“?Luk Wanem Wan Smol Fet I Save Mekem?”
Godfrey J. Ellis
Wasington, YSA
Pikja © Gary Alphonso, i2iart.com
Samtaem i pas, waef blong mi mo mi i go, wetem tufala yang boe blong mitufala, long Franis blong goraon long ol eria we mi bin givim seves long hem olsem wan fultaem misinari. Mifala i bin go visitim ol branj blong Jos we mi bin stap givim seves long hem, mo mifala i bin stap glad wetem ol memba we mi bin tijim. Mifala i bin go visitim ol histri ples tu.
Wan ples, hem i ol hafhaf bilding blong Château de Châlucet (wan haos blong ol laen blong king.) Bigfala naes haos ia, oli bin atakem mo prapa spolem gud ova long plante handred yia. Bus i gro raon long bilding ia, mo i gat wan smol rod i go long ples ia, mo rod ia i smol mo i stip. Mifala i gat hadtaem blong klaem, be i mifala i glad long hadwok ia taem mifala i kasem antap.
Ol boe oli laekem blong klaem i go daon long wanem we, long wan taem, i bin wan kalabus, mo blong klaem i go antap long wol blong olfala haos ia we i stap yet. Haos blong laen blong king ia i pulum tingting blong olgeta, semmak olsem i bin pulum tingting blong mi 24 yia bifo finis.
Mifala i stap ia, mo i luk se wan strong win i stap girap. Hem i muv hariap. Ol dak klaod mo laetning oli fulumap skae, mo afta, ol tanda oli faerap.
Mifala i ronron folem smol rod mo ron from trak taem strong win ia i stap kam biaen long mifala. I no longtaem afta, bigfala hevi ren i foldaon long mifala, mo smol graon rod ia i kam sofmad. Mifala i wari we bae mifala i no save stanap strong mo foldaon long stip rod ia we i fulap long ston.
Mifala i luk wan selta long medel blong ol tri long saed blong smol rod. Mifala i go andanit long selta, mo stap tingting se, bae mifala i mas stap ia kasem wetaem bifo mifala i save go daon bakegen.
Yang boe blong mitufala i talem: “Yumi prea.”
Hem i askem se hem nao bae i talem prea, mo i prea se bae ren i stop blong mifala i save go daon long hil, we bae mifala i sef. Hem i lukluk long mifala mo talem: “Naoia, yumi nidim fet nomo.”
Mi eksplenem se ol prea i no wok oltaem olsem.
Hem i talem: “!No. Bae ren i stop long 10 minit!”
Mo samples afta long 10 minit, ren i bin stop.
Hem i talem: “!Ale, yumi go!”
Bigfala boe i talem: “Sapos yumi aot naoia, bae ren i stat bakegen mo bae yumi fas bakegen.”
Smol boe i talem: “!No,” bae i no ren. “Yumi go!”
Mifala i wokbaot i go long ol ples we oli drae smol, we mifala i stap holem ol smol bus mo branj taem mifala i stap wokbaot i go. Taem mifala i kasem trak, mifala i talem wan prea blong tangkyu. I no longtaem afta, ren i stat bakegen.
“?Luk se smol fet i save mekem wanem?” smol boe i talem wetem tingting i stap daon.
Hem i bin tijim mifala wan bigfala lesen long dei ia.