Mi Save Givim Wan Blesing Nomo

Jonathan Mafra Sena de Santana

Santa Katarina, Brasil

Mi finisim loa skul samples long taem we gel blong mi bae i gat wan yia. Waef blong mi mo mi, i wet blong stap selebretem graduesen blong mi, betdei blong gel blong mitufala, mo ol niufala janis we bae i kam long mifala, be i no gat wan samting i gohed folem plan.

I no longtaem afta we mi flatem digri blong mi, mi nomo gat wok, mo mi gat hadtaem blong faenem wok. I no longtaem afta, problem blong mane i kam. Blong gat wan smol betdei pati nomo, bae i had.

Afta fulap storian wetem waef blong mi, mitufala i akseptem situesen we mitufala i stap long hem. I no bin isi long mi, olsem wan papa, blong no gat paoa ia blong pem wan simpol presen blong gel blong mi, mo blong luk waef blong mi i no glad tumas.

Mi no bin andastanem wanem i bin stap hapen. Mi bin prea mo mi bin askem Papa long Heven blong helpem mi blong andastanem wanem Hem i wantem luk mi mi mekem. Wantaem nomo, olsem se wan voes i toktok long maen blong mi, mi bin harem olgeta toktok ia: “Yu gat wan samting we i gat moa praes bitim eni samting blong wol ia. Yu holem prishud i stap. ?Wanem presen nao i moa gud we yu save givim long gel blong yu, bitim wan prishud blesing?”

Wota blong ae blong mi i fulap taem mi bin stap tingting long wanem nao prishud i minim long mi. Hat blong mi i fulap wetem tangkyu taem mi tingting se prishud i paoa we i save yunaetem famli blong mi blong evri taem we i no save finis.

Mi bin serem ol filing blong mi wetem waef blong mi. Mi talem long hem se blong givim wan blesing long gel blong mitufala, i evri samting ia we mi bin save givim. Tugeta, mitufala i disaed se hemia bae i tekem hapines mo pis i go long hem, mo hemia bae i inaf.

Long dei ia blong betdei blong gel blong mitufala, ol fren, ol famli mo ol neiba oli tekem wan kek i kam mo ol simpol dekoresen. Mitufala i bin glad tumas blong selebretem spesel dei ia wetem olgeta we mitufala i lavem olgeta. Long naet ia, mi bin putum han blong mi antap long hed blong gel, mo mi givim hem wan blesing. Mi blesem hem wetem evri samting ia we Spirit blong Lod i talem long mi blong talem.

Mitufala i stap gotru yet long wan taem we ol samting oli jenis, mo i gat jalenj long saed blong wok mo faenens. Be, iven long medel blong harem nogud mo tingting i fasfas, pis mo kamfot i kam tru long Sevya blong yumi, Jisas Kraes. Mi no gat tu tingting se, blong stap olsem wan memba blong Jos Ia blong Jisas Kraes blong Ol Lata-dei Sent wetem rod ia blong yusum prishud paoa, hem i wan blesing. Hemia nomo i evri samting we mi bin save givim long gel blong mi long betdei blong hem, mo i bin moa bitim inaf.