Momon.” Mo mi sidaon. Hemia i stat blong testemoni blong mi.
Ol testemoni ia, oli wei blong Lod blong pusum han blong Hem long mi from i helpem mi blong filim se mi pat blong ples ia. Mi filim olsem, olgeta ia, oli ol brata mo sista blong mi. Long ol dei we i go, mi prea from olgeta blong oli akseptem mi. Mi bin mitim ol memba we oli kaen tumas mo helpem mi.
Fulap samting i hapen long dei ia we mi bin wokbaot i go insaed long japel ia. Mi askem miwan wanem bae i hapen sapos ol memba ia oli no bin serem testemoni blong olgeta. Yu neva save sapos i gat wan man we i stap fesem hadtaem. Taem yu stanap mo talem wanem yu filim, maet bae hem i stret samting we wan man i nidim blong harem.
Serem testemoni blong yu plante taem. Taem yu mekem hemia, yu stap mekem yuwan mo ol narawan raon long yu i kam moa strong. Stanap from wanem we yu save. Taem yu stap folem kaonsel long Buk blong Momon, bae yu kam moa kolosap long Sevya.
Kam Kolosap long Sevya
Taem ia we mi spendem long Loreto Roman Katolik Misin i statem rod blong mi blong kam olsem wan disaepol blong Sevya Jisas Kraes. Stat long taem ia, mi bin lanem se blong stap wan disaepol i wan proses we yumi nid blong gohed blong muv fored nomata ol wiknes mo ol samting we yumi no save mekem. Taem yumi welkamem invitesen ia: “Be fasin blong yufala i mas stret gud, olsem fasin blong Papa blong yufala long heven” (Matiu 5:48), bae yumi progres from laef we i no save finis “tijing folem tijing, rul folem rul” (luk long Doktrin mo Ol Kavenan 98:12).
Yumi save se rod bae i no oltaem isi, mo bae yumi eksperiensem, ol hadtaem mo ol hat i soa long semtaem, be blong stap lukluk i go antap long Lod, i wei ia nomo blong faenem pis long laef blong yumi.
Atonmen blong Sevya Jisas Kraes i evri samting long mi. Mi save se Sevya i stap pusum han blong Hem long yumi. Yumi nid blong lukluk i go antap, folem Hem, mo pusum han blong yumi blong leftemap ol narawan taem Hem i stap pusum han blong Hem blong leftemap yumi.
Mi bin lanem se blong stap wan disaepol i wan longfala rod we yumi nid blong gohed blong muv fored long hem.
Ol pikja oli kam long Greg Newbold